މީގެ ތިން ވަރަކަށް އަހަރުކުރި އެވެ. އެމްޑީޕީގެ އެތެރޭގެ އިންތިހާބެއް ކުރިއަށް ނުގެންދެވި, އެންމެ ފަހުން ސިމެންތި ގަށާ މެޝިންތަކާއި ބަރޯތަކަށް ވެސް ވޯޓު އެޅި އެވެ. އެކަމަކު, މިއަދު އޮތީ އެ މަންޒަރެއް ނޫނެވެ.
އެމްޑީޕީގެ ބިޔަ ބޮޑު އިންތިހާބު, އޮމާންކަމާއެކު ކުރިއަށް ދަނީ އެވެ.
ރާއްޖޭގައި އޮތް އެންމެ ބޮޑު ސިޔާސީ ޕާޓީ، އެމްޑީޕީގެ އެތެރޭގެ އިންތިހާބު މިއަދު 9:00 ގައި ފެށީ ބޮޑެެތި އިންތިޒާމުތަކަކާއި އެކުގަ އެވެ. މިފަހަރުގެ އިންތިހާބު އާންމު މެންބަރުންނަށް ސިފަވެގެން ދިޔައީ، މިނިވަންކަމާއެކު ހިތްހަމަޖެހިގެން، ބިރަކާ ނުލާ ޑިމޮކްރެސީ އޭގެ އެންމެ ފުރިހަމަކަމުގައި މަސައްކަތްކުރާތަން ދައްކުވައިދޭ ފަހަރުގެ ގޮތުގަ އެވެ.
ޕާޓީގެ އޮފިޝަލުން ވެސް ދިޔައީ އަމާންކަމާއި އޮމާންކަމާއެކު އެ އިންތިހާބެއް ބާއްވަން ދުރާލައިވީ ތައްޔާރީތަކުގެ މަސައްކަތް މިއަދު ވޯޓުލާ މަރުކަޒުތަކުން ދައްކުވައިދެމުންނެވެ.
"ހަމަ ވަރަށް ރަނގަޅު، ކުރިޔާލާ އޮބްޒާވަރުން ވެސް ރަށްރަށަށް ފޮނުވައިދީ ހެދި. ދާއިރާގެ މަރުކަޒަށް ގޮސް، އައިޑީ ކާޑު ދައްކާލީމަ ވޯޓު ލެވޭނެ. އިންތިޒާމުތަކަށް ހަމަ ބުނާނީ އެއްވަނައޭ،" އޮބްޒާވަރެއްގެ ގޮތުގައި ހަރަކާތްތެރިވަމުން ދިޔަ މޫސަ ކިޔައިދިނެވެ.
އޭނާގެ ވާހަކަތަކާއި، ސޯޝަލް ސެންޓަރުގެ ތެރޭގައި ވޯޓުލާން ގޮސް ތިބި މެމްބަރުންނާއި ކެންޑިޑޭޓުންގެ ބަސްތަކާ ވެސް މާ ބޮޑު ތަފާތެއް ނެތެވެ. އިންތިހާބުގެ އިންތިޒާމުތަކަށް އޮތީ ތައުރީފުގެ ބަސްތަކެވެ.
މާލޭގައި އުޅޭ ރާއްޖޭގެ އެންމެ އުތުރުގެ ރަށްތަކަށް ހާއްސަ އެއް ސެންޓަރުކަމުގައިވާ ސޯޝަލް ސެންޓަރުގެ ތެރޭގައި މެންދުރަށް އަޅާލިއިރު، އިންތިހާބުގެ ފޯރި އަދި ކިރިޔާ ވައިގަ ހިފަން ފެށީ އެވެ. އިންތިޒާމުތައް ހުރީ ތައްޔާރަށެވެ. ފޯރި އިތުރުވަމުންދާ ވަރަކަށް އެ ފޯރިއާ އެއްވަރަށް އޮފިޝަލުން ވެސް ތިބީ ތައްޔާރަށެވެ.
މަރުކަޒުގެ ތެރޭގައި ވޯޓުލާ ތަން ބަލަން ހުރި ކެންޑިޑޭޓެއް ބުނީ، ކޮވިޑުގެ ހާލަތް އޮތްކަން ވެސް އިންތިޒާމު ކުރި ފަރާތްތަކުގެ ވިސްނުމުގައި ހުރި ކަމަށެވެ. ކެންޑިޑޭޓަކަށްވުމުން ނަން ނުޖަހަން އެދުނު އެ މީހާ ބުނި ގޮތުގައި ކޮވިޑަށްޓަކައި ވެސް ވެވެން ހުރި ތައްޔާރީތައް ޕާޓީންވި ކަމަށެވެ.
