މިލާން (އޭޕްރީލް 17) - އޭސީ މިލާނަށް ކުޅެމުން އަންނަ ކްރޮއޭޝިއާގެ ތަޖުރިބާކާރު ފޯވާޑް މާރިއޯ މަންޒުކިޗް އަނިޔާގައި ހުރުމުން މިދިޔަ މަހުގައި ނުކުޅެވޭތީއާ އެކު އެ މަހުގެ މުސާރަ ޗެރިޓީ އަށް ދީފި އެވެ.
އުމުރުން 34 އަހަރުގެ މަންޒުކިޗް މިދިޔަ ޖެނުއަރީ މަހު މި ސީޒަނުގެ ނިޔަލަށް ކޮންޓްރެކްޓް ހަދައި މިލާނަށް ކުޅެން ނިންމި ނަމަވެސް އަނިޔާގެ ސަބަބުން އޭނާ އަށް ގިނަ މެޗުތަކެއް ވަނީ ގެއްލިފަ އެވެ. މިދިޔަ މަހު އެއްކޮށް ކަހަލަ ގޮތަކަށް އަނިޔާގައި ހުރި މަންޒުކިޗް ވަނީ އޭނާ އަށް އެ މަހުގައި ކްލަބުން ދޭ މުސާރަ އެއްކޮށް މިލާން ފައުންޑޭޝަނަށް ހަދިޔާކޮށްފަ އެވެ.
ކްރޮއޭޝިއާގެ މީޑިއާ ރިޕޯޓްތައް ބުނާގޮތުން މަންޒުކިޗްގެ އެއް މަހުގެ މުސާރަ އަކީ 300،000 ޔޫރޯ އެވެ.
މިލާނަށް ބަދަލުވި ފަހުން މަންޒުކިޗް ކުޅެފައިވަނީ އެންމެ ހަތަރު މެޗެވެ. އެކަމަކު ކޮންޓްރެކްޓްގައިވާ ގޮތުން އޭނާ އަށް ނުކުޅެވުނު ކަމުގައި ވިޔަސް ބަރާބަރަށް މުސާރަ ދޭން ޖެހެ އެވެ. އާންމު ގޮތެއްގައި ދުވަސްވީ ކުޅުންތެރިންނާ އެކު ބައެއް ކްލަބްތަކުން ކޮންޓްރެކްޓް ހަދަނީ މެޗުތަކުގައި ކުޅޭނަމަ މުސާރަ ހިނގާގޮތަށެވެ.
މާޗް މަހުގެ މުސާރަ ޗެރިޓީ އަށް ދޭން މަންޒުކިޗް ނިންމި ނިންމުމަށް މިލާންގެ ރައީސް ޕައޮލޯ ސްކަރޯނީ ވަނި މަރުހަބާ ކިޔައިފަ އެވެ. ސްކަރޯނީ ވިދާޅުވީ މިލާން ފައުންޑޭޝަނަކީ ފާއިތުވި އަހަރުތަކުގައި ގިނަ ގޮތްގޮތުން އެކި މީހުންނަށް އެހީވެފައިވާ ފައުންޑޭޝަނެއް ކަމަށާއި އެ ފަދަ ކަމަކަށް އެހީވާން އުނދަގޫވަގުތެއްގައި މަންޒުކިޗް ނިންމި ނިންމުން ފާހަގަކުރާ ކަމަށެވެ.
މަންޒުކިޗް އެންމެ ފަހުން މެޗެއްގައި ކުޅުނީ މިދިޔަ މާޗް މަހު 18 ވަނަ ދުވަހު ޔޫރޮޕާ ލީގުގައި ރެޑްސްޓާ ބެލްގްރޭޑާ ދެކޮޅަށެވެ. މިލާނުން އެންމެ ފަހުން ޕާމާ އަތުން 3-1 އިން މޮޅުވި މެޗުގައި މަންޒުކިޗް އިނީ ބެންޗުގަ އެވެ.
