ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ދާއިރާތަކުގެ އިންތިހާބަށް ކުރިމަތިލުމުގެ ފުރުސަތު އެ ޕާޓީގެ ފަރާތުން މިއަދު ހުޅުވާލައިފި އެވެ.
އަންނަ މަހު 29 ގައި ބާއްވަން ހަމަޖައްސާފައިވާ އިންތިހާބުގައި ދާއިރާތަކާއި ޕްރޮވިންސްތަކާއި ސިޓީތަކުގެ ރައީސާއި ނައިބު ރައީސުން ހޮވުމަށް ވަނީ ހަމަޖެހިފަ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެމްޑީޕީގެ ތަރުޖަމާނު އިމްތިޔާޒް ފަހުމީ ވިދާޅުވީ ކުރިއަށް އޮތް އިންތިހާބުގައި 455 މެންބަރުން ހޮވުމަށް ހަމަޖެހިފައިވާ ކަމަށެވެ.
"އެއީ އެނގިވަޑައިގަންނަވާނެ ޕާޓީއެއްގެ އެތެރޭގެ އިންތިހާބަކާ ބަލާފަ، މި މިންވަރަކަށް މިހާ ގިނަ އަދަދެއްގެ ފަރާތްތައް ހޮވާ އެހެން ޕާޓީއެއް ނެތް އަޅުގަނޑުމެން އެމްޑީޕީ ފިޔަވާ،" އިމްތިޔާޒް ވިދާޅުވި އެވެ.
އިމްތިޔާޒް ވިދާޅުވީ މި އިންތިހާބުގައި ވޯޓުލެވޭނީ މި މަހުގެ 18 ގެ ނިޔަލަށް އެ ޕާޓީގެ ދަފްތަރުގައި ރަޖިސްޓްރީވެފައިވާ މީހުންނަށް ކަމަށެވެ. މިހާރު އެ ޕާޓީގެ ދަފްތަރުގައި 93،354 މީހުން ރަޖިސްޓްރީވެފައިވާ ކަމަށް ވެސް އޭނާ ވިދާޅުވި އެވެ.
ޕާޓީގެ މަގާމުތަކަށް ކުރިމަތިލާ އެންމެން ވެސް ތާއީދު އޮތްކަން ސާބިތުކޮށްދޭންޖެހެ އެވެ. އެގޮތުން އާންމު ދާއިރާތަކުގެ ރައީސާ ނައިބު ރައީސުންނަށް ކުރިމަތިލޭ މީހުން ދާއިރާގެ ޕާޓީ މެންބަރުންގެ 50 ސޮއި ހަމަ ކުރަންޖެހެ އެވެ. އަދި ސިޓީތަކާއި ޕްރޮވިންސްތަކަށް ކުރިމަތިލާ ކެންޑިޑޭޓުން 200 މީހުންގެ ސޮއި ހޯދަންޖެހެ އެވެ.
ދާއިރާތަކުގެ އިންތިހާބުގައި ވޯޓު ފޮށި ބަހައްޓާނީ މީހުން ދިރިއުޅޭ ރަށްރަށުގައި އެކަނި ކަމަށް އެމްޑީޕީން ބުންޏެވެ. އަދި ދަފްތަރުގައި ހިމެނޭ އެންމެނަށް ރީ-ރަޖިސްޓްރީވުމަކާ ނުލައި ވޯޓު ދެވޭނެ ކަމަށް ޕާޓީން ބުނެ އެވެ.
އޮންލައިންކޮށް އަދި އެމްޑީޕީ މައި އޮފީހަށް ގޮސް ގެން ވެސް ކެންޑިޑެސީ ފޯމު ހުށަހެޅިދާނެ އެވެ. އެކަމަކު ކޮންމެ ގޮތަކަށް ހުށަހެޅި ނަމަވެސް ޕާޓީ މެންބަރުގެ ތާއީދު ސޮއި ހިމެނޭ އެކްސެލް ޝީޓެއް ފޯމާއެކު ޕާޓީ އޮފީހަށް ދޭންޖެހެ އެވެ.
އެމްޑީޕީ ދާއިރާތަކުގެ ރައީސުންނަކީ އެ ޕާޓީގެ ގައުމީ މަޖިލީހުގައި ހިމެނޭ މެންބަރުންނެވެ. ގައުމީ މަޖިލީހަކީ ޕާޓީގެ އެންމެ ބާރުގަދަ ގުނަވަނެވެ. ދާއިރާތަކުގެ ރައީސުންގެ ގޮތުގައި އެ މަޖިލީހުގައި ތިއްބެވި ބައެއް ބޭފުޅުންނަކީ މިހާރު ރައްޔިތުންގެ މަޖިލީހުގެ މެންބަރުންނެވެ.
އެމްޑީޕީ ދާއިރާތަކުގެ އިންތިހާބުގެ ޓައިމްލައިން
18 އޭޕްރިލް 2021 – ދާއިރާތަކުގެ އިންތިހާބު އިއުލާން ކުރުން
24 އޭޕްރިލް 2021 – ދާއިރާތަކުގެ މަގާމްތަކަށް ކުރިމަތިލުމަށް ފުރުސަތު ހުޅުވާލުން
24 އޭޕްރިލް 2021 – ވޯޓާސް ލިސްޓް އާންމު ކުރުމާއި ލިސްޓަށް ޝަކުވާ ހުށަހެޅުމަށް ހުޅުވާލުން
28 އޭޕްރިލް 2021 – ވޯޓާސް ލިސްޓަށް ހުށަހަޅާ ޝަކުވާ ބަލައިގަތުމުގެ މުއްދަތު ހަމަވުން (ހަވީރު 4.00 އަށް)
05 މެއި 2021 – ފައިނަލް ވޯޓާސް ލިސްޓް އާންމު ކުރުން
08 މެއި 2021 – ކެންޑިޑޭޓުން ވާދަ ކުރުމުގެ ފޯމް ބަލައިގަތުމުގެ މުއްދަތު ހަމަވުން (ތާއީދު ފޯރމް އާއިއެކު) (ހަވީރު 4.00 އަށް)
09 މެއި 2021 – ކެންޑިޑޭޓް މަންދޫބުންނަށް ފުރުސަތު ހުޅުވާލުން
12 މެއި 2021 – ކެންޑިޑޭޓް މަންދޫބުންނަށް ފުރުސަތު ބަންދުވުން (ހަވީރު 4.00 އަށް)
12 މެއި 2021 – ކެންޑިޑޭޓުންގެ ފައިނަލް ލިސްޓު ކެންޑިޑެސީ ނަންބަރާ އެކު އިއުލާން ކުރުން
29 މެއި 2021 – ވޯޓުލާ ދުވަސް
