ބޯކޮށް ވާރޭ ވެހޭ ގަޑީގައި ހިޔާ ފްލެޓުގެ ބައެއް އެޕާޓްމަންޓުތަކުގެ ތެރެއަށް ފެން ވަންނަ ސަބަބު ދެނެގަތުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފަށައިފި އެވެ.
ސޯޝަލް މީޑިއާގައި ދައުރުވަމުންދާ އެއް ވީޑިއޯގައި، އެއްކޮށް ލައްޕާފައި ހުރި ކުޑަދޮރަކުން އެޕާޓްމަންޓެއްގެ ތެރެއަށް ބޯކޮށް ފެން ވަންނަ މަންޒަރު ފެނެ އެވެ. އަދި އެހެން ވީޑިއޯއެއްގައި ލައްޕާފައި ހުރި ބެލްކަނީ ދޮރުތަކާ ދިމާލުން ފެން ވަންނަ މަންޒަރު ފެނެ އެވެ.
ފްލެޓުތަކަށް ފެން ވަންނަ ކަމުގެ ޝަކުވާތަކާ ގުޅިގެން މިއަދު އެޗްޑީސީގެ މެނޭޖިން ޑިރެކްޓަރު ސުހައިލު އަހުމަދާއި، ކުންފުނީގެ އިސްވެރިން ވަނީ އެ އެޕާޓްމަންޓްތަކަށް ވަޑައިގެން އިންސްޕެކްޓްކުރައްވައިފަ އެވެ. އަދި ފެން ވަންނަން ދިމާވީ ކީއްވެގެންތޯ އާއި އެކަން ހުއްޓުވާނެ ގޮތެއް ދެނެގަތުމަށް ޓެކްނިކަލް ޓީމުތަކުން ވަނީ އެސެސްމަންޓުތައް ހަދަން ފަށައިފަ އެވެ.
މިކަމާއި ގުޅިގެން ސުހައިލް "އަދަދު" އަށް ވިދާޅުވީ ޓެކްނިކަލް އެސެސްމަންޓަށް ފަހު އެކަމާ ގުޅިގެން އެޗްޑީސީން އަޅާނެ ފިޔަވަޅުތައް ވެސް ހިއްސާކުރައްވާނެ ކަމަށެވެ.
މި މައްސަލަ ދިމާވީ ޑިޒައިން ފޯލްޓަކާ ގުޅިގެންތޯ ސުވާލުކުރުމުން ސުހައިލު ވިދާޅުވީ އެގޮތަށް ވެސް ނިންމޭނީ ޓެކްނިކަލް ބޭފުޅުންގެ މަސައްކަތް ނިމުމުން ކަމަށެވެ. އެކަމަކު މީގެ ކުރިން އެފަދަ ކަމެއް ފާހަގަކުރެވިފައި ނުވާ ކަމަށް އޭނާ ވިދާޅުވި އެވެ.
"މިއަދު އާދަޔާ ހިލާފަށް ވައި ގަދަވީމާ އެކަން މި ފާހަގަކުރެވުނީ. ކުރިން ފާހަގަކުރެވިފައެއް ނެތް. އަޅުގަނޑުމެންގެ ޓެކްނިކަލް ޓީމުން ބަލަމުން އެބަ ގެންދޭ" ސުހައިލު ވިދާޅުވި އެވެ.
މިހާރު ހިޔާ ފްލެޓުތަކުގައި ބާރު ސްޕީޑުގައި ފިނިޝިން މަސައްކަތް ކުރަމުން އަންނަ އިރު، ބައެއް އާއިލާތަކުން ވަނީ ދިރިއުޅެން ވެސް ފަށާފަ އެވެ. އެކަމަކު ސެކުއިރިޓީ އާއި ބައެއް އިންތިޒާމުތަކާ ގުޅޭ ޝަކުވާތައް އެބަހުއްޓެވެ.
