ޓްރިޕޮލީ، ލީބިޔާ (ސެޕްޓެމްބަރު 6) - ލީބިޔާގެ ކުރީގެ ލީޑަރު މުއައްމަރު ގައްޒާފީގެ ދަރިކަލުން ސާދީ ގައްޒާފީ ޖަލުން މިނިވަންކޮށްފި އެވެ.
ލީބިޔާގެ ޖަސްޓިސް މިނިސްޓްރީގެ އޮފިޝަލަކު އޭއެފްޕީ އަށް ބުނީ މީގެ އަހަރުތަކެއް ކުރިން ކޯޓުން ނިންމި ނިންމުމަކާ ގުޅިގެން ސާދީ މުއައްމަރް ގައްޒާފީ ޖަލުން މިނިވަންކޮށްފައިވާ ކަމަށެވެ.
ބައެއް ރިޕޯޓުތައް ބުނާ ގޮތުން އޭނާ ވަނީ ތުރުކީ އަށް ފުރާވަޑައިގެންފަ އެވެ. ނަމަވެސް ލީބިޔާގެ އެއްވެސް އިދާރާއަކުން އެކަން ކަށަވަރުކޮށްދީފައެއް ނުވެ އެވެ.
މިހާރު އުމުރުން 47 އަހަރުގެ ސާދީ ވަނީ 2011 ވަނަ އަހަރު ލީބިޔާގައި އިންގިލާބު ހިންގަން ފެށުމުން ނައިޖާ އަށް ވަޑައިގެންފަ އެވެ. ނަމަވެސް ފަހުން 2014 ވަނަ އަހަރު ނައިޖާގެ ކަމާ ބެހޭ ފަރާތްތަކުން ލީބިޔާ ފުލުހުންނާ އޭނާ ހަވާލުކުރި އެވެ.
އިޓަލީގައި ކުރިން ޕްރޮފެޝަނަލް ފުޓްބޯޅަ ކުޅުނު ސާދީގެ މައްޗަށް ތުހުމަތު ކުރެވުނީ މުޒާހަރާ ކުރި ބަޔަކާ ދެކޮޅަށް ލާއިންސާނީ އަމަލު ހިންގި ކަމަށާއި 2005 ވަނަ އަހަރު ލީބިޔާގެ ފުޓްބޯޅަ ކޯޗު ބަޝީރު އަލް ރަޔާނީ މަރާލި ކަމަށެވެ.
ނަމަވެސް އޭޕްރިލް 2018 ގައި އިސްތިއުނާފު ކޯޓުން ނިންމީ ރަޔާނީގެ މަރުގައި ސާދީގެ ބައިވެރިވުމެއް ނެތް ކަމަށެވެ. ސާދީއަކީ ގައްޒާފީގެ ތިން ވަނަ ފިރިހެން ދަރިކަލުންނެވެ.
ގައްޒާފީ އަވަހާރަކޮށްލި އިންގިލާބަށް ފަހު ލީބިޔާގައި އަދިވެސް ހަމަޖެހުމެއް ނެތެވެ. ވެރިކަމުގެ ބާރުތައް ހޯދަން ހަތިޔާރު އެޅި ގްރޫޕުތަކުން މިހާރު ދަނީ މަސައްކަތް ކުރަމުންނެވެ.
މިދިޔަ އަހަރު ހަމަލާ ބަދަލު ކުރުން ހުއްޓާލަން އެއްބަސްވުމާ އެކު މި އަހަރުގެ މާޗް މަހު އިންތިގާލީ ސަރުކާރެއް ވަނީ ގާއިމްކޮށްފަ އެވެ. އަންނަ ޑިސެމްބަރު މަހު އާއްމު އިންތިހާބު އޮންނާނެ އެވެ.
