ހިކުމަތްތެރިކަމާއި ކެތްތެރިކަން އިސްކުރުމާއި ދޫދިނުމަކީ ސިޔާސީ ބޭފުޅުން ސިފަކުރަން އެއްވެސް ގޮތަކަށް ބޭނުންކުރާނެ ލަފުޒުތަކެއް ނޫނެވެ.
ސިޔާސީ ވާދަވެރިން ވީމަ އެވެ. ކުރީގެ ހަތުރުން ވެސް މެ އެވެ. ސިޔާސީ މަސްލަހާތާއި ޒާތީ ހަސަދަ ވެސް އޮންނާތީ އެވެ.
އެކަމަކު އެކި ސިޔާސީ ފިކުރުގެ އެކި ބޭފުޅުން އެއް ގަލަކަށް އަރައި، ތަފާތު ހިޔާލުތައް އެއްގޮތްކޮށް، ގައުމީ ކަމެއްގެ ގޮތުގައި ދެކިގެން މިވަނީ ނަމާނޫއެއް ދައްކައިފަ އެވެ.
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ މެއި މަހު ދިން ޓެރިރިސްޓު ހަމަލާއަކީ މުޅި ގައުމު ސިއްސުވައިލި ހާދިސާ އެކެވެ.
އެ ހާދިސާއަށްފަހު ބައިބައިވެފައިވާ މުޖުތަމައުއެއް، އިއްތިފާގުވީ އެ ހަމަލާގެ ހަގީގަތް ހޯދުމަށެވެ. މުޅި ގައުމަށް ދެވުނު ހަމަލާއެއްގެ ގޮތުގައި ސިފަވާތީ އެވެ.
އެއާއެކު، ރައްޔިތުން ތަމްސީލުކުރާ މަޖިލީހުގެ ހުރިހާ މެމްބަރުން ވަނީ އިގުރާރުވެ، އެ ހަމަލާގައި ކަން ހިނގާދިޔަ ގޮތް ހޯދަން ރާއްޖޭގެ ތާރީހުގައި ފުރަތަމަ ފަހަރަށް ޕާލިމަންޓަރީ އިންކުއަރީއެއް ހިންގަން ނިންމި އެވެ.
އެ ބުރަ ބޮޑު މަސައްކަތް ހަވާލުކުރީ 13 މެމްބަރުންގެ މައްޗަށް އެކުލެވޭ ގައުމީ ސަލާމަތީ ހިދުމަތްތަކާބެހޭ ކޮމިޓީއާ އެވެ. އެކި ޕާޓީތަކުގެ، އެކި ސިޔާސީ ފިކުރުގެ ބޭފުޅުންނަށް ޒިންމާ ކުރުވީ މުޅި ގައުމުގެ ސަލާމާތާ ގުޅިފައިވާ މައުލޫމާތުތަކެއް ހޯދުމަށެވެ. ދިފާއީ ބާރުގެ ވެރިން ހާޒިރުކޮށް ސުވާލުކުރުމެވެ. ގައުމުގެ ދިފާއީ ނިޒާމު ނިއުޅާލައި، މައްސަލަތައް ތިލަކުރުމެވެ.
ދެ މަހެއްހާ ދުވަހުގެ މަސައްކަތް ކޮމިޓީން ނިންމައިލީ ރޭ ދަންވަރުގެ ވަގުތެއްގަ އެވެ. ރެއާ ދުވާލު މަސައްކަތުން 270 އެއްހާ ގަނޑުގެ ރިޕޯޓެއް އެކުލަވައިލިއިރު، މެމްބަރުން ކުރި ބުރަ މަސައްކަތް ވަރަށް ސާފުކޮށް ހާމަވެ އެވެ.
އެ ރިޕޯޓުގައި ކަންބޮޑުވާންޖެހޭ އެތައް ކަމެއް ހުރިއިރު، އެ ހުރިހާ ކަމެއްގެ ފުރަގަހުން ފެންނަންއޮތީ މެމްބަރުން އިސްކުރި ގައުމީ މަސްލަހަތެވެ. ގައުމީ މަސައްކަތެއްގައި ސިޔާސީ ފިކުރު އެއް ފަރާތްކުރި ކަމުގެ ނަމޫނާ އެވެ.
އެ ރިޕޯޓު މިރޭ މަޖިލީހުގެ ތަޅުމަށް ހުށަހެޅިގެންދިޔައިރު، ރިޔާސަތުގައި އިންނެވި މަޖިލީހުގެ ނައިބު ރައީސް އީވާ އަބްދުﷲ ވަރަށް މާނަފުން ގޮތަކަށް އެކަން ފާހަގަކުރެއްވި އެވެ.
ކޮމިޓީގައި ހިމެނޭ ވަކިވަކި މެމްބަރުން އަދާކުރެއްވި ތަފާތު ދައުރު ހިއްސާ ކޮށްދެއްވަމުންނެވެ.
