އެމްޑީޕީއަށް 16 އަހަރު މިއަދު ފުރުނީ ހަމަލާއަކުން ހިތާމަވެރި ހާލަތެއް މެދުވެރިކުރުވާފައި ވަނިކޮށް ކަމަށާއި އެމްޑީޕީގެ ފިކުރަށް ސީދާ އަމާޒުކޮށް އެފަދަ ހަމަލާތައް ދިނަސް ފަހަތަށް ނުޖެހޭނެ ކަމަށް އެ ޕާޓީން މިއަދު ބުނެފި އެވެ.
ސަރުކާރު ހިންގާ ކޯލިޝަންގެ މައި ޕާޓީ، އެމްޑީޕީގެ އަހަރީ ދުވަހުގެ ތަހުނިޔާ ޕާޓީގެ މެމްބަރުންނާއި ސަޕޯޓަރުންނަށް ފޮނުވަން ނެރުނު ބަޔާނުގައި ބުނީ ޕާޓީގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލައި ދިން ހަމަލާއަކީ ޕާޓީއަށް އަމާޒުކުރި ހަމަލާއެއް ކަމަށެވެ. އެމަނިކުފާނުގެ ފުރާނަފުޅު ކިރިޔާ ސަލާމަތްވި އެ ހަމަލާ އިން ޕާޓީއަށް ސިހުމާއި ހިތާމަވެރިކަން ކުރިމަތިވެފައިވާ ކަމަށް ބުނެފައިވެ އެވެ.
"މި ޓެރަރިސްޓް ހަމަލާއަކީ އެމަނިކުފާނު އަވަހާރަކޮށްލުމަށް ދިން ހަމަލާއެއްގެ އިތުރަށް، މި ޕާޓީގެ ފިކުރަށާއި މި ޕާޓީ ބިނާވެފައިވާ އަސްލުތަކަށާއި މި ޕާޓީގެ ނުގުޑާ އަޒުމަށާއި ހިތްވަރަށް ދިން ހމަލާއެކެވެ،" ބަޔާނުގައިވެ އެވެ.
އެމްޑީޕީގެ މައި ހަރުގޭގައި ދިދަ ނެގުމުގެ ރަސްމިއްޔާތުގައި ޕާޓީގެ އިސް ބައެއް ބޭފުޅުން ބައިވެރިވެވަޑައިގަންނަވަނީ. -- ފޮޓޯ/ އެމްޑީޕީ
އެމްޑީޕީން ބުނިގޮތުގައި އެފަދަ ހަމަލާއަކުން އެމްޑީޕީ ފޮހޮއެއްނުލެވޭނެ އެވެ. އެ ޕާޓީއަކީ ދިވެހިންނަށް ސިޔާސީ، އިޖުތިމާއީ، އިގްތިސާދީ އަދި ފަރުދީ މިނިވަންކަމާއި އިންސާނީ ހައްގުތަކާއި އިންސާފު ހޯދައިދިނުމުގެ މައްޗަށް ބިނާވެ ވަކާލާތުކުރާ ޕާޓީ ކަމަށް ބުންޏެވެ.
އެއީ ގިނަ ޕާޓީ އެކުލެވޭ ޑިމޮކްރެސީގެ ހަޔާތް ރާއްޖޭގައި ފެށުމުގެ އަސްލުކަން ފާހަގަކޮށް ބުނީ، ދިވެހިންނަށް ހޯދައިދީފައިވާ ކާމިޔާބީ އާއި ކުރިއެރުންތަކުގެ ސަބަބުން ރައްޔިތުންގެ އުންމީދާ އެންމެ ބޮޑަށް ގުޅިފައިވަނީ ވެސް އެ ޕާޓީ ކަމަށެވެ.
"މި ޕާޓީ އަބަދުވެސް ދެމިއޮންނާނީ މި ޕާޓީ ބިނާވެގެންވާ އަސްލުތައް ނަގަހައްޓައި ކުރިއެރުވުމަށާއި ރައްޔިތުންނަށް ހައްގު މިންވަރު ހޯދައިދިނުމަށެވެ،" ބަޔާނުގައި ބުންޏެވެ.
ރާއްޖޭގެ އެންމެ ފުރަތަމަ ސިޔާސީ ޕާޓީ، އެމްޑީޕީ އުފެއްދީ ޖޫން، 25، 2005ގަައި ސްރީ ލަންކާގަ އެވެ.
އެމްޑީޕީގެ އަހަރީ ދުވަސް ފާހަގަކުރަން މިއަދު ހެނދުނު ވަނީ ޕާޓީގެ މައި ހަރުގޭގައި ދިދަ ނަގައިފަ އެވެ. މީގެ އިތުރުން ވެސް ހަރަކާތްތަކެއް ހިންގަން ވަނީ ރާވައިފަ އެވެ.
