ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓް ލިބުނު މީހުންނާ އެކު އެއްބަސްވުންތަކުގައި ސޮއިކުރުމަށް ފަހު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން ފްލެޓް ތަޅުދަނޑި ހަވާލުކުރަން މިއަދު ފަށައިފި އެވެ.
އެއްބަސްވުމުގައި ސޮއިކުރުމާއި ތަޅުދަނޑި ހަވާލުކުރުން އޮތީ ހުޅުމާލޭގައި ހުންނަ ހުރަވީ ސްކޫލް ހޯލްގަ އެވެ. އަދި މިހާރު އެޗްޑީސީން އާންމުކޮށްފައިވާ ތާވަލާ އެއްގޮތަށް ދުވާލެއްގެ މައްޗަށް 250 އާ 300 މީހުންނާ އެކު އެއްބަސްވުންތަކުގައި ސޮއިކުރުމުގެ ކަންކަން ކުރިޔަށް ގެންދާނެ ކަމަށް އެ ކޯޕަރޭޝަނުން ވަނީ ބުނެފަ އެވެ.
އެންމެ ފުރަތަމަ އެއްބަސްވުންތަކުގައި ސޮއިކުރަނީ އެޗް9 ފްލެޓުން އެޕާޓްމަންޓް ލިބުނު މީހުންނާ އެކީގަ އެވެ. ނަމަވެސް އެޗްޑީސީން އެއްބަސްވުމުގައި ސޮއިކުރަން ތާވާލުކުރަނީ އެއްބަސްވުންތަކުގައި ސޮއިކުރަން ކޮންމެހެން ބޭނުންވާ މައުލޫމާތު އެ ކޯޕަރޭޝަނާ ހިއްސާކޮށްފައިވާ މީހުންނަށް އެކަންޏެވެ.
އެޗްޑީސީން ވަނީ އެއްބަސްވުމުގައި ސޮއިކުރުމުގެ ކަންކަން ކުރުމުގެ ކުރިން ފްލެޓް ލިބުނު މީހުން އެކަމަށް ހާއްސަކޮށް ގާއިމްކޮށްފައިވާ އޮންލައިން ޕޯޓަލުން ނޫނީ ފޯމް އެ ކޯޕަރޭޝަނަށް ހުށައަޅައިގެން މި މައުލޫމާތުތައް ހިއްސާކުރަން އިލްތިމާސްކޮށްފަ އެވެ.
ހިޔާ ފްލެޓް ލިބުނު މީހުން ފޯމް ހުށައަޅަން ޖެހޭ ތާރީހާއި އެއްބަސްވުމުގައި ސޮއިކުރާ ތާރީހުގެ ތާވަލު--
ކަނޑައެޅިފައިވާ ތާރީހުގެ ފަހުން މި މައުލޫމާތު ހިއްސާކުރާ މީހުންނާ އެކު އެއްބަސްވުންތަކުގައި ސޮއިކުރަން ތާވަލުކުރެވޭނީ މައުލޫމާތު ހުށައެޅި މީހުންނާ އެއްބަސްވުމުގައި ސޮއިކުރުމަށް ފަހު ކަމަށް އެޗްޑީސީން ބުންޏެވެ.
ހިޔާ ފްލެޓް ލިބުނު މީހުންނާ ތަޅުދަނޑި ހަވާލުކުރި ނަމަވެސް، މިތަންތަނުގެ ފިނިޝިން މަސަައްކަތް ނިންމަން ލިބޭ ތިން މަސް ދުވަސް އަދި ގުނާކަށް ނުފަށާނެ އެވެ. އެޗްޑީސީން މި މުއްދަތު ގުނަނީ ފްލެޓުތަކަށް ބޭނުންވާ ފެނާއި ކަރަންޓުގެ ހިދުމަތް ފޯރުކޮށް ދިނުމަށް ފަހު އެވެ.
މިހާރު މި ފްލެޓްތަކަށް ބޭނުންވާ ކަރަންޓު ވިއުގައިގެ މަސައްކަތް ނިމިއްޖެ އެވެ. އަދި އެޗްޑީސީން މިހާރު މަސައްކަތް ކުރަމުން ދަނީ ފެނާއި ނަރުދަމާ ޓެސްޓު ކުރުމުގެ މަސައްކަތެވެ. ކުރިން މިކަން ނުކުރެވި އޮތީ ފްލެޓްތަކަށް ކަރަންޓު ނުލިބިގެންނެވެ.
