ނ. އަތޮޅުން ރިސޯޓް ހަދަން ބޮޑެތި ކުންފުނިތަކަށް ރަށްތައް ވިއްކާލާފައިވާ ގޮތާއި އަގުގެ ތަފްސީލު ހޯދުމަށް އެ އަތޮޅު ކައުންސިލުން އިންތިގާލީ އިންސާފުގެ އޮފީހަށް މައްސަލަ ހުށަހެޅުމަށް ނިންމައިފި އެވެ.
އަލަށް އުފައްދާފައިވާ އިންތިގާލީ އިންސާފުގެ އޮފީހުން ބަލަނީ 1 ޖެނުއަރީ 1953 ން ފެށިގެން 17 ނޮވެމްބަރު 2018 އާ ހަމައަށް ނިޒާމީ ސިފައެއްގައި ރާވައިގެން ހިންގާފައިވާ އިންސާނީ ހައްގުތަކާއި އަސާސީ މިނިވަންކަމާ ހިލާފު އަމަލުތަކާ ގުޅޭ މައްސަލަތަކެވެ.
އިންތިގާލީ އިންސާފުގެ ގާނޫނުގައި ބުނެފައިވާ ގޮތުން ނިޒާމީ ގޮތުން ރާވައިގެން އިންސާނީ ހައްގުތައް ގެއްލުވާލާފައިވާ މައްސަލަތައް "ދެނެގަނެ، އެކަމުގައި ޒިންމާވާ ދައުލަތުގެ މުއައްސަސާތަކާއި އެކަންކުރި ފަރާތްތަކުގެ މައްސަލަތައް ބަލައި، ހަގީގަތާ ހަމައަށް ވާސިލުވުމަކީ" އެ އޮފީހުގެ ޒިންމާއެކެވެ.
އޮފީހަށް މައްސަލަ ހެށުހެޅުމުގެ ފުރުސަތު ހުޅުވާލާފައިވާއިރު، އެންމެ ފަހުން ބޭއްވި ނ. އަތޮޅު ކައުންސިލްގެ ބައްދަލުވުމުގައި އިންތިގާލީ އިންސާފުގެ އޮފީހަށް މައްސަލަ ހުށަހަޅަން ނިންމައި، އެކަން ވަނީ ފާސްކޮށްފަ އެވެ.
އެކަމާ ގުޅޭ ގޮތުން ތަފްސީލް ދެއްވަމުން ނ. އަތޮޅުގެ ރައީސް މުހައްމަދު ބަޝީރު (ބައްޓޭ) ވިދާޅުވި ގޮތުގައި، ނ. އަތޮޅުން ދިގު މުއްދަތަކަށް ވިއްކާލާފައިވާ ރަށްތަކުގެ މުއާމަލާތްތައް ހިނގާފައިވާ ގޮތް ރައްޔިތުންނަށް ސާފެއް ނޫނެވެ. ނަމަވެސް، އެއީ ރައްޔިތުންނަށް އެނގެން ޖެހޭނެ މައުލޫމާތުތަކެއް ކަމަށެވެ.
"އިންތިގާލީ އިންސާފުގެ އޮފީހަށް މި ހުށަހަޅައިގެން ނެރެން ބޭނުންވާ ނަތީޖާއަކީ އެ ރަށްތައް ވިއްކާލި އަގު އެނގުން، ވިއްކާލުމުގެ މުއާމަލާތްތައް ހިންގީ ގާނޫނާއި ގަވައިދުތަކާ އެއްގޮތަށްތޯ ކަށަވަރުކުރުން، އެތަނުން ލިބޭ އާމްދަނީގެ މިންވަރު ހޯދުން،" ބަޝީރު "އަދަދު"އަށް ވިދާޅުވި އެވެ.
އޭގެއިތުރުން، އެ ރަށްތަކުގައި ތިމާވެއްޓަށް ގެއްލުންވާ ގޮތަށް ދީފައިވާ ހުއްދަތައް ބެލުމަކީ ވެސް އިންތިގާލީ އިންސާފަށް މައްސަލަ ހުށަހެޅުމުގެ އެއް ބޭނުން ކަމަށް ބަޝީރު ވިދާޅުވި އެވެ.
ރިސޯޓަށް ދޫކޮށްފައިވާ ބައެއް ރަށްރަށުގައި ހުރި ކަނޑޫފާތައް މިހާރު ވެސް ހިއްކައި، ބަންދުކޮށްފައިވާ ކަމަށް ބަޝީރު ފާހަގަ ކުރެއްވި އެވެ.
ނ. އަތޮޅުގައި މި ވަގުތު މަޝްހޫރު ހަތް ރިސޯޓެއް ހިންގަމުންދެ އެވެ. މިއީ ޖުމްލަ 350 ހެކްޓަރުގެ ބިމެވެ. މި ރިސޯޓްތަކުގެ ތެރޭ ސޮނެވާޖާނީ، ދަ ސަން ސިޔާމް އިރުފުށި ރިސޯޓް އަދި ވެލާ އައިލެންޑް ފަދަ ހައި ކްލާސް ރިސޯޓްތައް ވެސް ހިމެނެ އެވެ.
