ށ. ފޯކައިދޫގެ އަތިރިމަތީގައި ފިޔާތޮށި ކުލަ ލާފައި ހުރި ރުކެއް އެމްޑީޕީގެ އެކްޓިވިސްޓުންތަކެއް ކަނޑާލި ވީޑިއޯ ސޯޝަލް މީޑިއާގައި މިއަދު ވައިރަލްވުމާ އެކު ގިނަ ބައެއްގެ ފާޑުކިއުން އަމާޒުވި އެވެ.
އެމްޑީޕީގެ ވާދަވެރި ޕާޓީ، ޕީޕީއެމްގެ ކުލަ ލާފައި ހުރި ރުކެއް ކަނޑާލުން އެއް ބަޔަކު ސިފަކުރީ "ދަށު ދަރަޖައިގެ އަމަލެއްގެ" ގޮތުގަ އެވެ. ގިނަ ބައަކު އެއްވެ ތިބެ އެ ރުއް ކަނޑާލުންވީ ޕީޕީއެމަށް އަމާޒުކުރި "ހަމަލައަކަށެ"ވެ. އެކަން ކުރީ ޕާޓީގެ ލީޑަޝިޕުން އެފަދަ އަމަލުތަކަށް ހިތްވަރުދޭތީ ކަމުގެ ތުހުމަތު ވެސް ކުރި އެވެ.
ވެރިކަން ކުރާ ކޯލިޝަންގެ މައި ޕާޓީ، އެމްޑީޕީ އަށް މި މައްސަލައިގައި ފާޑުކިއުން އަމާޒުވެފައި ވަނިކޮށް އެ ޕާޓީން ވަނީ ރުއް ކަނޑާލި މީހުންގެ އަމަލު ކުށްވެރި ކޮށްފަ އެވެ.
އެމްޑީޕީގެ ރަސްމީ ޓުވިޓާ އެކައުންޓުން ކުރި ޓުވީޓެއްގައި ބުނީ އެފަދަ އަމަލުތަކަށް އެމްޑީޕީން ހިތްވަރު ނުދޭނެ ކަމަށެވެ. އެމްޑީޕީގެ އެއްވެސް މެމްބަރަކާއި ޕާޓީއަށް ތާއީދުކުރާ މީހުން ވެސް އެފަދަ ކަންކަން ނުކުރުމަށް އެމްޑީޕީން އެދެ އެވެ.
އަތިރިމައްޗަށް އެމްޑީޕީގެ ގިނަ ސަޕޯޓަރުންތަކެއް އެއްވެފައި ވަނިކޮށް، އަތިރިމަތީގައި ހުރި ރުކެއް ކަނޑާލީ ތަކުބީރު ގޮވަމުންނެވެ. އެ ރުއް ބިމާ ހަމަކޮށް އެ މީހުން ދެއްކީ ޕީޕީއެމާ މެދު އޮތް ރުޅިވެރި ކަމެވެ.