"ކޮވިޑުގެ ހާލަތުގައި އިންތިޒާމުތައް ވަރަށް ރަނގަޅު ހަމަ. ގައިދުރުކުރުމާ، މާސްކު އެޅުމާއި ސެނިޓައިޒްކުރުންތާ ދެން ކުރާނީ، އަނެއްހެން ވަރަށް އެމްޑީޕީ އިންތިހާބަކަށް ވާނެ ކަމަށް މި އުންމީދު ކުރަނީ،" އެ ކެންޑިޑޭޓް ބުންޏެވެ.
އެމްޑީޕީގެ އެތެރޭގެ އިންތިހާބުގައި މީހަކު ވޯޓުލަނީ
ޖުމްލަ 97 ދާއިރާއަކުން 730 ކެންޑިޑޭޓުން ވާދަކުރާ އެ އިންތިހާބުގައި، ބައެއް މަރުކަަޒުތައް މަޑު މަޑުން ދިރެމުން ދިޔައިރު އަނެއްބައި މަރުކަޒުތަކުގައި ފޯރީގެ ހުޅު އޮތީ ރޯވެފަ އެވެ.
ސޯޝަލް ސެންޓަރަށް މަޑު މަޑުން ދިޔައީ އިންތިހާބުގެ ފޯރި އަންނަމުންދިޔަ އިރު، ހިރިޔާ ސްކޫލާއި ގަލޮޅު މަދަރުސާގައި އިންތިހާބުގެ ފޯރި އޮތީ މެކުހުގަ އެވެ. އެތަންތަނުގެ ދޮރު މައްޗަށް އަންނަމުން ދިޔަ ޕްރައިވެޓް ކާރާއި ޓެކްސީތައް އަދި ސައިކަލްތައް ދިޔައީ މަޑުމަޑުން އިތުރުވަމުންނެވެ. ބައެއް މީހުން ދަރި ކިހިލި ޖަހައިގެން ވެސް ވޯޓު ލާން ދިޔައީ ވަންނަމުންނެވެ.
އެމްޑީޕީގައި ގިނަ ދުވަސްވީ މެމްބަރެއް ކިޔައިދިން ގޮތުގައި އިންތިޒާމުތަކުގައި އޭނާއަށް ޖެހުނީ އެންމެ މައްސަލައެކެވެ. އެއީ އުމުރުން ދުވަސްވީ އެމްޑީޕީ މެމްބަރުންނަށް ދާންވީ ތަން އަދި ކިޔައިދޭނެ އޮފިޝަލެއް ނެތުމެވެ.
"ވަރަށް ދުވަސްވެއްޖެ އެމްޑީޕީގައި. އަވަހަށް ވޯޓު ލާން މި އައީ. އެކަމަކު މީ ބޮޑު ތަނެއްވީމަ ނޭނގުނު ފުރަތަމަ ވަންނަންވީ ކޮންތާކަށް ކަމެއް،" ސޯޝަލް ސެންޓަރުގައި ބަހައްޓާފައި ހުރި ވޯޓު ފޮއްޓަކަށް ވޯޓު ލާން އައި މީހެއްގެ ބަސް ހުރީ މިގޮތަށެވެ.
ސޯޝަލް ސެންޓަރާއި ޖެހިގެން ހުރި ހިރިޔާ ސްކޫލުގައި ވޯޓުލަމުން ދިޔައީ ވާދަވެރިކަން ބޮޑުވެފަ އޮތް މާލެ ދާއިރާއަކަށެވެ. ކިއު ކުޑަ ފޮއްޓެއް ނެތް އިރު އޭރުވެސް ބައެއް ކެންޑިޑޭޓުން އެތަނުގެ ތެރޭގައި ހަރަކާތްތެރިވަމުން ދިޔައީ އިތުރަށް މީހުން ވޯޓަށް ނެރޭށެވެ.
