ހުޅުމާލެއިން ބިން ވިއްކައިގެން ލިބޭ ފައިސާ ހަރަދުކުރަނީ ސްކޫލްތަކާއި، މަގުތަކާއި އެހެނިހެން އިޖްތިމާއީ އަދި އުމްރާނީ ބޭނުންތައް ފުރިހަމަކުރަން ބޭނުންވާ ވަސީލަތްތައް ގާއިމުކުރުމަށް ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފި އެވެ.
ހުޅުމާލެއިން ބިން ވިއްކުމާ ދެކޮޅު މީހުން ބުނަނީ މިއީ ހުޅުމާލެ ހިއްކި ބޭނުން ކަމުގައިވާ ބޯހިޔާވަހިކަން ފޯރުކޮށްދިނުމުގެ މަގުސަދާ ހިލާފަށް ކުރާ ކަމެއް ކަމަށެވެ. އަދި ބިމުގެ ދަތިކަން އިންތިހާއަށް އޮތް މާލެ ސަރަހައްދުގައި މިހެން ބިން ވިއްކުމަކީ ކަންބޮޑުވުމެއްގެ ގޮތުގައި އެ މީހުން އަންނަނީ ބުނަމުންނެވެ.
މި ކަންބޮޑުވުންތަކާ ގުޅޭގޮތުން "އަދަދު" ގެ "ވިޔަ" ޕްރޮގްރާމުގައި ވާހަކަދައްކަވަމުން އެޗްޑީސީޑީ ޑެޕިއުޓީ މެނޭޖިން ޑިރެކްޓަރު އަހުމަދު އާތިފް ވިދާޅުވީ ހުޅުމާލެ ޑިޒައިންކުރީ އެކި ފަންތީގެ ރައްޔިތުން ގެދޮރުވެރިކުރުމަށް ވިސްނައިގެން ކަމަށެވެ. އަދި ސިޓީއެއްގެ ގޮތުގައި އެންމެ ފުރިހަމައަށް ތަރައްގީވާން ހުރިހާ ފަންތިއެއްގެ ރައްޔިތުން އެތަނެއްގައި ދިރިއުޅުމަކީ މުހިންމު ކަމެއް ކަމަށް ވިދާޅުވި އެވެ.
އެހެންކަމުން ހުޅުމާލެއިން ވެސް ދިރިއުޅުމުގެ ބޭނުންތަކަށް ބިމާއި ގެދޮރު ގަތުމުގެ ފުރުސަތު އެންމެންނަށް ލިބެންޖެހޭ ކަމަށް ގަބޫލުކުރައްވާ ކަމަށް އާތިފް ވިދާޅުވި އެވެ. އެގޮތުން ވަށާ ޖެހޭ ތަރައްގީގެ ބޭނުމަށް ބިން ވިއްކުމަކީ ކޮންމެހެން ބޭނުންތެރި ކަމެއް ކަމަށް އޭނާ ވިދާޅުވި އެވެ. އަދި ފުރަތަމަ ފިޔަވަހީގެ ތަޖުރިބާއިން އެކަން ފާހަގަކުރެވޭ ކަމަށް ވެސް ވިދާޅުވި އެވެ.
އާތިފް ވިދާޅުވި ގޮތުގައި މިހެން ބޮޑު އަގުގައި ބިން ވިއްކުމުގެ އެންމެ ބޮޑު ބޭނުމަކީ އިޖުތިމާއީ ކަންކަމަށް ހޭދަ ކުރާނެ ފައިސާ ހޯދުމެވެ. އެގޮތުން އޯޕަން މާކެޓުގައި ބިން ވިއްކައިގެން ލިބޭ ފައިސާއިން ސޯޝަލް ހައުސިން ޕްރޮޖެކްޓުތައް ސަބްސިޑައިޒް ކުރުމަށާއި ކޮންމެހެން ބޭނުންވާ ޒަރޫރީ ވަސީލަތްތަކަށް ހަރަދުކުރެވޭނެ ކަމަށް އޭނާ ވިދާޅުވި އެވެ.
މިހާރު އެޗްޑީސީން މަސައްކަތް ކުރަމުންދަނީ ދެވަނަ ފިޔަވަހީގެ މާސްޓާޕްލޭނުގައި ރެޒިޑެންޝަލް ބޭނުމަށް ކަނޑައަޅާފައި ހުރި ބިންތައް ވިއްކަން ފަށަން ތައްޔާރުވަމުންނެވެ. އަދި އެކަމާ ގުޅޭ އިދާރީ ކަންކަމާއި އެހެނިހެން މަރުހަލާތައް ފުރިހަމަވުމުން އެ މައުލޫމާތު އާންމުންނާ ހިއްސާކުރާނެ ކަމަށް އެ ކުންފުނިން ބުނެ އެވެ.
ހުޅުމާލެ ދެވަނަ ފިޔަވަހީގެ މާސްޓާޕްލޭންގެ ކުރެހުމެއް--
މިފަހަރު ބިން ވިއްކާއިރު، އެޗްޑީސީން ވަނީ ކުރިން ބިން ގަނެފައިވާ ފަރާތްތަކަށް ވުރެ ފުރަތަމަ ފަހަރަށް ބިމެއް ގަންނަ ފަރާތްތަކަށް އިސްކަން ދޭން ނިންމާފަ އެވެ. މިއީ ފަސްޓް ޓައިމް ލޭންޑް އޯނާސްއަށް ފުރުސަތު ދިނުމުގެ ގޮތުން ގެނައި ބަދަލެއް ކަމަށް އެޗްޑީސީން މައުލޫމާތު ދެ އެވެ.
މީގެ ކުރިން ވެސް ހުޅުމާލެ ދެވަނަ ފިޔަވަހިން ވަނީ ބިން ވިއްކައިފަ އެވެ. އެފަހަރު ވެސް ބިން ވިއްކީ ބީލަން އުސޫލުންނެވެ.
