ރައްޔިތުންގެ މަޖިލީހުގެ ރައީސަށާއި އުއްތަމަ ފަނޑިޔާރަށް، ދައުލަތުން ދެމުން އަންނަ ސެކިއުރިޓީ އިތުރަށް ޔަގީން ކުރުމަށްޓަކައި ގާނޫނުތަކަށް ގެންނަންޖެހޭ ބަދަލުތައް އަވަހަށް ގެންނެވުމަށް އެޓާނީ ޖެނެރަލަށް ރައީސް އިބްރާހީމް މުހައްމަދު ސޯލިހް މިއަދު އަންގަވައިފި އެވެ.
ރައީސް އޮފީހުން ބުނީ މިހާރު އޮތް ގާނޫނީ އޮނިގަނޑުގެ ތެރެއިން އެކަން ފުރިހަމަ ކުރެއްވެން ނެތްނަމަ، އާ ގާނޫނެއް އެކުލަވައިލައިގެން ނަމަވެސް އެ ކަންކަަން ކަށަވަރު ކުރުމަށް ރައީސް އޭޖީ އިބްރާހިމް ރިއްފަތަށް އަންގަވާފައިވާ ކަމަށެވެ.
މިއަދު އޮންލައިންކޮށް ބޭއްވި ވަޒީރުންގެ މަޖިލީހުގެ ޖަލްސާގައި، ރައީސް ވަނީ މިކަން ވަޒީރުންގެ މަޖިލީހުގެ މެންްބަރުންނާ ހިއްސާ ކުރައްވާފަ އެވެ.
ސެކިއުރިޓީ ކަންކަން ރަނގަޅު ކުރެއްވުމަށް ރައީސް އެންގެވީ މަޖިލީހުގެ ރައީސް އަދި ކުރީގެ މުހައްމަދު ނަޝީދު އަވަހާރަ ކޮށްލުމަށް މިދިޔަ ބުރާސްފަތި ދުވަހުގެ ރޭ ޓެރަރިސްޓް ހަމަލާއެއް ދީފައިވަނިކޮށެވެ.
ނަޝީދު އަވަހާރަކޮށްލަން އައިއީޑީ ގޮއްވާލީ ދިރިއުޅުއްވާ ގެކޮޅު ކައިރީގައި ހުރި ސައިކަލުގެ މަޑިދަށުގައި ބާއްވައިގެންނެވެ. ކެނެރީގެ ހުންނަ ނީލޯފަރުހިނގުމުން އެމަނިކުފާނު ހިންގަވާފައި މަޖީދީ މަގުގައި އޮތް ކާރުކޮޅާ ހަމައަށް 8:27 ގައި ފޯރުމާ އެކު އައިއީޑީ ގޮއްވާލުމުން ލިބުނު ޒަހަމްތަކާ އެކު ބިންމައްޗަށް ވެއްޓިވަޑައިގަތީ އެވެ. އެކުގައި ތިއްބެވި ސެކިއުރިޓީންނަށް ވެސް އަނިޔާވި އެވެ.
ބާރުގަދަ މި ހަމަލާގެ އެއްވެސް މައުލޫމާތެއް އިންޓެލްއަށް ލިބިފައިނެތްކަން ސިފައިންނާއި ފުލުހުން ވެސް ވަނީ ބުނެފަ އެވެ.
ބޮމުގެ ހަމަލާގައި އޭގައި ހުރި ރޭޒާ ފުއްތައް ރައީސް ނަޝީދުގެ ހަށިކޮޅު ފޫއަޅުވާލި އެވެ. ޑޮކްޓަރުންގެ ޓީމުން ކުރި ސާޖަރީތަކުން، އެމަނިކުފާނުގެ ހަށިކޮޅުން 10 ރޭޒާ ފުއް ނެގިއިރު ފުރާނަ ސަލާމަތް ވީ ހަމަކިރިޔާ އެވެ.
ސިފައިންގެ އިންޓެލިޖެންސް އާއި ސެކިއުރިޓީއާމެދު ފާޑު ކިޔަމުންދާއިރު އެފަދަ ހަމަލާއެއް ތަކުރާރު ވިޔަ ނުދިނުމަށް ކުރަން ޖެހޭ ހުރިހާ ކަމެއް ކުރައްވާނެ ކަމަށް ރައީސް ވިދާޅުވި އެވެ.
ނަޝީދު ދިރިއުޅުއްވާ ކެނެރީގެއަކީ ހަނި ގޯޅިއެއްގައި ހުންނަ ގެއެއް ކަމުން ސެކިއުރިޓީ ބަލައްޓަން އުނދަގޫވެ، އަދި ރައްކާތެރިކަމަށްޓަކައި ސިފައިން ވަނީ އެ ގޯޅީގައި ޕާކް ނުކުރެވޭ ގޮތް ހެދުމަށް ސިޓީ ކައުންސިލްގައި ވެސް އެދިފައިވެ އެވެ. ނަމަވެސް، އެކަން ކޮށްފައެއް ނުވެ އެވެ.
ނަޝީދަށް ދިން ހަމަލާއާ ގުޅިގެން މިހާތަނަށް ތިން މީހަކު ވަނީ ހައްޔަރު ކޮށްފަ އެވެ. އެއީ ބޮންގޮއްވާލުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
