ލޯކަލް ކައުންސިލް އިންތިހާބުގައި މާލޭ ސިޓީގެ ހަ ދާއިރާއެއްގެ ވޯޓު އަލުން ގުނައިދޭން އިލެކްޝަންސްގައި އެދިގެން އެދެވޭ ނަތީޖާއެއް ނުނިކުތުމުން ކޯޓަށް ދާން އެމްޑީޕީގެ ވިސްނުމަށް އަމަލުނުކުރުމަށް އެ ޕާޓީގެ ގައުމީ ހިންގާ ކޮމިޓީން މިރޭ ފާސްކޮށްފި އެވެ.
އެމްޑީޕީން އިލެކްޝަންސް ކޮމިޝަން (އީސީ) ގައި އަލުން ގުނައިދޭން އެދުނީ ދެ ކެންޑިޑޭޓުންގެ މެދުގައިވާ ފަރަގަށް ވުރެން ބާތިލް ވޯޓު ގިނަ ދާއިރާތަކެވެ. އެކަމަކު އެމްޑީޕީން އެދުނު ގޮތަށް ވޯޓު އަލުން ގުނަން އީސީން ދެކޮޅު ހެދީ އެވެ.
އެހެންވެ އެމްޑީޕީން ވިސްނީ އެ މައްސަލަ ކޯޓަށް ހުށަހަޅައިގެން ހައްލެއް ހޯދުމަށެވެ.
އެކަމަކު އެމްޑީޕީން މިރޭ ބޭއްވި ގައުމީ ހިންގާ ކޮމިޓީގެ ބައްދަލުވުމުގައި، އިންތިހާބާ ގުޅިގެން ކޯޓަށް ދާން މެމްބަރުންނަށް އެއްބަހެއް ނުވެވުނެވެ. އެހެންވެ، ނިންމީ ކޯޓަށް ދިއުމުގެ ވިސްނުން ދޫކޮށްލާށެވެ.
ބައެއް ދާއިރާތައް އަލުން ގުނައިދޭން އެމްޑީޕީން އީސީގައި އެދުނީ "ބާތިލް ވޯޓު ކަނޑައެޅި ގޮތާ މެދު ޝައްކު އުފެދިފައިވާތީ" އާއި ބައެއް ފޮށިތަކުގެ ޓެލީ ޝީޓުތައް ދިމާނުވުމާއި އެހެން މީހުންގެ ނަމުގައި ވޯޓުލީ ކަން ފަޅާއެރުން ފަދަ ކަންކަން ފާހަގަވުމުން ކަމަަށް އެ ޕާޓީން ބުނެފައިވެ އެވެ.
ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް މުހައްމަދު ނަޝީދު ބައިވެރިވެވަޑައިގަތް ގައުމީ ހިންގާ ކޮމިޓީގެ ބައްދަލުވުން މިރޭ ބޭއްވީ އަންނަ މަހުގެ 29ގައި އޮންނަ އެ ޕާޓީގެ އެތެރޭގެ އިންތިހާބަށް ވާދަކުރުމުގެ ޝަރުތުތައް ކަނޑައަޅާށެވެ. ވަޒީރުންނާއި މަޖިލިސް މެމްބަރުން ވެސް ހިމެނިވަޑައިގަންނަވާ ގައުމީ ހިންގާ ކޮމިޓީން ނިންމީ އެ ޕާޓީގެ އެތެރޭގެ އިންތިހާބުގައި ވާދަކުރެވޭނީ ޕާޓީގެ މެމްބަރެއްގެ ގޮތުގައި އެއް އަހަރު ވީ މީހުންނަށް ކަމަށެވެ.
މީގެ އިތުރުން މުހިއްމު ނިންމުމެއްގެ ގޮތުގައި، ގަރާރެއް ހުށަހަޅައިގެން ފާސްކުރީ ބޮޑެތި ކުށްތަކުގައި ހިމެނޭ މީހުންނަށް އިންތިހާބުން ފުރުސަތު ނުދިނުމަށެވެ. އޭގެތެރޭގައި، މީހުން މެރުމާއި ކުޑަކުދިންނަށް ޖިންސީ ގޯނާކުރުމާއި ޑްރަގް ޓްރެފިކް ކުރުމުގެ ކުށް ހިމެނެ އެވެ. އަދި އެންޓި ޓޯޗާގެ ގާނޫނުގައި ބަޔާންކުރާ ކުށްތަކާއި ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ގާނޫނުގައި ބަޔާންކުރާ ކުށެއްގައި ހިމެނޭ މީހަކަށް ވެސް އިންތިހާބުގައި ވާދައެއް ނުކުރެވޭނެ އެވެ.
ރިޔާސީ ކޮމިޝަންތަކުގެ ރިޕޯޓްގައި ތުހުމަތުކުރާ މީހުންނާއި އެމްއެމްޕީއާރުސީގެ ހިޔާނާތުގައި ތުހުމަތުކުރެވޭ މީހުންނަކަށް ވެސް އިންތިހާބުގައި ވާދަނުކުރެވޭނެ ކަމަށް ވަނީ ނިންމައިފަ އެވެ.
ކައުންސިލް އިންތިހާބުގައި އެމްޑީޕީން ކައުންސިލްތަކުގެ 400 ގޮނޑި ކާމިޔާބުކުރި އިރު ވާދަވެރި ޕީޕީއެމަށް ލިބުނީ 325 ގޮނޑި އެވެ. މި އިންތިހާބުގައި އެމްޑީޕީއަށް އެންމެ ބޮޑު ނާކާމިޔާބީއަކީ މާލޭ ސިޓީ ކައުންސިލްގެ އަޣުލަބިއްޔަތު ގެއްލުމެވެ. މިހާތަނަށް ބޭއްވި ތިން އިންތިހާބުގައި ވެސް މާލެއިން ސާފު އަޣުލަބިއްޔަތު އެމްޑީޕީއަށް ދެމުން އައި ނަމަވެސް މި އިންތިހާބުގައި ގިނަ ގޮނޑިތައް ދިނީ އިދިކޮޅު ޕީޕީއެމަށެވެ.
