ހޯމަ ދުވަހުން ފެށިގެން ސްރީ ލަންކާގެ ހުރިހާ ސްކޫލަތަކެއްގައި ޕްރައިމަރީ ގްރޭޑްތަކުގެ ދަރިވަރުންނަށް ކިޔަވައިދޭން ފަށާނެ ކަމަށް އެގައުމުގެ ސަރުކާރުން ބުނެފި އެވެ.
ކޮވިޑް-19ގެ ތިން ވަނަ ކްލަސްޓާއެއް ފެނުމާއެކު ލަންކާގެ ސްކޫލްތައް ބަންދުކޮށްފައި ވަނީ އޭޕްރިލް 27 ވަނަ ދުވަހު އެވެ. އޭގެ ފަހުން ސްކޫލްތައް ހުޅުވަން ފަށާފައި ވަނީ އޮކްޓޫބަރު މަހު އެވެ.
ލަންކާގައި އަޅާފައިވާ ފިޔަވަޅުތަކަށް ލުއިދޭން ފަށާފައިވާ އިރު، އެންމެ ފުރަތަމަ ޕްރައިމަރީ ގްރޭޑްތަކަށް ކިޔަވައިދިނުމުގެ ހުއްދަ ދިނީ އެ ގްރޭޑްތަކުގައި ކިޔަވަމުންދާ ދަރިވަރުންގެ އަދަދު 200 އަށް ވުރެ މަދު ސްކޫލްތަކުގަ އެވެ.
އޮކްޓޫބަރު 21 ވަނަ ދުވަހުން ފެށިގެން 200 އަށް ވުރެ މަދު ކުދިން ޕްރައިމަރީ ގްރޭޑްތަކުގައި ކިޔަވަމުންދިޔަ ސްކޫލްތަކުގައި ވަނީ ކިޔަވައިދޭން ފަށާފަ އެވެ.
ހޯމަ ދުވަހު ލަންކާގެ ހުރިހާ ސަރަހައްދެގައު ހުރި ސްކޫލްތަކުން ޕްރައިމަރީ ގްރޭޑްތަކުގެ ދަރިވަރުންނަށް ކިޔަވައިދޭން ފަށާނެ ކަމަށް އެގައުމުގެ އެޑިއުކޭޝަން މިނިސްޓްރީން ވަނީ ބުނެފަ އެވެ.
އޭގެ ތެރޭގައި ސަރުކާރުގެ ސްކޫލްތަކާއި ސަރުކާރުގެ ހުއްދަ ލިބިގެން އެގައުމުގައި ހިންގާ އަމިއްލަ ސްކޫލްތައް ވެސް ހިމެނެ އެވެ.
އެގައުމުގެ ޓީޗަރުންނާ ޕްރިންސިޕަލުންގެ ޔޫނިއަނުންވެސް ވަނީ ހޯމަ ދުވަހު ހުރިހާ އެންމެން ވަޒީފާއަށް ނުކުންނާނެ ކަމަށް ބުނެފަ އެވެ.
ލަންކާ އަކީ ގިނަ އަދަދެއްގެ ދިވެހި އާއިލާތައް ދިރިއުޅެމުންދާ ގައުމެކެވެ. ލަންކާގައި ދިރިއުޅޭ ގިނަ ދިވެހިންނަކީ ތައުލީމު ހާސިލުކުރުމަށް އެގައުމަށް ގޮސް ތިބި މީހުންނެވެ.
ލަންކާގެ ހުރިހާ ސްކޫލެއްގައި ޕްރައިމަރީން ފެށިގެން މައްޗަށް ކިޔަވައިދޭން ފަށަން ނިންމާފައި ވީނަމަވެސް އެގައުމުގައި އެއް ޕްރޮވިންސުން އަނެއް ޕްރޮވިންސަށް ދަތުރުނުކުރެވޭ ގޮތަށް ނިންމާފައިވާ ނިންމުން ވަނީ މިމަހުގެ ނިޔަލަށް އިތުރުކޮށްފަ އެވެ.
ލަންކާއިން މިހާތަނަށް ފަސް ލައްކަ އަށް ވުރެ ގިނަ މީހުންނަށް ކޮވިޑް ޖެހިފައިވާއިރު، 13،000 އަށް ވުރެ ގިނަ މީހުން ވަނީ ބަލިޖެހިގެން މަރުވެފަ އެވެ.
