ރައްޔިތުންގެ މަޖިލީހުގެ މެމްބަރު މީކާއިލް ނަސީމްގެ މަންމަ މަރިޔަމް ޒުބައިރު (މަންދީ) އަށް އެމްޑީޕީ އޮފީހުގެ ތެރޭގައި ހަމަލާދީ ބޯ ފަޅާލި މައްސަލާގައި މީހަކު ހައްޔަރުކޮށްފި އެވެ.
ހައްޔަރު ކޮށްފައި ވަނީ އެމްޑީޕީ އޮފީހުގައި މަސައްކަތް ކުރާ އަހުމަދު ޖަޒީލް، 39، އެވެ. ޗޭނުގަނޑަކުން ޖަހައި މަންދީގެ ބޯ ފަޅާލުމުގެ އިތުރުން އޮފީހުގެ ބައެއް އެހެން މީހުންނަށް ހަމަލާދިން ކަމަށް އެއްބަސްވެ އޭނާ ވަނީ ބައެއް މީޑިޔާތަކަށް އިންޓަވިއު ދީފަ އެވެ.
ބައެއް މީޑިއާތަކުން ރިޕޯޓްކޮށްފައިވާ ގޮތުގައި ޖަޒީލްއަކީ ނަފްސާނީ ބައެއް މައްސަލަތައް ހުންނަ މީހެކެވެ. އެ ވާހަކަ އެމްޑީޕީ އޮފީހުގައި މަސައްކަތް ކުރާ ބައެއް މީހުން ބުނެފައިވެ އެވެ. އަދި އޭނާއަށް ހައްޔަރު ކުރުމުގެ ބަދަލުގައި ދޭންޖެހޭނީ އެހީތެރިކަން ކަމަށް ޒަހަމްވި މަންދީ ވެސް ބުނެފައިވެ އެވެ.
"އަޅުގަނޑު ނޭދެން ޖަޒީލް ގެންގޮސް ގޮޅިއަކަށްލާ އެތައްދުވަހެއްވަންދެން ބޭއްވުމަށްފަހު ޖަލު ގޮަޅިއަކަށް ހުކުމް ކުރާކަށް. އޭނައަށް ފަރުވާބޭނުންވޭ. މިކަހަލަ ކުއްޖެއްނެތް އާއިލާއެއް މަދުވާނެ. މިކުދިންގެ މައިންބަފައިންނާ އާއިލާތަކުން ސަފަރ ކުރާވަރު އަޅުގަނޑަށްފެނޭ," ޓުވިޓާގައި މަންދީ ލިޔެފައިވެ އެވެ.
އެ މައްސަލައިގައި ވާހަކަ ދައްކަވަމުން މީކާއީލް ބުނެފައި ވަނީ އެއީ ވަކި މީހަކަށް ބަލައިގެން ދިން ހަމަލާއެއް ނޫން ކަމަށާއި އެއީ އެކަންކޮށްފައި ޖަޒީލް މަސްތުހެ ހާލުގައި ހުރެގެން ކަމަށެވެ.
"މި ހަމަލާއަކީ އޭނާ (މަންމަ) އަށް އަމާޒުކޮށްދިން ހަމަލާއެއް ނޫން އަދި މި ހަމަލާއާ ސިޔާސީ ކަމަކާ އެއްވެސް ގުޅުމެއް ނެތް،" އޭނާ ބުނެފައިވެ އެވެ.
މަންދީ އަކީ ކުރީއްސުރެ އެ ޕާޓީގެ ހަރަކާތްތަކުގެ ކުރީ ސަފުން ފެންނަ މީހެކެވެ. ހާއްސަކޮށް އެމްޑީޕީގެ ވެރިކަން 2012 ވަނަ އަހަރު ވައްޓާލުމުން އެ ޕާޓީގެ އަންހެނުންގެ ރޫހުން ކުރިއަށް ގެންދިޔަ މުޒާހަރާތަކުގައި މަންދީ ފެނުނީ ވަރަށް ހަރަކާތްތެރިކޮށެވެ. ނަޝީދު ޖަލަށް ލުމުން އެމަނިކުފާނު ދޫކޮށްލަން ގޮވާލައި ކުރި މަޝްހޫރު އެއާޕޯޓް މުޒާހަރާގައި ބައިވެރިވެ މަންދީގެ މައްޗަށް ސަސްޕެންޑެޑް ޖަލު ހުކުމެއް އިއްވާފައިވެ އެވެ.
