މި މަހުގެ 10 ގައި ބޭއްވި ލޯކަލް ކައުންސިލް އިންތިހާބުގައި ކައުންސިލްތަކުގެ 400 ގޮނޑިއާ އެކު އިންތިޚާބުގެ އަޣުލަބިއްޔަތު ހޯދީ ވެރިކަން ކުރާ މައި ޕާޓީ، އެމްޑީޕީން ކަން ދާއިމީ ނަތީޖާ އިން ދައްކައިފި އެވެ.
އިދިކޮޅު ޕާޓީ، ޕީޕީއެމުން ކާމިޔާބުކުރީ 325 ގޮނޑި އެވެ.
ޕަސެންޓޭޖުން ބަލާ ނަމަ މިއީ، އެމްޑީޕީ އަށް 43 ޕަސެންޓެވެ. ޕީޕީއެމަށް ކާމިޔާބުވީ 34.9 ޕަސެންޓްކަން އީސީން އާއްމުކުރި ނަތީޖާގައިވެ އެވެ.
ރާއްޖޭގައި ފުރަތަމަ ފަހަރަށް ދެ އިންތިހާބެއް އެކުގައި ބޭއްވިއިރު ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 3،814 ކެންޑިޑޭޓުން ވާދަކުރި އެވެ. މީގެ ތެރެއިން ކައުންސިލްތަކަށް 982 މީހަކު އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް 930 މީހުންނާ އެކު ޖުމްލަ 1912 މީހުން އިންތިހާބު ކުރަން ޖެހުނެވެ.
އިލެކްޝަންސް ކޮމިޝަންގެ މެމްބަރުން: އިންތިހާބުގައި މާ ބޮޑެތި މައްސަލަތަކެއް ދިމާނުވާ ކަމަށް ވިދާޅުވި. -- ފޮޓޯ: ހުސެއިން ވަހީދު | އަދަދު
އިލެކްޝަންސް ކޮމިޝަނުގައި މިރޭ ބޭއްވި ނިއުސް ކޮންފަރެންސްގައި އިންތިހާބުގެ ދާއިމީ ނަތީޖާ އިއުލާންކޮށްދެއްވަމުން ކޮމިޝަންގެ ރައީސް އަހްމަދު ޝަރީފް ވިދާޅުވީ ކައުންސިލްތަކުގެ 975 ގޮނޑިއަކަށް މީހުން އިންތިހާބުކޮށްފައިވާ ކަަމަށެވެ. އަދި ޑަބްލިއުޑީސީ އިންތިހާބުގައި 905 މަގާމަކަށް މީހުން އިންތިހާބުކޮށްފައިވާ ކަމަށް އޭނާ ވިދާޅުވި އެވެ.
ޝަރީފް ވިދާޅުވި ގޮތުގައި މީގެތެރެއިން އެމްޑީޕީން ކައުންސިލްތަކުގެ 400 ގޮނޑި ކާމިޔާބުކުރީ 804 ކެންޑިޑޭޓުން ނެރެގެންނެވެ. އަދި ޕީޕީއެމުން 325 ގޮނޑި ކާމިޔާބުކުރީ 646 ކެންޑިޑޭޓުން ވާދަކޮށްގެންނެވެ. ކޮމިޝަނުން މިރޭ އާއްމުކުރީ ކައުންސިލްތަކުގެ ގޮނޑިތަކުގެ ނަތީޖާ އެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ނަތީޖާގެ ތަފްސީލެއް އަދި ނުދެ އެވެ.
އެމްޑީޕީ (400 ގޮނޑި)
3 މޭޔަރުން
ސިޓީ ކައުންސިލްގެ 18 ގޮނޑި
އަތޮޅު ކައުންސިލް ރައީސުންގެ 11 ގޮނޑި
ރަށު ކައުންސިލްތަކުގެ 71 ގޮނޑި
ކައުންސިލް މެމްބަރުންގެ 155 ގޮނޑި
އަންހެނުންނަށް ހާއްސަކޮށްފައިވާ 142 ގޮނޑި
ޕީޕީއެމް (325 ގޮނޑި)
މޭޔަރު (މާލެ ސިޓީ)
ސިޓީ ކައުންސިލްގެ 16 ގޮނޑި
އަތޮޅު ކައުންސިލް ރައީސުންގެ 7 ގޮނޑި
ކައުންސިލްގެ ރައީސުންގެ 51 ގޮނޑި
ކައުންސިލް މެމްބަރުންގެ 121 ގޮނޑި
އަންހެނުންނަށް ހާއްސަކޮށްފައިވާ 129 ގޮނޑި
ޖުމްހޫރީ ޕާޓީން 115 ކެންޑިޑޭޓުން ވާދަކޮށް ކާމިޔާބުކުރީ 23 ގޮނޑި އެވެ. އަދާލަތު ޕާޓީން 28 ކެންޑިޑޭޓުން ކުރިމަތިލައި ކާމިޔާބުކުރީ 11 ގޮނޑި އެވެ. އެމްޑީއޭ އިން ވާދަކުރި 20 ގޮނޑީގެ ތެރެއިން 16 ގޮނޑިއެއް ނެގި އެވެ.
