ޒިއުރިކް (ނޮވެމްބަރު 11) - ފީފާ ވޯލްޑް ކަޕް ކޮންމެ ދެ އަހަރަކުން ބާއްވަން ހުށަހަޅާފައިވާ ޕްރޮޕޯސަލާ ދެކޮޅަށް ގިނަ ގައުމުތަކަކުން ދެބަސްވަނީ ޖަޒުބާތުގައި ޖެހިގެން ކަމަށް ފީފާ ޗީފް އޮފް ގްލޯބަލް ފުޓްބޯލް ޑިިވެލޮޕްމަންޓްގެ މަގާމު ފުރަމުން އަންނަ މަޝްހޫރު ކޯޗު އާސެން ވެންގާ ބުނެފި އެވެ.
މިދިޔަ މެއި މަހު ފީފާ ކޮންގްރެސްގެ ތެރެއިން ސައުދީ އަރަބިއްޔާ ފުޓްބޯޅަ ފެޑެރޭޝަނުން ވަނީ ކޮންމެ ދެ އަހަރަކުން ވޯލްޑް ކަޕް ބާއްވާ ޕްރޮޕޯސަލް ހުށަހަޅައިފަ އެވެ. ފީފާގެ ވެސް ތާއީދާ އެކު ހުށަހަޅާފައިވާ މި ޕްރޮޮޕޯސަލާ ބެހޭގޮތުން އެކި ފޯރަމްތަކުގައި މައުލޫމާތު ފޯރުކޮށްދިނުމުގެ މަސައްކަތް ކުރަމުން އަންނަނީ ވެންގާ އެވެ.
ކޮންމެ ދެ އަހަރަކުން ވޯލްޑް ކަޕް ބޭއްވުމާ ދެކޮޅަށް ދުނިޔޭގެ ފުޓްބޯޅައިގެ އެންމެ ބޮޑު ދެ ބައްރުގެ ފެޑެރޭޝަނުން ވަނީ ބަޔާން ނެރެފަ އެވެ. އެއީ ޔޫރަޕްގެ ފެޑެރޭޝަން، ޔުއެފާ އާއި ދެކުނު އެމެރިކާގެ ފުޓްބޯޅައިގެ މައި އިދާރާ ކޮންމެބޯލް އިންނެވެ. މީގެ އިތުރުން ކްލަބް ފުޓްބޯޅައިގެ ވަރުގަދަ ލީގުތަކުގެ ބޯޑާއި ކްލަބް ފުޓްބޯޅައިގެ ޖަމިއްޔާތަކުން ވެސް އަންނަނީ ވޯލްޑް ކަޕްގެ މި ޕްރޮޕޯސަލާ މެދު ނުރުހުން ފާޅުކުރަމުންނެވެ.
މެންޗެސްޓާ ޔުނައިޓެޑަށް ކުރިން ކުޅުނު އިނގިރޭސި ޑިފެންޑަރު ރިއޯ ފާޑިނަންޑްގެ ޔޫޓިއުބް ޗެނަލް ޝޯ "ފައިވް"ގައި ވާހަކަ ދައްކަމުން ވެންގާ ބުނީ ކޮންމެ ދެ އަހަރަކުން އަންހެން ވޯލްޑް ކަޕް ބާއްވަނީ އަންހެން ފުޓްބޯޅައިގެ ކުރިއެރުމަށް ކަމަށް ގިނަ ބަޔަކަށް ގަބޫލުކުރެވޭ ގޮތަށް ފިރިހެނުންގެ ވޯލްޑް ކަޕަށް ވެސް އެ ފުރުސަތު އޮންނަން ޖެހޭނެ ކަމަށެވެ.
"އަހަންނަށް މި ޕްރޮޕޯސަލާ ދެކޮޅަށް ވާހަކަ ދައްކާ މީހުންގެ ފަރާތުން ފެންނަނީ ޖަޒުބާތީ ކަންކަން. ފުރިހަމަ ވިސްނުމަކުން ވިސްނާތަނެއް ނުފެނޭ. އަހަންނަށް ތަފާސްހިސާބުތަކުން ފެންނަން އޮތް ކަންކަމަށް ބަލާއިރު ޒުވާން ޖީލު ބޭނުންވަނީ އާ ފޯމެޓަކަށް (ކޮންމެ ދެ އަހަރަކު) ވޯލްޑް ކަޕް ބާއްވަން. އެކަމަކު، 50 އަހަރުން މަތީގެ މީހުން މި ތިބީ ހަަތަރު އަހަރުން ވޯލްޑް ކަޕް ބާއްވާ ގޮތަށް ވިސްނުން ބަހައްޓައިގެން،" ވެންގާ ބުންޏެވެ.
ވެންގާ ބުނީ ކަންކަމަށް ބަދަލެއް އަންނަން ޖެހޭ ވަގުތު އަންނާނެ ކަމަށާއި މިހާރު މި އޮތީ ވޯލްޑް ކަޕަށް ވެސް ޒަމާނީ ބަދަލެއް އަންނަން ޖެހޭ ވަގުތު ޖެހިފައި ކަމަށެވެ. މީގެ އެންމެ ބުއްދިވެރި ގޮތަކީ ކުރިއަރާފައިވާ މުޖުތަމައުގެ ވިސްނުމާ އެެއްގޮތަށް ކަންކަން ބަދަލުކުރުން ކަމަށް ވެންގާ ގަބޫލުކުރެ އެވެ.
މިހާރު ފީފާ އިން އަންނަނީ ވޯލްޑް ކަޕްގެ އާ ޕްރޮޕޯސަލް ދިރާސާ ކުރުމަށް ފަހު އެކި މެމްބަރު ގައުމުތަކާއި ފެޑެރޭޝަންތަކަށް މައުލޫމާތު ފޯރުކޮށްދެމުންނެވެ.
ފީފާގެ 211 މެމްބަރު ގައުމުތަކުގެ ތެރެއިން 166 ގައުމުން ވަނީ ދެ އަހަރުން ވޯލްޑް ކަޕް ބާއްވާ ޕްރޮޕޯސަލް ބަލައިގަންނަން ނިންމައިފަ އެވެ. އަންނަ މަހު 20 ވަނަ ދުވަހު ވޯލްޑް ކަޕްގެ އާ ޕްރޮޕޯސަލަށް ވޯޓަށް އަހަން އޮންލައިން ސަމިޓެއް ބާއްވާނެ ކަަމަށް ރިޕޯޓްތައް ބުނެ އެވެ. އަދި ވޯޓުން ފާސްވެއްޖެނަމަ ދެ އަހަރުން ވޯލްޑް ކަޕް ބާއްވަން ފަށާނީ 2028 ވަނަ އަހަރުން ފެށިގެންނެވެ.
