ލަންޑަން (މެއި 3) - މެންޗެސްޓާ ޔުނައިޓެޑްގެ ވެރިންނާ ދެކޮޅަށް ސިލްސިލާކޮށް އެ ކްލަބްގެ ސަޕޯޓަރުން ބާއްވަމުން އަންނަ އެއްވުން ތަކުގައި ބައިވެރިވަނީ ކްލަބްގެ މެޖޯރިޓީ ސަޕޯޓަރުންތޯ އާސެނަލްގެ ކުރީގެ ކޯޗު އަދި ފީފާގެ އޮފިޝަލް އާސެން ވެންގާ ސުވާލު އުފައްދައިފި އެވެ.
އިނގިރޭސި ޕްރިމިއާ ލީގުގައި ރޭ ޔުނައިޓެޑުން ވާދަވެރި ލިވަޕޫލާ ދެކޮޅަށް ކުޅެން އޮތް މެޗު ފަސްކުރަން ޖެހުނީ މެޗުގެ ކުރިން ޔުނައިޓެޑްގެ ސަޕޯޓަރުން ދަނޑުބޭރުގައި ބޭއްވި ހަޅުތާލު ކޮންޓްރޯލުން ނައްޓައި 200 އެއްހާ ސަޕޯޓަރުން ދަނޑަށް ވެސް ވަނުމުންނެވެ.
ޔުނައިޓެޑް ސަޕޯޓަރުންގެ ރުޅިގަނޑު ފަޅައިގެންދިޔައީ ދާދި ފަހުން ފީފާ އާއި ޔުއެފާއާ ދެކޮޅަށް ގެންނަން އުޅުނު ޔޫރަޕިއަން ސުޕަ ލީގުގައި ބައިވެރިވާން ޔުނައިޓެޑްގެ ވެރިން ކަމަށްވާ ގްލޭޒާ އާއިލާ އިން ނިންމުމުންނެވެ. ސަޕޯޓަރުންގެ ފާޑުކިޔުންތަކާއި އެއްވުންތަކާ ހެދި ޔުނައިޓެޑުން ސުޕަ ލީގުން ވަކިވި އެވެ. އެކަމަކު އެ ހިސާބުން ވެސް ސަޕޯޓަރުންގެ ހިތްހަމަނުޖެހުންތައް މަދެއްނުވި އެވެ. ހަޅުތާލުކުރާ ސަޕޯޓަރުން މިހާރު ޑިމާންޑްކުރަނީ ގްލޭޒާ އާއިލާ އިން ޔުނައިޓެޑް ދޫކޮށްލުމަށެވެ.
ހަޅުތާލުގެ ތެރެއިން ޔުނައިޓެޑްގެ ސަޕޯޓަރުން ދަނޑުމަތީގައި.
ވެންގާ ވަނީ އާސެނަލްގެ ކޯޗަކަށް ހުރިއިރު، އެ ކްލަބްގެ ސަޕޯޓަރުންގެ ފަރާތުން ކުރިމަތިވި ގިނަ ޗެލެންޖްތަކާ ކުރިމަތިލައިފަ އެވެ. ވެންގާ ބުނީ އާސެނަލްގައި ވެސް އޭނާ ކުރި ކަމަކީ އޭނާ މަގާމުން ދުރުކުރަން ސަޕޯޓަރުން ބޭއްވި އެއްވުންތަކާ ބެހޭގޮތުން ދިރާސާއެއް ކުރީ ކަމަށެވެ.
"އެންމެ ފުރަތަމަ ކަމަކަށް އަހަރެމެން އޮޅުންފިލުވަން ޖެހޭ ހަޅުތާލު މިކުރަނީ ޔުނައިޓެޑްގެ މެޖޯރިޓީ ސަޕޯޓަރުންތޯ،" ވެންގާ ބުންޏެވެ.
"އަހަރެމެން މި އުޅޭ މުޖުތަމައު އިން ފެންނަ ހަގީގަތަކީ ހަޅުތާލުކުރާ މީހުންނަކީ އާންމުކޮށް މެޖޯރިޓީއެއް ނޫން. މީޑިއާ އިން ހަމައެކަނި ބަލަނީ މައިނޯރިޓީން ކުރާ ކަންތައްތައް،"
ވެންގާ ބުނީ އޭނާ އަކީ ސުޕަ ލީގުގެ ހިޔާލާ އެންމެ ފުރަތަމަ ވެސް ދެކޮޅު މީހެއް ކަމަށާއި އެ ހަގީގަތް ބަދަލުނުވާނެ ކަމަށެވެ. އެކަމަކު ފުޓްބޯޅަ ކްލަބެއްގެ ވެރިންނާ މެދު ހިތްހަމަނުޖެހިގެން ކުރާ ހަޅުތާލެއްގެ ސަބަބުން ފުޓްބޯޅަ މެޗެއް ހުއްޓިދާނެ ފަދަ ހާލަތެއް ކުރިމަތިވެއްޖެނަމަ އެއީ ފުޓްބޯޅަ އަށް ލިބޭ ދެރައެއްގެ ގޮތުގައި ވެންގާ ގަބޫލުކުރެ އެވެ.
ރިޕޯޓްތައް ބުނާގޮތުގައި ސަޕޯޓަރުން ކޮންޓްރޯލް ނުކުރެވުނު މައްސަލައިގައި ޔުނައިޓެޑަށް ބޮޑު ޖޫރިމަނާއެއް އައުމުގެ ފުރުސަތު ބޮޑެވެ. ޔުނައިޓެޑްގެ ސަޕޯޓަރުންގެ ގްރޫޕްތަކުން ވަނީ މި ސީޒަނުގައި ޔުނައިޓެޑް ދަނޑުގައި ބާކީ ހުރި ހުރިހާ މެޗެއްގެ ކުރިން ދަނޑު ކައިރީގައި އެއްވުން ބާއްވަން ނިންމައިފަ އެވެ.
