ވިލިމާލޭ ދާއިރާގެ މެމްބަރުގެ ހައިސިއްޔަތުން ކައުންސިލަށް ހުށަހަޅާ ކަންްކަން ހައްލުކުރަން މާލެ ސިޓީގެ މޭޔަރު ޑރ. މުހައްމަދު މުއިއްޒުގެ ފަރާތުން އެއްބާރުލުން ނުދެއްވާ ކަމަށް އެ ދާއިރާގެ ކައުންސިލަރު ނަހުލާ އަލީ ވިދާޅުވެއްޖެ އެވެ.
ނަހުލާ ވިދާޅުވީ ވިލިމާލޭގެ ސިނަމާލޭ ފްލެޓުތަކުގައި އުޅޭ ރައްޔިތުންތަކެއްގެ ކަންބޮޑުވުން ސިޓީ ކައުންސިލަށް ދެ ހަފްތާއެއްގައި ވިދިވިދިގެން ހުށަހެޅުމުން ވެސް މޭޔަރުގެ ފާރާތުން އެކަމަށް އެދެވޭ ހައްލެއް ހޯދުމަށް މަސައްކަތްކޮށްދީފައި ނުވާ ކަމަށެވެ.
އެހެން ކަމުން ވިލިމާލޭގެ ކަންކަން ސިޓީ ކައުންސިލަށް ހުށަހަޅައިގެން ކުރަން ދަތިވެފައިވާކަމަށް ނަހުލާ ވިދާޅުވި އެވެ.
"އަޅުގަނޑު މުގައްރިރަކަށް އިންނަ ވިލިމާލެ ސާވިސަސް ކޮމިޓީއަށް ވެސް ވިލިމާލޭގެ ކަންކަން ހުށަހަޅައިގެން ކުރުމަށް ވަނީ ދަތިވެފައި. މޭޔަރުގެ ސަމާލުކަމަށް މިކަން ގެނައުމުން ވެސް މިކަމަަށް ހައްލެއް ހޯއްދަވައި ނުދެއްވާކަން ފާހަގަކުރަން،" ނަހުލާ ވިދާޅުވި އެވެ.
ފްލެޓުގައި އުޅޭ ވިލިމާލެ ރައްޔިތުންގެ ކަންބޮޑުވުންތަކުގެ ގޮތުގައި ނަހުލާ ފާހަގަ ކުރައްވާފައި ވަނީ ފައިސާ ދައްކަންޖެހޭ މިންވަރަށް ދައްކައި ނިމުނު ނަމަވެސް ފްލެޓް އަމިއްލަ ވާނެ ގޮތުގެ އުސޫލެއް ނެތި މިއަދާ ހަމައަށް ވެސް ފައިސާ ދައްކަމުން އަންނަ ފަރާތްތަކެއް އުޅެމުން އަންނަކަމަށެވެ.
މިފަދަ އެކި ކަހަލަ މައްސަލަތަކާއެކު 31 އާއިލާއެއްގެ ޝަކުވާއާއި ކަންބޮޑުވުން ކައުންސިލަށް ހުށަހެޅިކަމަށް ނަހުލާ ވިދާޅުވި އެވެ.
މާލޭ މޭޔަރަށް މިފަދަ ތުހުމަތެއް ނަހުލާ ކުރައްވާފައިވަނީ ސުލޫކީ މައްސަލަތަކަކާ ގުޅިގެން އޭނާއަށް ޕީޕީއެމްގެ އެތެރޭގެ އިންތިހާބުތަކުގައި ވާދަނުކުރެވޭ ގޮތަށާއި ޕީޕީއެމްގެ ޖަލްސާތަކުގައި ވާހަކަނުދެއްކޭ ގޮތަށް 2024 ގެ ނިޔަލަށް ސަސްޕެންޑްކޮށްފައި ވަނިކޮށެވެ.
ނަހުލާ ވިދާޅުވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމް އޭނާ ވިލިމާލެއަށް ފޮނުއްވީ މާލޭގެ އެ އަވަށަށް ހެޔޮ ބަދަލުތަކެއް ގެނެސްދިނުމަށް ކަަމަށެވެ.
ނަމަވެސް ކުރިމަތިވަމުންދާ ހުރަސްތަކުގެ ސަބަބުން ކުރިއަށް ދިއުމަށް އުނދަގޫވެފައިވާ ކަމަށް އޭނާ ވިދާޅުވި އެވެ.
"ފިކުރު ތަފާތުކުރުމެއް ނެތި ވިލިމާލެ ދާއިރާގެ ކައުންސިލަރު އަބަދު ވެސް އިސްކުރާނީ ރައްޔިތުންގެ މަސްލަހަތު. ރައްޔިތުން ދެއްކި މަގަކުން އަަޅުގަނޑު ހިނގާނަން. އެ ޔަގީންކަން އަޅުގަނޑު ވިލިމާލެ ދާއިރާގެ ރައްޔިތުންނަށް އަރުވަން،" ނަހުލާ ވިދާޅުވި އެވެ.
އެއާއެކު ނަހުލާ ވަނީ ވިލިމާލޭގެ އެކި ކަންކަމުގައި އޭނާ ހުށަހަޅާފައިވާ މައްސަލަތައް ސިޓީ ކައުންސިލުން އެޖެންޑާކޮށް، ތަންފީޒުކޮށް ދިނުމަށް އެދިވަޑައިގެންފަ އެވެ.
