ޒިއުރިކް (އޮގަސްޓް 2) - ފީފާގެ ކުރީގެ ރައީސް ސެޕް ބްލެޓާގެ ބައިވެރިވުމާ އެކު ނުއަގުގައި ފީފާ ވޯލްޑް ކަޕްތަކެއްގެ ބްރޯޑްކާސްޓިން ރައިޓްސް ވިއްކާލި މައްސަލައެއް ކުރިއަށް ނުގެންދެވޭނެ ކަމަށް ސްވިޒަލެންޑްގެ ފެޑެރަލް ކޯޓަކުން ނިންމައިފި އެވެ.
ސްވިޒަލެންޑްގެ އެޓާނީ ޖެނެރަލް އޮފީހުން މިދިޔަ އަހަރު ބަލަން ނިންމި އެއް މައްސަލަ އަކީ 2010 އާއި 2014 ވަނަ އަހަރުގެ ވޯލްޑް ކަޕްގެ ބްރޯޑްކާސްޓިން ރައިޓްސް ފީފާ އިން މެދުވެރިވެގެން ކެރީބިއަން ފުޓްބޯލް ޔޫނިއަން (ސީއެފްޔޫ) އަށް ނުއަގުގައި ވިއްކި މައްސަލައެކެވެ. އެ މައްސަލަ އެންމެ ފުރަަތަމަ ހުށަހެޅި ސަބަބަކީ ބްލެޓާ އަށް ފައިދާވާ ގޮތަށް 600،000 ޑޮލަރަށް މި ޑީލް ކުރިއަށް ގެންދިޔައީ އެހެނިހެން ގޮތްގޮތުން ފައިސާ ލިބޭ ގޮތަށް ކަމަށް ބުނެ އެވެ.
މި މައްސަލައިގައި ސްވިޒަލެންޑްގެ އެޓާނީ އޮފީހުން މިދިޔަ އަހަރު ނިންމީ ކޯޓަށް މި ކަން ބެލޭނެ ފަދަ ހެކިތަކެއް ލިބިފައި ނެތް ކަމަށެވެ. މި ކަމުގައި ދޫނުދޭން ނިންމައި، ފީފާ އިން ދާދި ފަހުން ވަނީ މި މައްސަލަ އަލުން ބަލަން ހުށަހަޅައިފަ އެވެ. އެކަމަކު، ސްވިޒަލެންޑްގެ ފެޑެރަލް ކްރިމިނަލް ކޯޓުން އެންގީ މި މައްސަލައިގައި އެންމެ ފުރަތަމަ ސްވިޒަލެންޑްގެ އެޓާނީ އޮފީހުން ނިންމާފައި އޮތީ ރަނގަޅަށް ކަމަށެވެ.
މިއީ ފަހަކަށް އައިސް ކޯޓެއްގައި ފީފާގެ ކުރީގެ ރައީސް އުމުރުން 85 އަހަރުގެ ބްލެޓާ ކޮޅަށް މައްސަލައެއް ނިމުނު ފުރަތަމަ ފަހަރެވެ.
ބްލެޓާ ވަނީ 17 އަހަރު ފީފާ ރައީސްގެ މަގާމު ފުރުއްވައިފަ އެވެ. އެއީ 1998 ވަނަ އަހަރުގެ ޖޫން މަހުން ފެށިގެން 2015 ވަނަ އަހަރުގެ ޑިސެމްބަރާ ހަމައަށެވެ.
ކޮރަޕްޝަންގެ މައްސަލައެއްގައި ފީފާ އިން 2015 ވަނަ އަހަރުގެ ޑިސެމްބަރު 21 ވަނަ ދުވަހު ބެލްޓާ އާއި ޔޫއޭފާގެ ކުރީގެ ރައީސް މިޝެލް ޕްލެޓިނީ ފުރަތަމަ ސަސްޕެންޑްކުރީ އަށް އަހަރަށެވެ. އެހެން ނަމަވެސް ފީފާ އެތިކްސް ކޮމިޓީން ވަނީ އެ ސަސްޕެންޝަން ހަ އަހަރަށް ކުޑަކޮށްދީފަ އެވެ.
މި އަހަރު މާޗް މަހު ބްލެޓާގެ އިތުރު މައްސަލައެއް ނިންމައި، ފީފާ އިން ވަނީ އޭނާ އަށް އިތުރު ސަސްޕެންޝަނެއް ދީފަ އެވެ. އެ ސަސްޕެންޝަންގެ މުއްދަތު ހަމަވާނީ 2028 ވަނަ އަހަރު އެވެ.
ބްލެޓާ އެންމެ ފަހުން ސަސްޕެންޑްކުރަން ނިންމީ ފީފާގެ މުބާރާތްތަކަކާ ގުޅޭ ބޯނަސްތަކެއްގެ މައްސަލައިގަ އެވެ. ފީފާ އިން ކުރި ތަހުގީގަށް ސާބިތުވި ގޮތުގައި ބްލެޓާ އަށް ވަނީ ބޯނަސްތަކެއްގެ ގޮތުގައި 18 މިލިއަން ޕައުންޑް (24 މިލިއަން ޑޮލަރު) ލިބިފަ އެވެ. ބްލެޓާގެ އިތުރުން މި ކަމުގައި ބައިވެރިވި ފީފާގެ ކުރީގެ ޖެނެރަލް ސެކްރެޓަރީ ޖެރޯމް ވަލްކޭ ވެސް ވަނީ ސަސްޕެންޑްކޮށްފަ އެވެ.
