ހިޔާ ފްލެޓްތަކަށް ގުރުއަތުލުން އާދިއްތަ ދުވަހު އަލުން ފަށަނީ

ހިޔާ ފްލެޓުތައް ލިބިފައިވާ މީހުންނަށް ލިބެނީ ޮން ފްލެޓެއްތޯ ކަނޑައަޅަން ބާއްވާ ގުރުއަތުލުން އަންނަ އާދިއްތަ ދުވަހު އަލުން ފަށާނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފި އެވެ.

މިހާތަނަށް ގުރުއަތު ނަގާފައި ވަނީ ނުކުޅެދުންތެރިކަން ހުންނަ ފަރާތްތަކަށް ހާއްސަ އެޗް-10 ކެޓެގަރީން އެކަންޏެވެ. އެޗްޑީސީން ގުރުއަތުލުން މެދުކަނޑާލީ ހައުސިން މިނިސްޓްރީން ފައިނަލް ލިސްޓު ނުލިބިގެންނެވެ.

މިއަދު ކުރި އިއުލާނެއްގައި އެޗްޑީސީން ބުނީ، ބާކީ ހުރި ކެޓެގަރީތަކުގެ ގުރުއަތުލުން އާދިއްތަ ދުވަހުގެ ހެނދުނު 9:00 ގައި ފަށާނެ ކަމަށެވެ. ދެ ދަންފަޅިއަކަށް ބަހާލައިގެން ކުރިއަށް ގެންދާ ގުރުއަތުލުންތަކުގައި ބާކީ ހުރި ކެޓެގަރީތަކުން ގުރުއަތު ލާނެ އެވެ.

ގުރުއަތު ނަގާ ކެޓެގަރީތައް:

• އެޗް4 (ޑޮކްޓަރުންނާއި ނަރުހުންނަށް ހާއްސަ)،
• އެޗް5 (ޓީޗަރުންނަށް ހާއްސަ)،
• އެޗް6 (އެކަނިވެރި މައިންނާއި ބަފައިންނަށް ހާއްސަ)،
• އެޗް7 (18 އަހަރާއި 40 އަހަރާ ދެމެދުގެ ކައިވެނިކޮށްގެން އުޅޭ ފަރާތްތަކަށް ހާއްސަ)،
• އެޗް8 (މާލޭ ރަށްވެހިންނަށް ޙާއްޞަ)
• އެޗް9 (މުނިސިޕަލްޓީ ދަފްތަރުގައި ރަޖިސްޓްރީ ވެފައިވާ ފަރާތްތަކަށް ޙާއްޞަ)
• ސިވިލް ސަރވިސް މުވައްޒަފުންނަށް ޙާއްޞަ (ފަންނީ، އިދާރީ، ސަޕޯޓް)

މީގެ އިތުރުން އަރަބިއްޔާ އަދި ގާކޮށިން ފުލެޓު ލިބި ފައިސާ ނުދެއްކުނު ފަރާތްތަކުގެ ތެރެއިން ހިޔާ މަޝްރޫއު އިހުތިޔާރު ކުރި މީހުންނާއި ގުޅީފަޅުން ފުލެޓް ގަނެފައިވާ ފަރާތްތަކުގެ ތެރެއިން ހިޔާ ފުލުޓް ހިޔާރުކޮށްފައިވާ މީހުންގެ ގުރުއަތުލުން ވެސް އޮންނާނެ ކަމަށް އެޗްޑީސީން ބުންޏެވެ.

ގުރުއަތު ނަގަން ހަމަޖެހިފައިވާ ގޮތް

ޓީވީން ލައިވްކޮށް ދުރަށް ދައްކާ މި ގުރުއަތުލުން ފެންނާނީ ދައުލަތުގެ މީޑިއާ ޕީއެސްއެމް އިންނެވެ. ގުރުއަތު ނެގުމުގެ ފުރަތަމަ ދަންފަޅި ކުރިއަށް ދާނީ ހެނދުނު 9:00 އިން ފެށިގެން މެންދުރު 12:00 އަށެވެ. އަދި ދެވަނަ ދަންފަޅި ކުރިއަށް ދާނީ މެންދުރުފަހު 13:00 އިން ފެށިގެން 15:00 އަށެވެ.

އެޗްޑީސީން ބުނީ ގުރުއަތު ނަގާނީ އެ ކޯޕަރޭޝަނަށް ލިބިފައިވާ ފްލެޓް ލިސްޓުގައި ހިމެނޭ މީހުންގެ އައިޑީ ކާޑު ތަރުތީބުން ކަމަށެވެ.

މި ގުރުއަތުލުން ކުރިއަށްދާ ވަގުތު އެ މީހަކަށް ލިބުނު ފްލެޓް ހުންނަ ޓަވަރު، ފްލޯ އަދި ފްލެޓް އިނގޭނެހެން ޓީވީ ސްކްރީނުން ފެންނަން ހުންނާނެ އެވެ. އޭގެ އިތުރުން ފްލެޓް ފޯމުގައިވާ އެ މީހެއްގެ ފޯނު ނަމްބަރަށް މެސެޖަކުން މި މައުލޫމާތު ލިބޭނެ އެވެ.

ފްލެޓް ލިބުނު އެންމެންނަށް ފްލެޓްތައް ހަވާލުކޮށް ނިމެންދެން، ސަރުކާރު ބަންދުނޫން ކޮންމެ ދުވަހަކު ގުރުއަތުލުން ކުރިއަށް ދާނެ އެވެ. ކޮވިޑުން ރައްކާތެރިވުމަށް އެޗްޕީއޭ އިން ކަނޑައަޅާފައިވާ އުސޫލުތަކާއި ގުޅިގެން ގުރުއަތު ނަގާ ހޯލަށް ވަދެވޭނީ ދައުވަތު ދެވޭ އޮބްޒާވަރުންނަށް އެކަންޏެވެ.

އެޗްޑީސީން ބުނީ ފްލެޓް އެގްރީމަންޓުތަކުގައި ސޮއިކޮށް، ތަޅުދަނޑިތައް ހަވާލު ކުރާނެ ތާރީހެއް ފަހުން އިއުލާން ކުރާނެ ކަމަށެވެ.

ހިޔާ ފްލެޓްތައް ލިބެނީ ދޮރާއި ބޮއްކާއި ޓައިލްސް ހަރު ނުކޮށެވެ. އެހެންކަމުން މި ފްލެެޓްތަކުގެ ތަޅުދަނޑި ހަވާލުކުރާ ދުވަހުން ފެށިގެން ތިން މަސް ދުވަސް މި މަސައްކަތް ކުރަން ލިބެ އެވެ. މި މުއްދަތުގައި ކުލި ނުނަގާނެ ކަމަށް ސަރުކާރުން އިއުލާނު ކޮށްފައިވާ އިރު، ހިޔާ ފްލެޓެއްގެ ކުލި 7000ރ. އަށް ވުރެ ބޮޑު ނުވާނެ ކަމަށް ބުންޏެވެ.

މި ފްލެޓްތައް ހަވާލު ނުކުރެވި ގިނަ ދުވަސްވާ މައްސަލާގައި ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ.