ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ދާއިރާތަކުގެ އިންތިހާބު އަންނަ ސެޕްޓެމްބަރު 25، ގައި ބޭއްވުމަށް އެ ޕާޓީން ނިންމައިފި އެވެ.
އެ އިންތިހާބު ބާއްވަން ކުރިން ހަމަޖައްސާފައި އޮތީ މެއި 29، ގަ އެވެ. ނަމަވެސް ޕާޓީގެ ރައީސް މުހަައްމަދު ނަޝީދު އަވަހާރަކޮށްލަން މެއި 6، ގައި ދިން ބޮމުގެ ހަމަލާއަށްފަހު އެމަނިކުފާނު ޒަހަމްވެވަޑައިގަތުމުން އިންތިހާބު ފަސް ކުރީ އެވެ.
އެ ޕާޓީގެ އިންތިހާބުގެ މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޕާޓީގެ ޗެއާޕާސަން ހަސަން ވިދާޅުވީ އިންތިހާބުގައި އެކި ދާއިރާތަކަށާއި، އެކި މަގާމުތަކަށް 730 ކެނޑިޑޭޓުން ވާދަކުރާ ކަމަށެވެ. ވާދަކުރުމަށް ކުރިމަތިލާފައިވާ މެމްބަރުންގެ ފައިނަލް ލިސްޓު މިއަދު އާންމު ކުރާނެކަމަށް ވެސް އޭނާ ވިދާޅުވި އެވެ.
"އެމްޑީޕީގެ އެތެރޭގެ އިންތިހާބުގައި ވާދަކުރާ ކެނޑިޑޭޓުންނާއި ގުޅިގެން މިހާތަނަށް ލިބިފައިވަނީ 17 ޝަކުވާ. އެކަންކަން ބެލުމަށްފަހު ވާދަކުރެވޭނެ ކެނޑިޑޭޓުންނަކީ ކޮބައިކަން މިހާރު ވަނީ ކަނޑައަޅާފައި. އެކަމާ އިތުރު ޝަކުވާއެއް އޮތްނަމަ އިސްތިއުނާފުކޮށް ޕާޓީގެ އުސޫލުތައް ހަމަޖެހިފައިވާ ގޮތުން އެކަން ބެލުމުގެ ފުރުސަތު ދެވިގެންދާނެ،" ހަސަން ވިދާޅުވި އެވެ.
އިންތިހާބުގައި ވޯޓުލުމުގެ ފުރުސަތު ދޭނީ އެހެން އިންތިހާބުތަކުގައި ވެސް އަމަލުކުރާ އުސޫލުން ޕާޓީގެ ދަފްތަރުގައި ހިމެނޭ މީހުންނަށެވެ. ދަފްތަރުގައި ހިމެނޭ މީހުންގެ ތެރެއިން ވޯޓުލާން ފުރުސަތު ނުދޭނީ ބަލަންޖެހޭ ކަންކަން ބެލުމަށްފަހު ކަމަށް ހަސަން ވިދާޅުވި އެވެ.
ދާއިރާތަކުގެ އިންތިހާބު ބޭއްވުމަށް އެމްޑީޕީން މިހާރު ވަނީ ނުވަ މެމްބަރުންގެ ކޮމިޓީއެއް އެކުލަވާލާފަ އެވެ. އެ މެންބަރުންގެ ތެރޭގައި ޕްލޭނިން މިނިސްޓަރު މުހައްމަދު އަސްލަމް، ހެލްތް މިނިސްޓަރު އަހްމަދު ނަސީމް އަދި އެޑިޔުކޭޝަން މިނިސްޓަރި ޑރ. އައިޝަތު އަލީ ހިމެނެ އެވެ. އިންތިހާބު ކުރިއަށް ގެންދާނީ އެ ކޮމެޓީންނެވެ.
އެމްޑީޕީއަކީ ރާއްޖޭގައި އެންމެ ބޮޑު ސިޔާސީ ޕާޓީ އެވެ. އެޕާޓީގެ ދަފްތަރުގައި 93،354 މެމްބަރުން އެބަތިއްބެވެ. މި އިންތިހާބަކީ އެމްޑީޕީގެ އެތެރޭގައި ބޭއްވޭ އެންމެ ބޮޑު އިންތިހާބަށްވާއިރު، އިންތިހާބުގައި 300 ވޯޓު ފޮށި އެކި ދައިރާތަކުގައި ބަހައްޓަ އެވެ.
މި އިންތިހާބުގައި 900 އެއްހާ އޮފިޝަލުން ހަރަކާތްތެރިވާނެކަމަށާއި އޮފިޝަލުން ހޯދުމުގެ މަސައްކަތް ވެސް ވަރަށް އަވަހަށް ކުރެވޭނެކަމަށް އެ ޕާޓީން ބުނެ އެވެ.
