އެމްޑީޕީގެ ގައުމީ މަޖިލިސް އިންތިހާބުގައި ދާއިރާތަކުގެ ރައީސުންނާ އެކު މަގާމްތަކަށް ކުރިމަތިލުމުގެ ފުރުސަތު އަންނަ ހޮނިހިރުދުވަހު ހުޅުވާލާނެ ކަމަށް އެ ޕާޓީން މިއަދު ބުނެފި އެވެ.
ގައުމީ މަޖިލިސް އިންތިހާބު ބާއްވަން ނިންމާފައި ވަނީ އަންނަ މަހުގެ 29ގަ އެެވެ.
އެމްޑީޕީން ކުރި އިއުލާނެއްގައި ބުނެފައި ވަނީ ވޯޓު ލުމުގެ ހައްގު ލިބިގެންވާ މީހުންގެ ލިސްޓު ވެސް އަންނަ ހޮނިހިރު ދުވަހު އާންމު ކުރާނެ ކަމަށެވެ. އަދި އެ ލިސްޓަށް ހުށަހަޅާ ޝަކުވާތައް އޭޕްރިލް 28 ވަނަ ދުވަހުގެ ހަވީރު ހަތަރެއް ޖެހުމާ ހަމަޔަށް ބަލައިގަންނާނެ އެވެ.
އިންތިހާބުގައި ވާދަކުރާ ކެންޑިޑޭޓުންގެ ފައިނަލް ލިސްޓު އާއްމުކުރަން ނިންމާފައި ވަނީ މެއި، 12 ގަ އެވެ. ލޯކަލް ކައުންސިލްތަކުގެ އިންތިހާބު ނިމުމާ އެކު އެމްޑީޕީގެ ބައެއް މެމްބަރުން ވަނީ ގައުމީ މަޖިލީހުގެ ކެމްޕެއިން ފަށާފަ އެވެ. ސަރުކާރުގެ އިސް މަގާމުގައި ތިބި މީހުން ވެސް މި އިންތިހާބުގައި ވާދަ ކުރާނެކަން ވަނީ އިއުލާން ކޮށްފަ އެވެ.
އެމްޑީޕީގެ ގައުމީ މަޖިލީހަކީ އެ ޕާޓީގެ ނިންމުންތައް ނިންމާ އެންމެ މުހިންމު އެއް ތަނެވެ.
