ކޮވިޑަށް ޕޮޒިޓިވްވި 25 އަހަރުގެ މާބަނޑު މީހަކު ސިޒޭރިއަން ހެދިތާ ހަފުތާއެއްހާ ދުވަސް ފަހުން މިއަދު މަރުވެއްޖެ އެވެ.
ކުއްލިއަކަށް ހާލު ސީރިއަސްވެ، ދުވަސްނުފުރައި ދަރިފުޅު ވިހެއުމަށް ފަހު މަރުވީ ފ. ނިލަންދޫ، ސަމީއާ އަހްމަދެވެ. ދަރުމަވަންތަ ހޮސްޕިޓަލުގެ އައިސީޔޫގައި ފަރުވާދެނިކޮށް ސަމީއާ މަރުވީ އަލަތު ދަރިފުޅު ނުފެނި އެވެ. އެކަމަކު ބަނޑަށް އަށް މަހުގައި ސިޒޭރިއަން ހަދައި ނެގި ދަރިފުޅުގެ ހާލު ރަނގަޅެވެ.
ސަމީއާގެ ފިރިމީހާ، ނަބީލް "އަދަދު"އަށް ބުނިގޮތުގައި، ކޮވިޑުގައި ހާލު ސީރިއަސްވުމުގެ ކުރިން އެއްވެސް ބައްޔަކަށް ބޭސްކުރަމުން ނުދެ އެވެ. އޭނާގެ ހާލު ކުއްލިއަކަށް ގޯސްވާން ފެށީ ކޮވިޑަށް ޕޮޒިޓިވްވުމުން ކަމަށް ބުންޏެވެ.
ގަވާއިދުން ހަދަން ޖެހޭ ސްކޭނަކަށް ސަމިއާ މިދިޔަ މަހުގެ ފަހުކޮޅު މާލެ އަ އެވެ. އޭނާ ކުއްލިއަކަށް ބަލިވީ މާލެއިން ގޮސް ކަރަންޓީންގައި ހުއްޓަ އެވެ.
ނިލަންދޫގައި ހުންނަ ފ. އަތޮޅު ހޮސްޕިޓަލުގައި މިދިޔަ މަހުގެ 24 ގައި އޭނާ އެޑްމިޓްކުރީ ބަލީގެ އަލާމާތްތައް ފެނިގެންނެވެ. އެ ދުވަހު ސާމްޕަލް ނަގައި ޕޮޒިޓިވްކަން އެނގުނީ 25ގަ އެވެ.
"އޭރުވެސް ކޮވިޑުގެ އުނދަގޫތައް ވަރަށް ބޮޑަށް ހުރި. ވަރަށް ބޮޑަށް ބަލިވެފައި އޮތީ، އެހެންވެ އިމަޖެންސީ ކޭސްއެއްގެ ގޮތުގައި މާލެ ފޮނުވާލީ،" ހޮސްޕިޓަލުގެ އޮފިޝަލަކު ވިދާޅުވި އެވެ.
ސަމީއާ ވެސް ދިމާވީ ކޮވިޑުގައި ސީރިއަސްވާ އެހެން މީހުންނަށް ކުރިމަތިވާ ނޭވާލާން އުނދަގޫވުމެެވެ. ރަށުން މާލެ ފޮނުވާލަން ޖެހުނީ ވެސް އޮކްސިޖަން ގުޅައިފަ އެވެ.
މިދިޔަ މަހުގެ 27ގައި އައިޖީއެމްއެޗުގައި ފަރުވާދޭން ފެށި ފަހުން ވެސް ސަމީއާގެ ހާލަތަށް ބަދަލެއް ނާދެ އެވެ. އެހެންވެ ސިޒޭރިއަން ހަދައި ދަރިފުޅު ނެގީ މިދިޔަ މަހުގެ 29 ގަ އެވެ. އޭގެ އަށް ދުވަސް ފަހުން މިއަދު ސަމީއާ މަރުވީ އޮކްސިޖަން ނުހިފަހައްޓައިގެންނެވެ.
އެހާ ޒުވާން އުމުރުގައި، ކޮވިޑު ޖެހިގެން ކުއްލިއަކަށް ސަމީއާ ވަކިވެދިއުމުން އާއިލާ އާއި ނިލަންދުއަށް ވެސް ވަނީ ހިތާމަވެރިކަން ވެރިވެފަ އެވެ. ސަމީއާގެ ދެމަފިރިންގެ އަލަތު ދަރިފުޅަށް، އާއިލާ އިން ވަރަށް ބޮޑަށް ތައްޔާރުވަމުން އައި ކަމަށް އެ ރަށުން ވާހަކަ ދެއްކި މީހަކު ބުންޏެވެ.
ރާއްޖޭގައި ކޮވިޑަށް ޕޮޒިޓިވްވި މާބަނޑު މީހުންގެ އަދަދު މިދޭތެރެއިން ވަރަށް ބޮޑަށް އިތުރުވި އެވެ.
އައިޖީއެމްއެޗުގެ ކުޑަކުދިންގެ ޑޮކްޓަރު އަދި އިމިއުނައިޒޭޝަން ޓެކްނިކަލް އެޑްވައިޒަރީ ގްރޫޕުގެ ޗެއާޕާސަން، ޑރ. މުހައްމަދު ފައިސަލް ވިދާޅުވެފައިވާ ގޮތުގައި މާބަނޑު މީހުން ގިނަ އަދަދަކަށް ޕޮޒިޓިވްވެ ބަލީގައި ބޮޑުވަރުވާ މިންވަރު ނުވަތަ އައިސީޔޫއަށް ނުވަތަ ވެންޓިލޭޓަރަށްލާން ޖެހުން އިތުރުވި އެވެ. ބަނޑަށް ދަރިފުޅު ނިޔާވުމާއި އެބޯޝަނަކަށް ދާން ޖެހުމުގެ އިތުރުން ދުވަސްނުފުރައި އުފަންވުމަކީ ވެސް ބަލީގައި ކުރިމަތިވެދާނެ ނުރައްކާތައް ކަަމަށް އޭނާ އޭރު ވިދާޅުވެފައިވެ އެވެ.
"ރާއްޖޭގައި އާއްމު ގޮތެއްގައި ދުވަސްނުފުރާ އުފަންވާ ރޭޓު އުޅެނީ ގާތްގަނޑަކަށް 13 ޕަސެންޓުގައި. މި ރޭޓު، 1-4 ޕަސެންޓް އިތުރުވާނެ ކަމަށް ބެލެވޭ ކޮވިޑާ ގުޅިގެން،" ފައިސަލް ވިދާޅުވެފައިވެ އެވެ.
