އެމްޑީޕީގެ ވަރުގަދަ ހަރަކާތްތެރިޔާ އަދި އެ ޕާޓީގެ އިދާރީ ހިންގުންތެރިޔާ މަރިޔަމް ޒުބައިރު (މަންދީ) އަށް މިއަދު ޕާޓީ އޮފީސް ތެރެއިން މީހަކު ދިން ހަމަލާއަކީ ސިޔާސީ ކަމެއް ނޫން ކަމަށާއި އަދި އެއީ އޭނާ އަށް އަމާޒުކޮށް ދިން ހަމަލާއެއް ނޫން ކަމަށް އޭނާގެ ދަރިފުޅު ގަލޮޅު ދެކުނު ދާއިރާގެ މަޖިލިސް މެމްބަރު މީކާއީލް ނަސީމް ވިދާޅުވެއްޖެ އެވެ.
އެ ހަމަލާގައި، ޗޭނުގަނޑަކުން ޖަހައި މަންދީގެ ބޯ ފަޅާލީ ޕާޓީ އޮފީހުގެ މުވައްޒަފެކެވެ. އަދި ހަމަލާ ދިނީ އިދާރީ ނިންމުމަކާ ހިތްހަމަނުޖެހިގެން ކަމަށް އެނގިފައިވެ އެވެ. ތަފްސީލް ހޯދުމަށް އެމްޑީޕީ އަށް ގުޅުމުން ބުނީ ނޫސް ބަޔާނެއް ނެރޭނެ ކަމަށެވެ. އެ މައްސަލަ ފުލުހުން އަންނަނީ ތަހުގީގުކުރަމުންނެވެ.
އެމްޑީޕީ އޮފީސް ކައިރީގައި ހުންނަ އޭޑީކޭ ހޮސްޕިޓަލަށް މަންދީ ދިޔައީ ޕާޓީގެ ދެ މުވައްޒަފުންގެ އެހީގައި ހިނގާލަފަ އެވެ. އޭނާގެ ހާލު މިހާރު ރަނގަޅެވެ.
މި ހަމަލާއާ، އެމްޑީޕީގައި މިހާރު އުފެދިފައިވާ ދެ ފެކްޝަނުގެ ހިޔާލު ތަފާތުވުންތަކާ ގުޅުވައި ޓްވިޓާގައި އަންނަނީ އަޑުފަތުރަމުންނެވެ. އެ ވާހަކަތައް ދޮގުކުރައްވައި މީކާއީލް ކުރެއްވި ޓްވީޓެއްގައި ވިދާޅުވީ މިއީ ވަކި މީހަކަށް އަމާޒުނުވާ ގޮތަށް، މަސްތުގެ ހާލަތުގައި ހުރި މީހަކު ހިންގި އަމަލެއް ކަމަށެވެ.
"މި ހަމަލާއަކީ އޭނާ (މަންމަ) އަށް އަމާޒުކޮށްދިން ހަމަލާއެއް ނޫން އަދި މި ހަމަލާއާ ސިޔާސީ ކަމަކާ އެއްވެސް ގުޅުމެއް ނެތް،" މީކާއީލް ވިދާޅުވި އެވެ.
މަންދީ (މ) މިއަދު ހޮސްޕިޓަލަށް ގެންދަނީ. --ފޮޓޯ: ހުސެއިން ޝަޔާހު/ އަދަދު
އެމްޑީޕީގެ ރައީސް އަދި ކުރީގެ ރައީސުލްޖުމްހޫރިއްޔާ މުހައްމަދު ނަޝީދު ކުރެއްވި ޓްވީޓެއްގައި ވިދާޅުވީ އެ ޕާޓީގެ އޮފީހުގައި މާރާމާރީ ހިންގުން ބަލައިނުގަނެވޭނެ ކަމަށެވެ.
"އެކަންކުރި މީހުން ހައްޔަރުކޮށް އަނިޔާ އާއި ގެއްލުންވި ފަރާތްތަކަށް އިންސާފު ލިބެން ޖެހޭނެ،" ނަޝީދު ޓްވީޓްކުރެއްވި އެވެ.
މަންދީ އަކީ ފެށުނީއްސުރެ އެ ޕާޓީގެ ހަރަކާތްތަކުގެ ކުރީ ސަފުން ފެންނަ މީހެކެވެ. ހާއްސަކޮށް އެމްޑީޕީގެ ވެރިކަން 2012 ވަނަ އަހަރު ވައްޓާލުމުން އެ ޕާޓީގެ އަންހެނުންގެ ރޫހުން ކުރިއަށް ގެންދިޔަ މުޒާހަރާތަކުގައި މަންދީ ފެނުނީ ވަރަށް ހަރަކާތްތެރިކޮށެވެ. ނަޝީދު ޖަލަށް ލުމުން އެމަނިކުފާނު ދޫކޮށްލަން ގޮވާލައި ކުރި މަޝްހޫރު އެއާޕޯޓް މުޒާހަރާގައި ބައިވެރިވެ މަންދީގެ މައްޗަށް ސަސްޕެންޑެޑް ޖަލު ހުކުމެއް އިއްވާފައިވެ އެވެ.
