މިއާމީ (އޭޕްރީލް 18) - މަޝްހޫރު ފުޓްބޯޅަ ލެޖެންޑް ޑޭވިޑް ބެކަމްގެ ހިއްސާ އޮންނަ އެމެރިކާގެ ކްލަބް އިންޓަ މިއާމީ އެފްސީން މިދިޔަ އަހަރު ފްރާންސްގެ މިޑްފީލްޑަރު ބްލައިސް މަޓުއިޑީގެ ސޮއި ހޯދިއިރު، ގަވައިދާ ހިލާފަށް ހަރަދުކޮށްފައިވާ މައްސަލައެއް ފެންމަތިވެއްޖެ އެވެ.
އެމެރިކާ ލީގު އެމްއެލްއެސްގެ ބިދޭސީ ކުޅުންތެރިންގެ ގަވައިދުގައިވާ ގޮތުން ބޮޑު ހަރަދުކޮށްފައި ހާއްސަ ތިން ޖާގަ އަކަށް ތިން ކުޅުންތެރިއަކު ގެނެވިދާނެ އެވެ. އެ ކުޅުންތެރިންނަށް މުސާރައިގެ ލިމިޓެއް ނޯންނާނެ އެވެ. މި ގަވައިދަކީ 2007 ވަނަ އަހަރު ބެކަމް އެމެރިކާގެ ގެލެކްސީ އަށް ސޮއިކުރިއިރު، އުސޫލެއް ހެދުމުގެ ގޮތުން އެމްއެލްއެސް އިން އެކުލަވާލި ގަވާއިދެކެވެ.
ހާއްސަ ޖާގައިގެ ތެރެއިން ތިން ކުޅުންތެރިން ރަޖިސްޓްރީކުރި ފަހުން އިންޓަ މިއާމީން މަޓުއީޑީ ވެސް ހިމެނީ އެ ސްލޮޓްގަ އެވެ. އަދި އެ ސްލޮޓުގައި ހިމަނައިގެން މަޓުުއިޑީ ގެންނަން ކޮށްފައިވާ ހަރަދާއި އޭނާ އަށް ދިން މުސާރަ އަކީ އުސޫލުން ބޭރުކޮށްފައިވާ ކަމެއް ކަމަށް އެމްއެލްއެސް އިން ވަނީ ނިންމައިފަ އެވެ. މި މައްސަލައިގައި އިންޓަ މިއާމީއާ މެދު އަޅާނެ ފިޔަވަޅެއް މިހާރު އެމްއެލްއެސްގެ ޑިސިޕްލިނަރީ ކޮމިޓީން އަންނަނީ މަޝްވަރާކުރަމުންނެވެ.
އިންޓަ މިއާމީން މި ސީޒަނަށް ހާއްސަ ތިން ޖާގައިގެ ތެރޭގައި ހިމަނާފައިވަނީ އުމުރުން 34 އަހަރުގެ މަޓުއީީޑީގެ އިތުރުން ޔޫރަޕްގެ ނަން މަޝްހޫރު ކްލަބްތަކަށް ކުޅެފައިވާ އާޖެންޓީނާގެ ފޯވާޑް ގޮންޒާލޯ ހިގައިން އާއި މެކްސިކޯގެ މިޑްފީލްޑަރު ރަޑޯލްފޯ ޕިޒާރޯ އެވެ.
ދާދި ފަހުން އިންޓަ މިއާމީން ވަނީ ކޯޗަކަށް އިންގްލްންޑްގެ ކުރީގެ ކުޅުންތެރިޔާ ފިލިޕް ނެވިލް ހަމަޖައްސައިފަ އެވެ. ފިލިޕް ނެވިލް އެންމެ ފަހުން ހަވާލުވެ ހުރީ އިންގްލެންޑްގެ އަންހެން ޓީމާ އެވެ.
