ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓުތަކުގެ ކައިރިއަށް މީހުން ޖަމާކޮށްފައި ހުރި ކުނިތައް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން އެއްކޮށް ސާފުކޮށްފި އެވެ.
މީގެ ހަފުތާއެއް ކުރިން އެޗްޑީސީން މި ސަރަހައްދު ސާފުކުރަން ފެށީ، ކުނީގެ މައްސަލަ ބޮޑުވެ އާންމުންގެ ޝަކުވާތައް ލިބެމުން ދިޔުމާ ގުޅިގެން އެ މައްސަލަ ހައްލުކުރުމުގެ ގޮތުންނެވެ.
މި ފްލެޓުތައް ކައިރީގައި ޖަމާކޮށްފައި ހުރި ކުންޏަކީ ފިނިޝިން މަސައްކަތުގައި އުޅުނު މީހުން އެތަނަށް އަޅާފައި ހުރި ކުންޏެވެ.
މި ކުނީގެ ތެރޭގައި ގިނައީ ކޮންސްޓްރަކްޝަނު މަސައްކަތުގެ ތެރެއިން އުފެދުނު ކުންޏެވެ. އެކަމަކު މަދުން ނަމަވެސް، ކުނިވާ ޒާތުގެ އެއްޗެހި ވެސް އުކާލާފައި ހުއްޓެވެ.
ހިޔާ ސަރަހައްދު ސާފުކުރުމުގެ މަސައްކަތް ނިންމާލިކަން ހާމަކޮށް އެޗްޑީސީން ކުރި ޓުވީޓެއްގައި ބުނީ ހަފުތާއެއްގެ މަސައްކަތުން ހިޔާ ސަރަހައްދުގައި ހުރި ކުނިތައް އެއްކޮށް ނަގާ ސާފުކޮށްފައިވާ ކަމަށެވެ. އަދި ކުނި އިތުރު ވިޔަ ނުދިނުމުގެ ގޮތުން މިއަދުން ފެށިގެން ދުވާލަކު އެއް ފަހަރު އެ ސަރަހައްދުން ކުނި ނަގާނެ ކަމަށް އެ ކޯޕަރޭޝަނުން ބުންޏެވެ.
މި ސަރަހައްދު ސާފުކުރަން ފެށުމުގެ ކުރިން ފްލެޓުތަކުން އުފެދޭ ކުނި އުކާލަން ސަރަހައްދުތަކެއް ހާއްސަކޮށް އެޗްޑީސިން ވަނީ ޑަސްބިން ބަހައްޓާފަ އެވެ. އަދި ބުނީ އެތަނުގައި މަސައްކަތް ކުރާ މީހުންނާއި ދިރިއުޅޭ މީހުން ވެސް ކުނި އަޅަން ބޭނުން ކުރާނީ މި ޑަސްބިންތައް ކަމަށެވެ.
ވެމްކޯއިން މި ސަރަހައްދުގައި ކުނި އުކާލުމުގެ ހިދުމަތް ދޭން ފަށަން ދެން، އެ މަސައްކަތް ކުރާނީ އެޗްޑީސީންނެވެ.
މިހާރު ވެމްކޯއިން އަންނަނީ ފްލެޓުތަކުގެ ތިރީގައި އެ ކުންފުނިން ހިދުމަތް ދޭން ބޭނުންވާ ވޭސްޓް ކަލެކްޝަން ސެންޓަރުތައް ތައްޔާރުކުރުމުގެ މަސައްކަތް ކުރަމުންނެވެ. އެކަމަކު ސީދާ ހިދުމަތް ދޭން ފެށޭނެ ތާރީހެއް އެ ކުންފުނިން ނުބުނެ އެވެ.