ކާރު ފޮނުވައިގެން ވެސް މީހުން ވޯޓު ލާން ނެރެވޭތޯ ބަަލަމުން ދިޔަ އެއް ކެންޑިޑޭޓެއްގެ ފަރާތުން އިންތިޒާމުތަކަށް ހިތްހަމަނުޖެހުން އޮތީ މީހުން އަންނަ ވަރަކަށް އޮފިޝަލުން އެ ސެންޓަރުގައި ނެތް މައްސަލައިގަ އެވެ. އެ ކަންބޮޑުވުންތައް އެތަނުގައި ހުރި އެހެން ކެންޑިޑޭޓެއް ކަމުގައިވާ އިޔަޑޭ ވެސް ފާހަގަކުރި އެވެ.
"އެއީ މައްސަލައެއްނު. މިހާރު މޮޅެތި ފޮޓޯ ދައްކާފަ ތިން މީހުން ތިބެނީ. އެއީ މައްސަލައެއްނު އެންމެ މީހެއް އިނީމަ، އެޓްލީސްޓް ދެ މީހުން ތިބެން ޖެހޭނެ. އެއީ ހަމައެކަނި މައްސަލައަކީ، އެނޫންނަމަ އެއްވެސް މައްސަލައެއް ނެތް." އެ ކެންޑިޑޭޓް ބުންޏެވެ.
އެހެންނަމަވެސް ކެންޑިޑޭޓުންގެ މި ކަންބޮޑުވުންތައް ވޯޓުލާންދިޔަ މީހުންނަށް އިހުސާސެއް ނުވެ އެވެ. އެމްޑީޕީ މެމްބަރެއްގެ ގޮތުގައި މިހާރު ހަތް ވަރަކަށް އަހަރުވެފައިވާ ޝިނާން އަބްދުاللهގެ ފަރާތުން އިންތިހާބުގެ އިންތިޒާމުތަކަށް މާ ބޮޑު ޝަކުވާއެއް ނެތެވެ.
"މިކޮޅުގަ ވަރަށް ސަޅި، އަނެއްހެން ވޯޓު ލައި ނިންމާލާފަ މިއިނީ މިތާ މަޑުކޮށްލައިގެން. ވަރަށް އޮމާންކޮށް ދަނީ،" ޝިނާން ބުންޏެވެ.
ވޯޓުލާ މަރުކަޒެއް
ހިރިޔާ އާއި ސޯޝަލް ސެންޓަރު ފަދަ މަރުކަޒުތަކުގައި ވޯޓުލުން އޮމާންކަމާއެކު ދިޔަ ނަމަވެސް، ގަލޮޅު މަދަރުސާގައި މަންޒަރު ކޮންމެވެސް ވަރަކަށް ތަފާތެވެ. މީހުން ގިނަވެފައި އޮތް އެ މަރުކަޒުގައި، އިންތިހާބުގެ ފޯރި ގަދަ ނަމަވެސް, ޖާގައިގެ ދަތިކަން ހުރުމުން ކޮންމެ އޮފިޝަލަކު ވެސް އެ ޝަކުވާކުރި އެވެ.
"އެވީ ގޮތަކީ އެންމެ ފުރަަތަމަ މަސައްކަތްކުރީ އިއްޒުއްދީން ސްކޫލުގައި ބާއްވަން. ދެން މީހުން ގިނަ ވާނެތީ އެއީ. އެކަމަކު އޭގެ ފަހުން އެނގުނީ އެތަނުގައި ކޮލެޖެއްގެ ގްރެޖުއޭޝަނަކަށް ތައްޔާރީތައް ވަމުންދާކަން. ދެން ފަހު ވަގުތު އެންމެ ކައިރިން ލިބެން އޮތީ މިތަން،" އެތަނުގައި އޮބްޒާވަރެއްގެ ގޮތުގައި ހަރަކާތްތެރިވަމުން ދިޔަ އައިންތު ބުންޏެވެ.
މިއަދު ހަވީރަށް ނިންމާލަން އޮތް އެ އިންތިހާބުގައި މިހާރު އެމްޑީޕީގެ ދެބައިކުޅަ އެއްބައި މީހުން ވޯޓު ލައި ނިންމާލިއިރު، އެއްވެސް ކަހަލަ މައްސަލަތަކެއް ފެންމަތިވިކަމުގެ ރިޕޯޓްތަކެއް އަދި ނުލިބެ އެވެ. ބޮޑު ބިޔަ އިންތިހާބެއް މި ބާއްވަނީ ސިޔާސީ ޕާޓީއަކުން އަމިއްލައަށް ކަން ނޭނގޭހާ ފުރިހަމަ އިމްތިޒާމުތަކަކާއެކުގަ އެވެ.
