ހުޅުމާލެ ދެ ވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކަށް ކަރަންޓް ދޭން ގެނެސްފައިވާ ކޭބަލްތައް ވަގަށް ނެގުމަކީ ޝެޑިއުލްކޮށްފައިވާ މުއްދަތަށް ކަރަންޓުގެ މަސައްކަތް ނިންމަން އެތައް ދަތިތަކެއް ކުރިމަތިވާނެ ކަމެއް ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.
ހިޔާ ފްލެޓްތަކަށް ޖޫންގައި މީހުންނަށް ވަދެވޭވަރު ކުރަން ތާވަލްކޮށްފައިވާ މަސައްކަތްތަކުގެ ތެރޭގައި ކަރަންޓް ދިނުން ހިމެނެ އެވެ. އެ މަސައްކަތް ދަނިކޮށް ކޭބަލްތައް ވަގަށް ނަގާފައިވާ ކަމަށް އެޗްޑީސީން ބުންޏެވެ.
މި ކޭބަލްތައް ވަގަށް ނެގި ވާހަކަ އެންމެ ފުރަތަމަ ތިލަވީ ސޯޝަލް މީޑިއާގަ އެވެ. ނަމަވެސް އޭރު އެޗްޑީސީން މި މައުލޫމާތު ކަށަވަރުކޮށެއް ނުދެ އެވެ.
މި މައްސަލައިގައި އެޗްޑީސީން ނެރުނު ބަޔާނުގައި ބުނީ ހިޔާ ފްލެޓްތަކުގެ ކަރަންޓު ވިއުގައަށް ބޭނުންވާ ކޭބަލްތަކެއް ގެއްލިފައިވާކަމަށް ދެނެގަނެވިގެން އެ މައްސަލަ އެ ކުންފުނީގެ އިންޓާނަލް އޮޑިޓުންނާއި ފުލުހުންނަށް ހުށައަޅައިގެން ބަލަމުންދާ ކަމަށެވެ. މިކަމުގައި އެޗްޑީސީގެ މުވައްޒަފެއްގެ ބައިވެރިވުން އޮތް ކަމަށް ވަނީ ތުހުމަތުކޮށްފަ އެވެ.
އެ ކުންފުނިން ބުނިގޮތުގައި ކޭބަލްތައް ވަގަށް ނެގުމުގައި އެޗްޑީސީގެ މުވައްޒަފަކު ޝާމިލްވާ ނަމަ ފިޔަވަޅު އަޅާނެ އެވެ.
މައުލޫމާތު އެނގޭ މީހަކު "އަދަދު" އަށް ކިޔައިދިން ގޮތުގައި ކޭބަލްތައް ވަގަށް ގެންދިޔައީ އެކި ދުވަސްމަތިންނެވެ. މި މައްސަލައިގައި ޝާމިލުވާ ފަރާތްތަކާ ގުޅޭ މައުލޫމާތު އެޗްޑީސީއާ މީގެ ދުވަސްކޮޅެއް ކުރިން ހިއްސާކުރި ކަމަށް ވެސް އޭނާ ބުންޏެވެ.
ކޭބަލްތައް ވަގަށް ނަގައި ކަރަންޓް ދޭން ބުރޫއެރި ނަމަވެސް ތާވަލާ އެއްގޮތަށް ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށް މަސައްކަތް ކުރާނެ ކަމަށް އެޗްޑީސީން ބުންޏެވެ.
ހިޔާ ފްލެޓްތަކުގެ ފެނާއި ނަރުދަމާގެ ނިޒާމު ޓެސްޓު ނުކުރެވިގެން އުޅެނީ ވެސް އެ ފްލެޓްތަކަށް ކަރަންޓު ނުދެވިގެންނެވެ. މުޅި ދެވަނަ ފިޔަވައްސަށް ކަރަންޓު ދޭން ފެށި މަޝްރޫއު މަޑުޖައްސާލައި ސީދާ ހިޔާ ފްލެޓްތަކަށް ކަރަންޓު ދިނުމުގެ މަސައްކަތް ފެށީ ވެސް މަސައްކަތް ލަސްވާތީ، އަވަހަށް ނިންމާލުމުގެ ގޮތުންނެވެ.
