ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާ ތަހުގީގު ކުރުމަށްފަހު ރައްޔިތުންގެ މަޖިލީހުގެ ސަލާމަތާ ކަންތައްތަކާ ބެހޭ ކޮމެޓީން ނެރުނު ރިޕޯޓުގައި ދީފައިވާ ރިކޮމެންޑޭޝަންތަކުގެ ތެރެއިން 38 ކަމަކަށް މިހާރު ވެސް އަމަލު ކުރަމުން އަންނަ ކަމަށް ބުނި ނަމަވެސް, އެއީ ކޮން ކަންތައްތަކެއް ކަމެއް ހާމަ ނުކުރާތީ ކަންބޮޑުވުން ފާޅުކޮށްފި އެވެ.
ރައީސް އޮފީހުން މިދިޔަ ބުރާސްފަތި ދުވަހު ބުނެފައި ވަނީ މަޖިލީހުގެ އިންކުއަރީ ކޮމެޓީން ނެރެފައިވާ ރިޕޯޓުގައި ބަޔާންކޮށްފައިވާ 45 ރިކޮމެންޑޭޝަންގެ ތެރެއިން 38 ކަމަކީ "މިހާރު ވެސް ފެށިގެން ކުރިއަށްދާ މަސައްކަތް" ކަމަށެވެ. ނަމަވެސް، އޭގެ ތަފްސީލު އާންމެއް ނުކުރެ އެވެ. އެ މައުލޫމާތު ސާފުކުރުމަށް މި ނޫހުން ރައީސް އޮފީހަށް ގުޅުމުން ވެސް މައުލޫމާތު ދެއްވާފައެއް ނުވެ އެވެ.
މިރޭ އެމްޑީޕީގެ ގައުމީ މަޖިލީހުގައި އެ މަޖިލީހުގެ ބައެއް މެންބަރުން ވަނީ އެކަމާ ކަންބޮޑުވުން ފާޅު ކުރައްވާފަ އެވެ. އެގޮތުން، މަޖިލީހުގެ މެންބަރުން ކަމަށްވާ އިމްތިޔާޒު ފަހުމީ އާއި މުހައްމަދު ވަހީދު އަދި އިބްރާހިމް ރަޝީދު ގައުމީ މަޖިލީހުގައި މިރޭ ވާހަކަ ދައްކަވަމުން އެކަމުގެ ކަންބޮޑުވުންތައް ފާޅު ކުރެއްވި އެވެ.
ނަޝީދަށް އަމާޒުކޮށް ދިން ހަމަލާގެ ތަހުގީގަށް ފަރާވެރިވުމަށް އެމްޑީޕީން އެކުލަވާލާފައިވާ މެއި ހައެއް ކޮމިޓީގެ މުގައްރިރު، ވިލުފުށީ ދާއިރާގެ މެންބަރު ހަސަން އަފީފް، މިރޭ ގައުމީ މަޖިލީހުގައި ވިދާޅުވި ގޮތުގައި މަޖިލީހުގެ ރިޕޯޓްގެ ރިކޮމެންޑޭޝަންތައް ތަންފީޒު ކުރުން ކުރިއަށް ގެންދަން ސަރުކާރުން ރާވާފައިވާ ގޮތްތަކެއް ނޭނގެ އެވެ.
"އެ މައުލޫމާތެއް އަޅުގަނޑުމެންނަކަށް ނުލިބޭ، އެ މައުލޫމާތަކީ އަޅުގަނޑުމެންނާ ހިއްސާ ކުރެވޭނެ މައުލޫމާތެއް ނޫން ކަމަށް ބުނަނީ،" އަފީފް ވިދާޅުވި އެވެ.