އަމިއްލަ ގޮތުން ކުރިމަތިލީ 600 މީހުން 173 ގޮނޑިއަށް އިންތިހާބުވި އެވެ.
ޖުމްހޫރީ ޕާޓީއަށް ކަށަވަރުވި ޖުމްލަ 26 ގޮނޑީގެ ތެރޭގައި ހިމެނެނީ ސިޓީ ކައުންސިލްތަކުން އެއް ގޮނޑި އާއި ތިން ރަށެއްގެ ކައުންސިލް ރައީސުންނާއި ކައުންސިލް މެމްބަރުންގެ ހަތް ގޮނޑި އާއި އަންހެނުންނަށް ހާއްސަކޮށްފައިވާ 15 ގޮނޑި އެވެ.
އެމްޑީއޭ އިން ކާމިޔާބުކުރި ޖުމްލަ 16 ގޮނޑީގެ ތެރޭގައި ހިމެނެނީ ތިން ރަށެއްގެ ކައުންސިލް ރައީސުންނާއި ކައުންސިލް މެމްބަރުންގެ ފަސް ގޮނޑިއަކާއި އަންހެނުންނަށް ހާއްސަކުރި 8 ގޮނޑި އެވެ.
އެމްއެސްއެލްޑީޕީ އަށް ކާމިޔާބުވީ އެންމެ ގޮނޑި އެކެވެ. އަދާލަތު ޕާޓީން ރަށު ކައުންސިލް ރައީސުންގެ ތިން ގޮނޑި އާއި އަތޮޅު ކައުންސިލްގެ ތިން ގޮނޑި އާއި ކައުންސިލް މެމްބަރު ކަމުގެ ފަސް ގޮނޑި އާއި އަންހެނުންނަށް ހާއްސަކުރި ފަސް ގޮނޑިއާ އެކު ޖުމްލަ 13 ގޮނޑި ކާމިޔާބުކުރި އެވެ.
އަމިއްލަ ގޮތުން ވާދަކުރި ކެންޑިޑޭޓުންގެ ތެރެއިން 3 މީހަކު ސިޓީ ކައުންސިލްތަކަށް ހޮވުނެވެ. އަދި 37 ރަށެއްގެ ރަށު ކައުންސިލް ކަމާއި ކައުންސިލް މެމްބަރު ކަމުގެ 71 ގޮނޑި އާއި އަންހެނުންނަށް ހާއްސަކުރި 62 ގޮނޑިއެއް ކާމިޔާބު ކުރި އެވެ.
71 ރަށު ކައުންސިލެއްގެ މެޖޯރިޓީ އެމްޑީޕީއަށް ލިބުނު. ޕީޕީއެމަށް 64 ރަށު ކައުންސިލެއްގެ މެޖޯރިޓީ ލިބުނު. ޖޭޕީއަށް 3 ރަށެއް، އަދާލަތަށް އެއް ރަށުގެ މެޖޯރިޓީ ލިބުނު އިރު 31 ރަށެއްގެ ކައުންސިލް މެޖޯރިޓީ އޮތީ އަމިއްލަ ކެންޑިޑޭޓުންނަށް. -- ޝަރީފް
ދާއިމީ ނަތީޖާ އިން ދައްކާ ގޮތުގައި ވޯޓުގައި އެއްވެސް ޕާޓީއަކަށް މެޖޯރިޓީ ނުލިބި ހަމަހަމަކޮށް އޮތީ ފ. އަތޮޅެވެ. މީގެ އިތުރުން ގދ. އަތޮޅުގެ މެޖޯރިޓީ ވެސް ވަކި ބަޔަކަށް ނުލިބެ އެވެ. އެކަމަކު އަތޮޅު ކައުންސިލްގައި ގިނައީ ޕީޕީއެމްގެ މެމްބަރުންނެވެ.
ހއ. އަދި ހދ. ގައި އެމްޑީޕީގެ ކެންޑިޑޭޓުން ގިނަ ނަމަވެސް އެއްވެސް ބަޔަކަށް މެޖޯރިޓީއެއް ނުލިބެ އެވެ. ތ. އަތޮޅުގެ ވެސް މެޖޯރިޓީ ނުނެގެ އެވެ. އެކަމަކު ގިނައީ ޕީޕީއެމްގެ ކައުންސިލަރުންނެވެ.