އޭގެއިތުރުން ނ. އަތޮޅުގެ އެހެން 12 ރަށެއްގައި ރިސޯޓް ހެދުމުގެ މަސައްކަތް، ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުން ފެށިގެން ކުރިއަށްދެ އެވެ.
"އަޅުގަނޑުމެން އެ ރަށްތަކާ ގުޅޭ މައްސަލަ މި ހުށަހަޅަނީ ކޮންމެހެން ބަދަލެއް ހޯދާކަށް ނޫން، އެކަމަކު އިންސާފުން ބޭރުން ކަމެއް ކޮށްފައިވާނަމަ، އެކަމެއް ބެލުމުގެ ޒިންމާ އިންތިގާލީ އިންސާފުގެ އޮފީހަށް އޮތީމަ އޭގެ ދަށުން މައްސަލަ މި ހުށަހަޅަނީ،" ބަޝީރު ފާހަގަ ކުރެއްވި އެވެ.
ސަން ސިޔާމް އިރުފުށި ރިސޯޓް
ބަޝީރު ފާހަގަ ކުރެއްވި ގޮތުގައި، އެ ރިސޯޓްތަކުން ލިބޭ އާމްދަނީ ހޯދައި، އެކަން ބެލުމަކީ ނ. އަތޮޅުގެ ތަރައްގީގެ ޕްލޭނުގައި ހިމަނާފައިވާ ކަމެކެވެ. އެ ޕްލޭނުގައި ދެން ބާކީ ހުރި ފަޅު ރަށްރަތަކުން ވެސް ރައްޔިތުންނަށް ފައިދާވާނެ ގޮތްތައް ހެދުމަށް ހިމަނާފައިވާނެ ކަމަށް އޭނާ ވިދާޅުވި އެވެ.
ދަނޑުވެރިކަމަށް މިހާރު ވެސް ބައެއް ފަޅު ރަށްތައް މީހުންނަށް ދޫކޮށްފައިވާއިރު، އެއީ ބަޝީރު ފާހަގަ ކުރެއްވި ގޮތުގައި ރައްޔިތުންނަށް އެންމެ ފައިދާ ހުރި ގޮތެއް ނޫނެވެ. ސަބަބެއްގެ ގޮތުގައި އޭނާ ވިދާޅުވީ، ރަށްރަށުގައި ދަނޑުވެރިންނަށް، އެ ރަށްތަކުގައި ހައްދާ ދަނޑުތަކާ ވާދަ ކުރަން ޖެހުމެވެ. ފަޅު ރަށްތަކުގައި ދަނޑު ހައްދައި، އެ ތަކެތި ރިސޯޓްތަކަށް ވިއްކާތީ، އާންމު ރައްޔިތުންނަށް އެ މާކެޓް ގެއްލެ އެވެ.
އެހެންވެ، ކައުންސިލްގެ ވިސްނުމަކީ ބަޝީރު ވިދާޅުވާ ގޮތުގައި ފަޅު ރަށްތަކުގައި ދަނޑު ހައްދަން އާންމު ރައްޔިތުންނަށް ބިން ދޫކުރުމެވެ. ނަމަވެސް، އެގޮތަށް އެކަންކަން ފާސްކުރާނީ ރައްޔިތުންގެ ހިޔާލު ހޯދައިގެން ކަމަށް ވިދާޅުވި އެވެ.
"ފަޅު ރަށްރަށް އާންމު ރައްޔިތުންނަށް ބޭނުން ކުރެވޭނެ ގޮތަށް ބާއްވައިގެން މަންފާ ހޯދާނެ ގޮތްތަކެއް ނިންމާނީ މި އަތޮޅުގައި ރައްޔިތުންގެ ވޯޓެއް ބާއްވައިގެން،" ބަޝީރު ވިދާޅުވި އެވެ.
ބައެއް އަތޮޅުތަކުގެ ހުރިހާ ފަޅު ރަށްތަކެއް ރިސޯޓް ހަދަން ދޫކުރުމަކީ ރައްޔިތުން ކަންބޮޑުވަމުން އަންނަ ކަމެކެވެ. އެގޮތުން، މިފަހުން ވ. އަތޮޅުގެ ރައްޔިތުން ވެސް ވަނީ އެ އަތޮޅު އަންބާރާގައި ރިސޯޓް ހެދުމާ ދެކޮޅަށް ޕެޓިޝަނެއް ހަދާފަ އެވެ.
އަދި، ބައެއް އަތޮޅުތަކުގައި ހިންގާ ރިސޯޓްތަކުން އަމަލު ކުރަމުންދާ ގޮތުން ވެސް ބައެއް ރައްޔިތުން ކަންބޮޑުވުން ފާޅުކުރަމުންދެ އެވެ. އެގޮތުން މިފަހުން ވަނީ އއ. ރަސްދޫ ފަޅަށް ގެއްލުންވާ ގޮތަށް ވެލިގަނޑު ރިސޯޓު ހިއްކާ މައްސަލަ ވެސް ބޮޑުވެފަ އެވެ.