އަފީފް ވިދާޅުވީ ރިކޮމެންޑޭޝަންތައް ތަންފީޒުކުރުމުގެ މަސައްކަތް އޭނާ ގަބޫލު ކުރައްވާ ގޮތުގައި ހަވާލުވެފައި އޮތީ ސަލާމަތީ ހިދުމަތްތަކާ އެވެ. އެހެންވެ، ރިކޮމެންޑޭޝަންތައް ތަންފީޒުކުރަމުންދާ ގޮތް ބެލުމަކީ އެ ކޮމިޓީގެ މިހާރުގެ އެންމެ މުހިންމު މަސައްކަތަށްވާތީ އެމްއެންޑީއެފްއާ ބައްދަލުކުރުމަށް ހުށަހެޅުއްވި ކަމަށެވެ.
ނަމަވެސް، އެމްއެންޑީއެފްއިން ސިޔާސީ ޕާޓީތަކުގެ ފަރާތްތަކާ ބައްދަލު ނުކުރާ ކަމަށް ބުނެފައިވާ ކަމަށް އަފީފް ވިދާޅުވި އެވެ. އަދި، ރިކޮމެންޑޭޝަންތަކާ ގުޅިގެން ޑިފެންސް މިނިސްޓަރު މާރިޔާ އަހުމަދު ދީދީއާ ބައްދަލުކުރުމަށް އެދުމުން އެކަމެއް ވެސް ނުވި ކަމަށް އޭނާ ވިދާޅުވި އެވެ.
"ވިދާޅުވީ ރިކޮމެންޑޭޝަންތައް ތަންފީޒު ކުރުމުގެ މަސައްކަތް ކުރިއަށް ގެންދަނީ ނޭޝަނަލް ސެކިއުރިޓީ އެޑްވައިޒަރީ (އެންއެސްއޭ)އިން ކަމަށް، އެހެންވެ އަޅުގަނޑުމެން މިއަދު ވަރަށް އުއްމީދުގަ ދިޔައީ އެންއެސްއޭގެ ފަރާތުން ރަނގަޅު މައުލޫމާތުތަކެއް ލިބޭނެ ކަމަށް،" އަފީފް ވިދާޅުވި އެވެ.
ނަމަވެސް، ބޭނުންވި މައުލޫމާތުތައް އެތަނުން ނުލިބުންކަން އޭނާ ފާހަގަ ކުރެއްވި އެވެ. އެގޮތުން އަމަލު ކުރަމުން އަންނަނީ ކޮން ރިކޮމެންޑޭޝަންތަކެއް ބުނެ ނުދިން ކަމަށެވެ.
"އެ ބޭފުޅުން ވިދާޅުވީ ތަންފީޒު ކުރުން ވަނީ ތިން ބަޔަކަށް ބަހާލެވިފައޭ، އެއީ ކުރު ރާސްތާގައި ތަންފީޒު ކުރަން ފަށާ ރިކޮމެންޑޭޝަންތަކާއި މެދު ރާސްތާ އަދި ދިގު ރާސްތާގައި ތަންފީޒު ކުރަން ފަށާ ރިކޮމެންޑޭޝަންތައް ކަމަށް،" އަފީފް ވިދާޅުވި އެވެ.
އެގޮތުން ދިގު ރާސްތާގައި ތަންފީޒުކުރަން ފަށާ ރިކޮމެންޑޭޝަންތައް ފެށޭވަރު ވާނީ ދައިރު ނިމޭހާ ތަނަށް ކަމަށް އެ އޮފީހުން މައުލޫމާތު ދިން ކަމަށް ވެސް އަފީފް ވިދާޅުވި އެވެ.
"އަޅުގަނޑުމެން މަސައްކަތް ކުރިން ކޮންމެ ރިކޮމެންޑޭޝަނެއް ދަންނަވާފައި އެއަށް އެ ބޭފުޅުން ޖަވާބެއް ދިނުމަށް، އެކަމަކު އެކަމެއް އެގޮތަކަށް ކުރެވޭ ގޮތެއް ނުވި، ޖެނަރަލްކޮށް ޖަވާބެއް ދެއްވީ،" އަފީފް ވިދާޅުވި އެވެ.