ކޮމިޓީގެ މުގައްރިރު އަދި ހިތަދޫ ދާއިރާގެ މެމްބަރު މުހައްމަދު އަސްލަމްގެ ހިކުމަތްތެރި ލީޑާޝިޕެވެ.
ކޮމިޓީގެ ނައިބު މުގައްރިރު އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ކޮމިޓީގެ މަސައްކަތަށް ގެންނެވި އިލްމާއި ތަޖުރިބާ އެވެ.
ތުޅާދޫ ދާއިރާގެ މެމްބަރު ހިސާން ހުސެއިން އާ ނުލައި، މި ރިޕޯޓު އެކުލަވާނުލެވުނީސް ކަން ފާހަގަކުރެއްވި އެވެ.
ހުޅުމާލެ ދާއިރާގެ މެމްބަރު އަލީ ނިޔާޒް މަސްލަހަތަށްޓަކައި މަސައްކަތް ކުރައްވައި، ދޫދީގެން، މެމްބަރުންގެ ހިޔާލު އެއްގޮތް ކުރަން ކުރެއްވި މަސައްކަތުން ދެއްވި ހިތްވަރެވެ.
ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް ގެނެސްދެއްވި އާދަޔާހިލާފު ހިޔާލުތަކެވެ.
ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާގެ އެެމްއެންޑީއެފްގެ ތަޖުރިބާއިން ރިޕޯޓަށް ގެނެސްދެއްވި މުއްސަނދި ކަމެވެ.
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ އިލްމާއި ހުނަރުން މަސައްކަތަށް ލިބުނު ހިތްވަރެވެ.
ކުރީގެ ޑިފެންސް މިނިސްޓަރުގެ ތަޖުރިބާގެ އިތުރުން، ސިޔާސީ ފިކުރު އެއް ފަރާތްކޮށް ގައުމީ މަސައްކަތެއްގެ ގޮތުގައި ރިޕޯޓު އެކުލަވާލުމަށް އެންމެ ބޮޑަށް ބާރު އެޅުއްވި މަޑުއްވަރީ ދާއިރާގެ މެމްބަރު އާދަމް ޝަރީފެވެ.
ކޮމިޓީއަށް ހާޒިރުކުރި ބޭފުޅުންނަށް ކުރަންވީ ސުވާލުތައް ކަނޑައަޅައި ދިނުމުގައި ކުރީގެ ޕޮލިސް ކޮމިޝަރުގެ ތަޖުރިބާ ތިމަރަފުށި ދާއިރާގެ މެމްބަރު އަބްދުﷲ ރިޔާޒް ބޭނުންކުރެއްވި ގޮތެވެ.
ގުރައިދޫ ދާއިރާގެ މެމްބަރު މުހައްމަދު ޣައްސާން މައުމޫން ކޮމިޓީގެ މަސައްކަތުގައި ދުވާލެއްގެ ބޮޑުބައި ހޭދަކުރެއްވި ކުރެއްވުމެވެ.
ވިލިނގިލި ދާއިރާގެ މެމްބަރު ސައުދު ހުސެއިން އާއި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު ކޮމިޓީގެ މަސައްކަތަށް ގެންނެވި އިތުރު، ތަފާތު ހިޔާލުތަކެވެ.
އީވާ ވިދާޅުވި ގޮތުގައި މަޖިލީހުގެ ހަޔާތުގައި މިވަރުގެ މަސައްކަތެއް ނުކުރައްވާ ކަމަށާއި، މިފަދަ ތަޖުރިބާއެއް ވެސް ނުކުރެއްވެ އެވެ.
"މި މަސައްކަތަށް ވަކި ޕާޓީއަކަށް ނުބަލައި، ވަކި މެމްބަރެއް ނުބަލައި މި މަސައްކަތް ކޮށްދެއްވުމުން އަޅުގަނޑަށް ވަރަށް ސާފުވި، މަސައްކަތް ހާސިލުކުރުމަށްޓަކައި އެއް މަގުސަދެއް ހާސިލުކުރުމަށް، ރަނގަޅަށް އިހުލާސްތެރި މަސައްކަތެއް ކުރީ ވަކި ސިޔާސީ ވިސްނުން އެއްކިބައިކޮށް، ގައުމީ މަސައްކަތެއްގެ ގޮތުގައި ބަލައިގެން މަސައްކަތް ކުރީ،" މެމްބަރުން ދެއްކި ނަމޫނާ ފާހަގަކުރައްވަމުން އީވާ ވިދާޅުވި އެވެ.
"ޕީޕީއެމްގެ މެމްބަރުން. އެމްޑީއޭ މެމްބަރުން. އަމިއްލަ މެމްބަރުން. އެމްޑީޕީގެ މެމްބަރުން. އެކު އެކީގައި މަސައްކަތް ކުރީ ސިޔާސީ ފިކުރަކަށް ވުރެ، ގައުމީ ވާޖިބެއްގެ ގޮތުގައި ދެކިގެން."
