މެޑްރިޑް (މެއި 23) - ބާސެލޯނާ އިން އޭނާގެ އަގުވަޒަން ނުކުރި ކަމަށް އެތުލެޓިކޯ މެޑްރިޑަށް މި ފަހަރު ސްޕެނިޝް ލީގު ޗެމްޕިއަންކަން ހޯދައިދޭން އެހީތެރިވި ލުއިސް ސުއަރޭޒް ބުނެފި އެވެ.
މި ސީޒަނުގައި ސުއަރޭޒް އެންމެ ފުރަތަމަ ބާސެލޯނާ ދޫކޮށް ބަދަލުވާން އުޅުނީ އިޓަލީގެ ޗެމްޕިއަން ޔުވެންޓަސްއާ އެވެ. އެކަމަކު އެ ޓީމަށް ބަދަލުވާން ހަދަން ޖެހޭ ޕާސްޕޯޓް ހެދޭހާ މުއްދަތު އޮއްވައި ބާސެލޯނާ އިން އޭނާ ދޫކޮށްލުމުގެ ކަންތައްތައް ނިންމައިނުދޭތީ އެ ޑީލް ނުހިނގި އެވެ. ސުއަރޭޒް ޔުވެންޓަސް އަށް ބަދަލުވާން މަސައްކަތް ކުރިއިރު އޭނާ ބޭނުންވީ ބާސެލޯނާގެ ކޮންޓްރެކްޓްގެ ބާކީ އޮތް މުއްދަތަށްވާ 14 މިލިއަން ޔޫރޯ ހޯދާށެވެ. އެކަމަކު އެ ދޭން ބޭނުންނުވާތީ ބާސެލޯނާ އިން ފަހުން ހަތް މިލިއަން ޑޮލަރުގެ އަގަކަށް އެތުލެޓިކޯ އަށް ސުއަރޭޒް ވިއްކާލީ އެވެ.
މިދިޔަ ދެ ހަފްތާގައި އެންމެ ޕްރެޝަރު ވަގުތުގައި އެތުލެޓިކޯ ފަހަތުން އަރައި މޮޅުވިއިރު، މޮޅުކޮށްދިން ގޯލު ޖެހީ ސުއަރޭޒް އެވެ. މި ފަހަރު ލީގުގައި ޖުމްލަ 21 ގޯލު ސުއަރޭޒް ވަނީ ޖަހައިފަ އެވެ. ރޭގެ މެޗަށް ފަހު ސުއަރޭޒް ދަނޑުމަތީގައި އިށީނދެގެން އިނީ ފޯނުން އަމިއްލަ އާއިލާއާ ވީޑިއޯ ކޯލެއް ކުރާށެވެ. އެ ވަގުތު އޭނާ ދިޔައީ ލޮލުން އޮހޮރެމުން ދިޔަ ކަރުނަތައް ފޮހެމުންނެވެ.
"ބާސެލޯނާ އިން އަހަރެންގެ އަގުވަޒަންނުކުރި. އަހަރެެން މި ހުރީ ވަރަށް އުފަލުން އެތުލެޓިކޯ އިން އަހަންނަށް މި ފުރުސަތު ދިނީތީވެ. އަހަރެންނަށް މި ލެވަލްގައި އަދިވެސް މޮޅަށް ކުޅެވޭނެކަމަށް އިތުބާރުކޮށް އެތުލެޓިކޯ އިން އެ ބެހެއްޓި ގާތްކަމަށް ޝުކުރު އަދާކުރަން. ވަރަށް ގިނަ ބަޔަކު އަހަންނާ އެކު މި ކަމުގެ ތެރޭގައި ވަރަށް ކަންކަމާ ކުރިމަތިލައިފި. އަހަންނާއި އަހަރެންގެ އަންހެނުންނާއި ދަރިންތަކަށް ވެސް މިއީ އުފާވެރި ވަގުތެއް،" ރޮވިފައި ހުރެ ސުއަރޭޒް މީޑިއާ އަށް ބުންޏެވެ.
ސުއަރޭޒަށް ބާސެލޯނާ އިން މި ފަހަރު ފުރުސަތެއް ނެތްކަން އެންގީ ކޯޗު ރޮނާލްޑް ކޫމަންގެ ފޯނު ކޯލެއް މެދުވެރިކޮށެވެ. ބާސެލޯނާއާ އެކު ހަތަރު ފަހަރު ސްޕެނިޝް ލީގު ކާމިޔާބުކުރި ސުއަރޭޒް އެ ޓީމު ދޫކޮށްލިއިރު، ބާސެލޯނާ އިން ސުއަރޭޒަށް ހަމަޖެއްސި ފެއާވެލްގައި އެ ކްލަބްގައި އޭރު އޮތް ކުރީގެ ރައީސް ޖޯސެފް ބާޓޮމެއުގެ ލީޑަޝިޕްގެ އިސް އެއްވެސް މީހަކާ އެކު ފޮޓޯއެއް ނަގަން ސުއަރޭޒް ބޭނުމެއް ނުވި އެވެ.
އުމުރުން 34 އަހަރުގެ ސުއަރޭޒް ދޫކޮށްލަން ބާސެލޯނާ އިން ކަންތައް ކުރި ގޮތުން އެ ޓީމުގެ ކެޕްޓަން އަދި ސުއަރޭޒާ ގާތް ގުޅުމެއް އޮންނަ ލިއޮނަލް މެސީ ވަރަށް ބޮޑަށް އޭރު ހިތްހަމަނުޖެހުން ފާޅުކުރި އެވެ. މިހާރު ވެސް ސުއަރޭޒާއި މެސީ އަކީ ދެ ރަހުމަތްތެރިންނެވެ.
އެތުލެޓިކޯއާ އެކު ސުއަރޭޒް ސޮއިކުރީ ދެ އަހަރުގެ އެއްބަސްވުމެއްގަ އެވެ. އެކަމަކު އެ ކޮންޓްރެކްޓްގައިވާ ގޮތުން ފުރަތަމަ ސީޒަން ނިމުމުން ވަކި މާއްދާ އަކަށް ބެލުމަށް ފަހު ކޮންޓްރެކްޓް އުވާލުމުގެ އިހުތިޔާރު ދެ ފަރާތަށް އޮވެ އެވެ. އެތުލެޓިކޯގައި މަޑުކުރުމާ މެދު ގޮތެއް ނިންމުމުގެ އިހުތިޔާރު އޮތީ ލުއިސް ސުއަރޭޒް އަތުގައި ކަމަށް އެ ކްލަބްގެ ރައީސް އެންރީކޭ ސެރޭޒޯ ވަނީ ވިދާޅުވެފަ އެވެ.
