މިސަރުކާރުގެ ސައިންސް އެންޑް ޓެކްނޮލޮޖީ ކުރީގެ މިނިސްޓަރު މުހައްމަދު މަލީހް ޖަމާލާއި ތުލުސްދޫ ދާއިރާގެ ކުރީގެ މެންބަރު މުހައްމަދު ވަހީދު އިބްރާހީމް (ލޯޔަރު ވައްޑޭ) އެނބުރި އިދިކޮޅު ޕީޕީއެމާ މިރޭ ގުޅިވަޑައިގެންފި އެވެ.
މަލީހް އާއި ވައްޑޭގެ އިތުރުން ހެންވޭރު ދެކުނު ދާއިރާގެ ކުރީގެ މެމްބަރު އަހްމަދު އަބްދުލްކަރީމް (ރުކުމާ) ވެސް ޕީޕީއެމާ ގުޅިވަޑައިގެންފައިވަނީ އޮފީހުގައި މިރޭ ބޭއްވި ހާއްސަ ރަސްމިއްޔާތެއްގަ އެވެ.
މިހާތަނަށް ޖުމްހޫރީ ޕާޓީގައި ހުންނެވި ވައްޑޭ އަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި މަޖިލީހުގެ ތެރެއިން ސަރުކާރާ ދެކޮޅަށް ނުކުންނެވި 12 މެމްބަރުންގެ ތެރޭގައި ހިމެނިވަޑައިގެންނެވި ބޭފުޅެކެވެ.
އޭރު އެ 12 މެމްބަރުންގެ ގޮނޑި ގެއްލުވާލުމުން، ވައްޑޭ ވަނީ ޔާމީނަށް ފާޅުގައި ވަރަށް ބޮޑަށް ފާޑުވިދާޅުވެފަ އެވެ.
ކުރީގެ ސަރުކާރުގައި ޔޫތު މިނިސްޓަރު ކަމުގައި ހުންނަވަނިކޮށް ކުއްލި ގޮތަކަށް މަގާމުން ވަކި ކުރުމުން މަލީހް އަކީ ވެސް ޔާމީނަށް ވަރަށް ބޮޑަށް ފާޑުވިދާޅުވި ބޭފުޅެކެވެ.
އޭގެ ފަހުން، ޖުމްހޫރީ ޕާޓީއާ ގުޅިވަޑައިގެން، ރައީސް އިބްރާހިމް މުހައްމަދު ސޯލިހު ވެރިކަމަށް ގެންނަން އެ ކޯލިޝަނުގައި ހިމެނޭ ޖޭޕީގެ ތެރެއިން މަލީހް ވެސް ގިނަ މަސައްކަތްތަކެއް ކުރެއްވި އެވެ.
ނަމަވެސް، އެމްޑީޕީ ކޮންޓްރޯލްކުރާ މަޖިލީހަށް ނިސްބަތް ކުރައްވައި ދެއްކެވި ވާހަކަފުޅަކާ ގުޅިގެން އޭނާ ވަނީ އިތުބާރުނެތް ކަމަށް ފާސްކޮށް، މިނިސްޓަރު ކަމުގެ މަގާމުން ދުރުކޮށްފަ އެވެ.
އެއާއެކު ޖޭޕީން ވަކިވެވަޑައިގެން، މިރޭ ޕީޕީއެމާ ގުޅިވަޑައިގަތުމާ ހަމައަށް މަލީހް ގެންދެވީ މި ސަރުކާރަށް ފާޑުވިދާޅުވަމުންނެވެ.
އެމްޑީޕީގެ އިސް ސަފުގައި ކުރިން ހަރަކާތްތެރިވި ރުކުމާ މި ފަހުން ގެންދަވަނީ އެމްޑީޕީއަށް ބޮޑެތި ފާޑުކިޔުންތައް އަމާޒުކުރައްވަމުންނެވެ.
އަދި ނިމިދިޔަ ކައުންސިލް އިންތިހާބުގައި މާލޭގެ މޭޔަރުކަމަށް ޑރ. މުހައްމަދު މުއިއްޒު އިންތިހާބު ކުރުމަށްޓަކައި ރުކުމާ ވަނީ ވަރަށް ގިނަ މަސައްކަތްތަކެއް ކުރައްވައިފަ އެވެ.
ޕީޕީއެމާ ގުޅިވަޑައިގެންނެވުމަށްފަހު އެ ތިން ބޭފުޅުން ވެސް ވިދާޅުވީ އެމްޑީޕީގެ ކިބައިން މި ގައުމު ސަލާމަތް ކުރަންޖެހޭ ކަމަށާއި، އެކަން ކުރެވޭނެ ހަމައެކަނި ބޭފުޅަކީ ރައީސް ޔާމީން ކަމަށެވެ.
އެހެންކަމުން، ޔާމީން ޖަލުން މިނިވަންކޮށް، އެމަނިކުފާނު އަނބުރާ ވެރިކަމަށް ގެންނަން ކުރަންޖެހޭ ހުރިހާ މަސައްކަތްތަކެއް ކުރައްވާނެކަމަށް އެ ތިން ބޭފުޅުން ވެސް ވަނީ ވިދާޅުވެފަ އެވެ.