އަފީފް ވިދާޅުވީ ރައީސް އޮފީހުގައި ހިންގާ ނޭޝަނަލް ސެކިއުރިޓީ އެޑްވައިޒަރީ އޮފީހަށް އެ މައުލޫމާތުތައް އެގޮތަށް ދޭން ދަތިވާނެ ކަމަށް ވެސް ގަބޫލުކުރަން ޖެހޭ ކަމަށެވެ. އެތަނުގައި ހުންނާނީ ތަންފީޒީ އިދާރާތަކުން ފޯރުކޮށްދޭ މައުލޫމާތުތައްކަން ފާހަގަ ކުރެއްވި އެވެ.
ރައީސް އޮފީހުގައި އެންއެސްއޭ ހިންގަނީ ކޯޑިނޭޝަން ބޮޑީއެއްގެ ގޮތުގަ އެވެ.
އެހެންވެ، ގަބޫލު ކުރައްވާ ގޮތުގައި ރެކޮމެންޑޭޝަންތަކާ ގުޅޭ އެންމެ ތަފްސީލީ ޖަވާބުތަކެއް ލިބޭނީ ތަންފީޒީ އިދާރާތަކުން ކަމަށް އަފީފް ވިދާޅުވި އެވެ.
މަޖިލީހުން ނެރުނު އިންކުއަރީ ރިޕޯޓުގައި ރައީސް ނަޝީދަށް ދޭންޖެހޭ ސެކިއުރިޓީ ދިނުމުގައި ހުރި ބައިވަރު މައްސަލަތައް ފާހަގަކޮށް ޑިފެންސް މިނިސްޓަރު މާރިޔާ އާއި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ފުރިހަމައަށް ޒިންމާއަދާކުރައްވާފައިނުވާކަން ފާހަގަކޮށްފައިވެ އެވެ.
އިންކުއަރީ ރިޕޯޓުގައި ދީފައިވާ 45 ރެކޮމެންޑޭޝަން ތެރޭގައި ހިމެނެނީ ހަރުކަށި ފިކުރާ ދެކޮޅަށް މަސައްކަތް ކުރުމަށް ދީފައިވާ 29 ރެކޮމެންޑޭޝަނަކާއި ނަޝީދުގެ ސެކިއުރިޓީއާ ގުޅޭ 10 ރިކޮމެންޑޭޝަނަކާއި ފައިނޭންޝަލް އިންޓެލިޖެންސާ ގުޅޭ ހަ ރެކޮމެންޑޭޝަނެކެވެ.
ހަރުކަށި ފިކުރާ ދެކޮޅަށް މަސައްކަތް ކުރުމަށް ދީފައި ހުރި ރިކޮމެންޑޭޝަންސްގެ ތެރޭގައި ސިއްރު މައުލޫމާތު ބަދަލު ކުރެވޭނެ ވަރުގަދަ ނިޒާމެއް ގާއިމް ކުރުމާއި ނެޝަނަލް އިންޓެލިޖެންސްއާ ގުޅޭ ގާނޫނެއް އެކުލަވާލުމާއި ކައުންޓާ ޓެރަރިޒަމަށް ވަކި ބަޖެޓެއް ކަނޑައެޅުން ހިމެނެ އެވެ.
ނަޝީދުގެ ސެކިއުރިޓީއާ ގުޅޭ ގޮތުން ދީފައިވާ ރެކޮމެންޑޭޝަންތަކުގެ ތެރޭގައި އެމަނިކުފާނުގެ ގެކޮޅުގެ ސެކިއުރިޓީ ހަތިޔާރާއެކު 24 ގަޑިއިރު ބެލުމާއި އާމާޑް ކާރުކޮޅެއްގައި ނަޝީދު އެއް ތަނުން އަނެއް ތަނަށް ގެންދިއުމާއި ސެކިއުރިޓީ ޓީމު ވެޓު ކުރުމާއި ސެކިއުރިޓީ ޓީމަށް ގަވާއިދުން ރިފްރެޝް ކުރުމުގެ ކޯސްތައް ހިންގުން ހިމެނެ އެވެ.
