ސަރުކާރު ހިންގާ ކޯލިޝަންގެ މައި ޕާޓީ، އެމްޑީޕީގެ ބާރުގަދަ ގުނަވަނެއް ކަަމަށްވާ އިސްތިއުނާފް ފަނޑިޔާރުންގެ މަޖިލީހަށް މެމްބަރުން ހޮވަން ވަގުތު ދޭން، މިރެއަށް ތާވަލުކުރި ގައުމީ މަޖިލީހުގެ ބައްދަލުވުން ފަސްކޮށްފި އެވެ.
ނުވަ މެމްބަރުންގެ މައްޗަށް އެކުލެވޭ ކޮމިޓީއަށް ކުރިމަތިލުމުގެ މުއްދަތު އިއްޔެއަށް ހަމަވެފައިވާއިރު، ހުސްވެފައިވާ މަގާމްތަކަށް 15 އަށް ވުރެން ގިނަ މެމްބަރުން ވަނީ ކުރިމަތިލައިފަ އެވެ.
އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން އެމްޑީޕީގެ ގައުމީ މަޖިލީހުން ވަނީ "މެއި6"ގެ ނަމުގައި ކޮމިޓީއެއް އުފައްދައި، އެ ތަހުގީގުގެ ކަންކަން ދާ ގޮތެއް ބެލުމުގެ މަސައްކަތް ފަށައިފަ އެވެ.
ހަފްތާއެކު އެއް ފަހަރު އެ ކޮމިޓީން ހޯދުނު މައުލޫމާތު ގައުމީ މަޖިލީހާ ހިއްސާކުރާ ގޮތަށް ގަރާރެއް ފާސްކޮށް، ކޮންމެ ހަފްތާއެއްގެ ބުދަ ދުވަހު ގައުމީ މަޖިލީހުގެ ބައްދަލުވުމެއް ދަނީ ބާއްވަމުންނެވެ.
އެމްޑީޕީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް މިރޭ "އަދަދު"އަށް ވިދާޅުވީ މެއި6 ކޮމިޓީން މައުލޫމާތު ދިނުމުގެ އިތުރުން، އިސްތިއުނާފް ފަނޑިޔާރުންގެ މަޖިލީހަށް މެމްބަރުން ހޮވުން ވެސް މިރޭ 9:00 އަށް ބާއްވަން ހަމަޖެއްސި ބައްދަލުވުމަށް އެޖެންޑާ ކުރެވުނު ކަމަށެވެ.
ނަމަވެސް، އިސްތިއުނާފް ފަނޑިޔާރުންގެ މަޖިލީހަށް މެމްބަރުން ހޮވުމަށް އިތުރު ވަގުތު ބޭނުންވާކަމަށް ގިނަ މެމްބަރުން އެދުމާ ގުޅިގެން، މިރޭ ބާއްވަން ތާވަލުކުރި ބައްދަލުވުން އަންނަ ހޮނިހިރު ދުވަހަށް ފަސްކޮށްފައިވާކަމަށް ހަސަން ވިދާޅުވި އެވެ.
އިސްތިއުނާފް ފަނޑިޔާރުންގެ މަޖިލީހުގެ ޒިންމާއަކީ އެމްޑީޕީގެ އަސާސީ ގަވާއިދުގެ އެއްވެސް ކަމަކާ މެދު މެމްބަރަކު ޝަކުވާއެއް އިސްތިއުނާފްކުރަން ބޭނުންވާ ނަމަ އެ ޝަކުވާ ބެލުމެވެ. މީގެ އިތުރުން އަސާސީ ގަވާއިދު މާނުކުރުމާ މެދު އުފެދޭ ހުރިހާ ދެބަސްވުންތަކުގެ ހައްލަށް ވެސް އެ މަޖިލީހަށް ހުށަހެޅިދާނެ ކަމަށް އަސާސީ ގަވާއިދުގައިވެ އެވެ.
އެމްޑީޕީގެ އަސާސީ ގަވާއިދުގައިވާ ގޮތުގައި ފަސް އަހަރުގެ ދައުރަކަށް ހޮވާ އެ މަޖިލިސް އެކުލެވިގެންވާނީ ރައީސާއި އަށް މެމްބަރުންގެ މައްޗަށެވެ.
ފަސް އަހަރުގެ ދައުރު ހަމަވުމުން، އިތުރު ދައުރަކަށް އެ މެމްބަރަކު އިންތިހާބު ވެސް ކުރެވެ އެވެ.
އެމްޑީޕީގެ ގައުމީ މަޖިލީހުގެ މެމްބަރުންނަށް އިސްތިއުނާފް ފަނޑިޔާރު މަޖިލީހުގައި ނުތިބެވޭނެ އެވެ. ގައުމީ މަޖިލީހަށް ހޮވިއްޖެ ނަމަ އެ މީހެއްގެ މަގާމް ގެއްލޭނެ އެވެ.
އެމްޑީޕީގެ މުހިއްމު ކޮމިޓީއަކަށް މެމްބަރުން ހޮވުން ކުރިއަށް އޮތް އިރު، ޕާޓީގެ ގައުމީ މަޖިލީހަށް މެމްބަރުން އިންތިހާބުކުރުން ސެޕްޓެމްބަރުގައި ބާއްވަން ނިންމައި ކެންޑިޑޭޓުންގެ ލިސްޓު އޮތީ އާއްމުކޮށްފަ އެވެ.
