މިއަދު ކުރިއަށް ދިޔަ އެމްޑީޕީގެ ގައުމީ މަޖިލީހުގެ އިންތިހާބުގައި އެންމެ ފާހަގަކޮށްލެވޭ އެއް ކަމަކަށް ފެނިގެން ދިޔައީ, އެ ޕާޓީއަށް ނިސްބަތްވާ ރައްޔިތުންގެ މަޖިލީހުގެ ދެ މެންބަރަކު އެއް ދާއިރާއަކަށް ކުރިމަތިލެއްވުމެވެ.
ރ. އަލިފުށީ ދާއިރާގެ ރައީސް ކަމުގެ މަގާމެވެ. އެ މަގާމަށް ވާދަ ކުރައްވާފައިވަނީ އަލިފުށީ ދާއިރާގެ މަޖިލިސް މެންބަރު މުހައްމަދު ރަޝީދު (ބިގޭ) އާއި އަލިފުއްޓަށް އުފަން އިނގުރައިދޫ ދާއިރާގެ މެންބަރު ހަސަން މުހައްމަދު (ހަސަންޓޭ) އެވެ.
މީގެތެރެއިން ބިގޭއަކީ ރައީސް އިބްރާހިމް މުހައްމަދު ސޯލިހާ ގާތް މެންބަރެއްގެ ގޮތުގައި ފާހަގަ ކުރެވޭ މެންބަރެކެވެ. އަދި, އާއިލީ ގޮތުން ވެސް ރައީސް ސޯލިހާ ގުޅިފައިވާ ބޭފުޅެކެވެ. އޭނާއާ ވާދަ ކުރެއްވި ހަސަންޓޭއަކީ އެމްޑީޕީގެ ރައީސް މުހައްމަދު ނަޝީދަށް ވަރަށް ބޮޑަށް ތާއިދު ކުރައްވާ ބޭފުޅެކެވެ.
މި ދެ ބޭފުޅުން އަލިފުށީ ދާއިރާއަށް ވާދަ ކުރެއްވުމުން އެ ދާއިރާގެ އިންތިހާބު ދިޔައީ ވަރަށް ވާދަވެރިކޮށެވެ.
ދާއިރާގެ ރައީސް ކަމަށް ދެ މެންބަރުންގެ އިތުރުން, ކުރިން ނޫސްވެރިއެއްގެ ގޮތުގައި ހަރަކާތްތެރިވި މުހައްމަދު ޝަނޫން އާއި އަނގޮޅިތީމްގެ އަހުމަދު އާދަމާއި އަލިފުށީގެ އަލީ އިޔާން އާއި ހަމަ އެ ރަށު އަލީ ރަޝީދެވެ.
މީގެ ތެރެއިން އެންމެ ގިނަ ވޯޓާއެކު, އަލިފުށީ ދާއިރާގެ ރައީސް ކަމަށް އިންތިހާބުވެފައިވަނީ ބިގޭ އެވެ.
އަލިފުށި, މުހިންމު ދާއިރާއަކަށް
އަލިފުށީ ދާއިރާ, ހާއްސަކޮށް އަލިފުށީ މިހާރު ވެފައިވަނީ ސަރުކާރަށް ވެސް މުހިންމު ރަށަކަށެވެ. އެގޮތުން, މިފަހުން ރ. އަތޮޅުގައި އަޅާ ދެވަނަ އެއާޕޯޓް އެ ރަށުގައި އެޅުމަށް ނިންމައި, އެމްޓީސީސީއާ ވަނީ ހަވާލުކޮށްފަ އެވެ.
ނަމަވެސް, މިކަމާ އެ އަތޮޅު އެހެން ބައެއް ރަށްރަށުން ވަނީ ހިތްހަމަނުޖެހިފަ އެވެ. އަދި, ބައެއް މެންބަރުން އެކަން ފާޅުގައި ހާމަ ވެސް ކުރެއްވި އެވެ.
އެ މެންބަރުންނާއި ރަށްރަށުން ވެސް ތުހުމަތު ކުރާ ގޮތުގައި, އަލިފުށީގައި އެއާޕޯޓް އަޅަނީ ރައީސް ސޯލިހާއި, ބިގޭއާ ދެމެދު އޮތް ގާތް ގުޅުމުގެ ސަބަބުންނެވެ. އަދި, ގައުމީ މަޖިލީހުގެ އިންތިހާބު ކައިރިވެފައި އޮތްވައި, އެ މަޝްރޫއު އިއުލާން ކުރީ ވެސް ނުފޫޒު ފޯރުވަން ކަމަށް ތުހުމަތު ކުރެ އެވެ.
އެއާޕޯޓް އިއުލާން ކުރުމަށްފަހު, ރައީސް ސޯލިހު ވެސް ވަނީ އެ ރަށަށް ވަޑައިގެންފަ އެވެ. އެ ދަތުރުގައި ސަރުކާރުގެ ބައެއް މިނިސްޓަރުން ވެސް ވަޑައިގެންނެވި އެވެ. އަދި, ގައުމީ މަޖިލީހުގެ އިންތިހާބުގައި ބިގޭއަށް ކެމްޕެއިންކޮށް ދެއްވި އެވެ.