އިންތިހާބުގެ ވޯޓުގެ ނިސްބަތް
އެމްޑީޕީ: 43.4 ޕަސެންޓް
ޕީޕީއެމް: 38.2 ޕަސެންޓް
ޖޭޕީ: 2.8 ޕަސެންޓް
އަދާލަތު ޕާޓީ: 0.7 ޕަސެންޓް
އެމްޑީއޭ: 1.1 ޕަސެންޓް
އެމްއާރުއެމް: 0.2 ޕަސެންޓް
އަމިއްލަ ގޮތުން ވާދަކުރި ކެންޑިޑޭޓުން: 13.5 ޕަސެންޓް
އިންތިހާބުގައި ވޯޓުލުމުގެ ހައްގު ލިބިގެން ވަނީ 282،073 މީހުންނަށެވެ. މީގެތެރެއިން ވޯޓުލީ 186،253 މީހުންނެވެ. އެއީ، 94،306 ފިރިހެނުންނާއި 92،217 އަންހެނުންނެވެ.
އެންމެ މަދުން ވޯޓުލާން ނުކުތީ މާލެ، އައްޑޫ އަދި ޅ އަތޮޅުން
ކޮވިޑުގެ ބަލިމަޑުކަމުގެ ތެރޭގައި ބޭއްވި އިންތިހާބުގައި ވޯޓުލާން ނުކުންނާނީ އީސީން ކުރިން އަންދާޒާ ކުރި ގޮތުގައި 50 ޕަސެންޓަށް ވުރެން ދަށުންނެވެ. އެކަމަކު ހީކުރިވަރަށް ވުރެން މީހުން ގިނައިން ނުކުމެ މި އިންތިހާބުގައި ވޯޓުލުމުގެ ހައްގު ލިބިފައިވާ 68 ޕަސެންޓް މީހުން ވޯޓުލި އެވެ.
ޝަރީފް ވިދާޅުވީ މި އިންތިހާބުގައި ވޯޓުލާން އެންމެ މަދުން ނުކުތީ މާލެ އާއި އައްޑޫގެ އިތުރުން ޅ. އަތޮޅުން ކަމަށެވެ. ވޭތުވެދިޔަ ތިން ކައުންސިލް އިންތިހާބުގައި މާލޭ ސިޓީގެ ކައުންސިލްގެ އަޣުލަބިއްޔަތު އެމްޑީޕީން ނެގި ތާރީޚް ބަދަލުކޮށްލައި ޕީޕީއެމަށް މާލޭ ސިޓީގެ ގިނަ ގޮނޑިތައް ލިބުނު މި އިންތިހާބުގައި މާލެ އިން ވޯޓުލާފައި ވަނީ 39.19 ޕަސެންޓެވެ.
- އަތޮޅުތަކުން 68 ޕަސެންޓް މީހުން ވޯޓުލާން ނުކުތް.
- މާލޭގައި ވޯޓުލީ ހައްގުލިބިގެންވާ 39.19 ޕަސެންޓް މީހުން.
- އައްޑޫ ސިޓީގައި 47.08 ޕަސެންޓް.
- ކުޅުދުއްފުށި ސީޓިން 56.44 ޕަސެންޓް.
- ފުވައްމުލަކު ސިޓީން 75.41 ޕަަސެންޓް.
- ފ. އަތޮޅުން 82 ޕަަސެންޓް މީހުން ވޯޓުލާފައިވޭ.
- ދ. އަތޮޅުން 81 ޕަސެންޓް ވޯޓުލި.
- ވ. ފ. ދ. އަތޮޅުން ވެސް 80 ޕަސެންޓަށް ވުރެން މަތިން ވޯޓުލާފައިވޭ.
ޝަރީފް ވިދާޅުވީ މި އިންތިހާބުގައި މާބޮޑެތި މައްސަލަތަކެއް ދިމާނުވާ ކަމަށެވެ. އެކަމަކު މި އިންތިހާބުގައި ބާތިލް ވޯޓުގެ ނިސްބަތް ގިނަ އެވެ. އެއީ، 10-12 ޕަސެންޓު ކަމަށް އަންދާޒާ ކުރެވޭ ކަމަށާއި ބާތިލް ވޯޓު ގިނަވީ ދެ އިންތިހާބު އެކީގައި ބޭއްވުމާއި ބަލިމަޑުކަމުގެ ތެރޭގައި އިންތިހާބު ބޭއްވުމުން އާއްމުން ހޭލުންތެރިކުރަން ވަގުތު ނުލިބުމުން ކަމަށް އޭނާ ވިދާޅުވި އެވެ.
