ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ދާއިރާތަކުގެ އިންތިހާބުގައި ވޯޓް ލެވޭ މީހުންގެ ދާއިމީ ލިސްޓް އެ ޕާޓީން މިއަދު އާންމު ކޮށްފި އެވެ.
މިމަހުގެ 25 ވަނަ ދުވަހު ބާއްވާ އެ އިންތިހާބުފައި ވޯޓުލެވޭ މީހުންގެ ލިސްޓު އާންމުކޮށްފައިވާއިރު އެ ލިސްޓުގައި ނުހިމެނޭ މީހުންނަށް ވޯޓް ނުލެވޭނެ ކަމަށް އެ ޕާޓީން ބުނެ އެވެ. އެ ލިސްޓްގައި ނަން ލިޔެފައިވެތޯ ބެލުމަށް މޯބައިލް ފޯނުން މެސެޖެއް ކުރުމުން ބެލޭނެ އިންތިޒާމް ޕާޓީން ވަނީ ހަމަޖައްސައިފަ އެވެ. މެސެޖު ފޮނުވާނީ MDP(space)IDnumber ޖެހުމަށްފަހު 637 އަށެވެ.
އޭގެ އިތުރުން، ދާއިރާތަކުގެ އިންތިހާބުގައި ވޯޓުލެވޭ މީހުންގެ ލިސްޓު އެމްޑީޕީގެ ވެބްސައިޓުގައި ޕަބްލިޝްކޮށްފައިވާނެ ކަމަށް ވެސް އެ ޕާޓީން މައުލޫމާތުދެ އެވެ. އެ ލިސްޓަށް ޝަކުވާ ހުށަހެޅުމުގެ މުއްދަތު ހޯމަ ދުވަހުގެ 12:00 އާ ހަމައަށް ވަނީ ފުރުސަތު ހުޅުވާލައިފަ އެވެ.
އެ އިންތިހާބުގައި އެކި ދާއިރާތަކާއި މަގާމުތަކަށް 730 ކެނޑިޑޭޓުން ވާދަކުރެ އެވެ. ދާއިރާތަކަށް ހޮވޭ ކެންޑިޑޭޓުން ހިމެނޭނީ އެމްޑީޕީގެ އެންމެ ބާރުގަދަ ގުނަވަން ކަމަށްވާ ގައުމީ މަޖިލީހުގަ އެވެ. އެ މަޖިލީހުގައި 142 މެމްބަރުން ހިމެނެ އެވެ.
އެ އިންތިހާބު ބާއްވަން ކުރިން ހަމަޖައްސާފައި އޮތީ މެއި 29، ގަ އެވެ. ނަމަވެސް ޕާޓީގެ ރައީސް މުހަައްމަދު ނަޝީދު އަވަހާރަކޮށްލަން މެއި 6، ގައި ދިން ބޮމުގެ ހަމަލާއަށްފަހު އެމަނިކުފާނު ޒަހަމްވެވަޑައިގަތުމުން އިންތިހާބު ފަސް ކުރީ އެވެ.
ދާއިރާތަކުގެ އިންތިހާބު ބޭއްވުމަށް އެމްޑީޕީން މިހާރު ވަނީ ނުވަ މެމްބަރުންގެ ކޮމިޓީއެއް އެކުލަވާލާފަ އެވެ. އެ މެންބަރުންގެ ތެރޭގައި ޕްލޭނިން މިނިސްޓަރު މުހައްމަދު އަސްލަމް، ހެލްތް މިނިސްޓަރު އަހްމަދު ނަސީމް އަދި އެޑިޔުކޭޝަން މިނިސްޓަރި ޑރ. އައިޝަތު އަލީ ހިމެނެ އެވެ. އިންތިހާބު ކުރިއަށް ގެންދާނީ އެ ކޮމެޓީންނެވެ.
އެމްޑީޕީއަކީ ރާއްޖޭގައި އެންމެ ބޮޑު ސިޔާސީ ޕާޓީ އެވެ. އެޕާޓީގެ ދަފްތަރުގައި 93،354 މެމްބަރުން އެބަތިއްބެވެ. މި އިންތިހާބަކީ އެމްޑީޕީގެ އެތެރޭގައި ބޭއްވޭ އެންމެ ބޮޑު އިންތިހާބަށްވާއިރު، އިންތިހާބުގައި 300 ވޯޓު ފޮށި އެކި ދައިރާތަކުގައި ބަހައްޓަ އެވެ.
މި އިންތިހާބުގައި 900 އެއްހާ އޮފިޝަލުން ހަރަކާތްތެރިވާނެކަމަށާއި އޮފިޝަލުން ހޯދުމުގެ މަސައްކަތް ވެސް ވަރަށް އަވަހަށް ކުރެވޭނެކަމަށް އެ ޕާޓީން ބުނެ އެވެ.
