މިއުނިކް (އޭޕްރީލް 16) - ބޮރޫޝިއާ ޑޯޓްމަންޑަށް ކުޅެމުން އަންނަ ޒުވާން ތަރި ޖޫޑް ބެލިންހަމް އަކީ 17 އަހަރުގެ ކުޅުންތެެރިއެއް ކަމަށް ގަބޫލުކުރަން އުނދަގޫ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
އިނގިރޭސި އުމުރުފުރާ ގައުމީ ޓީމުތަކާއި ސިނިއާ ޓީމަށް ވެސް ދާދި ފަހުން ކުޅެފައިވާ ބެލިންހަމް ވަނީ ޗެމްޕިއަންސް ލީގުގެ ކުއާޓާ ފައިނަލުގައި ސިޓީ ކޮޅަށް ޑޯޓްމަންޑުން ކުޅުނު ދެ ލެގުގައި ވެސް މޮޅު ކުޅުމެއް ދައްކައިފަ އެވެ. ސިޓީ ދަނޑުގައި ބެލިންހަމް ޖެހި ގޯލެއް ރެފްރީ ބަލައިނުގަތް ނަމަވެސް ޑޯޓްމަންޑް ދަނޑުގައި ބުދަ ދުވަހުގެރޭ ކުޅުނު ދެ ވަނަ ލެގުގައި ބެލިންހަމް ވަނީ ގޯލު ޖަހައިފަ އެވެ. މިއީ ޗެމްޕިއަންސް ލީގުގައި އޭނާ ކާމިޔާބުކުރި ފުރަތަމަ ގޯލެވެ.
އެ މެޗަށް ފަހު ގާޑިއޯލާ ވަނީ ބެލިންހަމަށް ވަރަށް ބޮޑަށް ތައުރީފުކޮށްފަ އެވެ. ގާޑިއޯލާ ބުނީ އާންމު ގޮތެއްގައި 17 އަހަރުގެ ކުޅުންތެރިއެއްގެ ކިބައިގައި ހުންނަ ހުނަރަށް ވުރެ ބެލިންހަމް ތަފާތު ކަމަށެވެ.
"17 އަހަރުގެެ ކުޅުންތެރިއަކުގެ ފަރާތުން ފެންނަ ވަރަށް ވުރެ މާ މޮޅު ކުޅުމެއް މި ދެ މެޗުގައި އޭނަ ދައްކައިފި. އަހަންނަށް ހީވަނީ އޭނަ އެ ހަނދަނީ ދޮގު ހެން އުމުރާ ބެހޭގޮތުން،" ސަމާސާ ގޮތަކަށް ގާޑިއޯލާ ބުންޏެވެ.
"ވަގުތުތަކެއް ދިޔަ ޑޯޓްމަންޑްގެ ޑިފެންޑަރުން ބެލިންހަމަށް ޕާސް ނުދޭތީ އޭނަ ބާރަށް ދަނޑުމަތީގައި ބުނަމުންދިޔައީ އޭނަ އަށް ޕާސް ދޭން. މިއީ 17 އަހަރުގެ ކުޅުންތެރިއަކު ފަރާތުން އަހަންނަށް މަދުން ނޫނީ ފެނިފައި ނެތް ކަމެއް. އަހަރެން މެޗަށް ފަހު ޑޯޓްމަންޑްގެ ކޯޗު އެޑިން ގާތުގައި އެހިން އޭނަ (ބެލިންހަމް)ގެ ވާހަކަ. އެޑިން ބުނީ މި މެޗުތަކުގައި އެ ފެންނަނީ ޓްރެއިނިންގައި ވެސް ފެންނަ ކަންތައްތައް ކަމަށް. މިއީ ތަފާތު ކަމެއް،"
އިންގްލެންޑްގެ ޒުވާން ޓީމުގެ މެޗެއްގެ ތެރެއިން ބެލިންހަމް ބޯޅަ ހިފައިގެން.-- ފޮޓޯ: އޭއެފްޕީ
ޖޫން 29 ވަނަ ދުވަހު 18 އަހަރު ފުރޭ ބެލިންހަމް މި ފަހަރު ޔޫރޯ ފުޓްބޯޅަ މުބާރާތުގައި ވާދަކުރާ އިންގްލެންޑް ޓީމުގައި ހިމެނުމުގެ ފުރުސަތު ބޮޑެވެ. އޭނާ ވަނީ އުމުރުން 17 އަހަރުގައި ޗެމްޕިއަންސް ލީގުގެ 10 މެޗެއްގައި ކުޅެ މުބާރާތުގެ ތާރީހުގައި އެކަން ހާސިލްކުރި ދެ ވަނަ ކުޅުންތެރިޔާގެ ޝަރަފް ހޯދައިފަ އެވެ.
ބެލިންހަމް އަކީ ކާކު؟
ގިނަ ބަޔެއްގެ ސަމާލުކަން ބެލިންހަމް އަށް ހުއްޓުނު އެންމެ ބޮޑު ސަބަބަކީ މިދިޔަ އަހަރުގެ ޖެނުއަރީ މަހު މެންޗެސްޓާ ޔުނައިޓެޑުން އޭނާ އަށް 20 މިލިއަން ޕައުންޑްގެ ބިޑެއް ކުރުމުންނެވެ. އިނގިރޭސި ދެ ވަނަ ޑިވިޝަނުގެ ބާމިންހަމް ސިޓީ އަށް ކުޅެމުން އައި އޭރު އުމުރުން 16 އަހަރުގެ ބެލިންހަމް އަށް ޔުނައިޓެޑުން ބޮޑު ބިޑެއް ކުރުމާ އެކު ބެލިންހަމާ ބެހޭ މައުލޫމާތު އެއްކުރަން ގިނަ ބަޔަކު ޝައުގުވެރިވި އެވެ. އެކަމަކު ސީޒަނެއްގެ މެދުތެރެއިން ބެލިންހަމް ވިއްކާލަން ބާމިންހަމުން ބޭނުމެއްނުވި އެވެ.
ޔުނައިޓެޑުން ސީޒަން ނިމުމުން ބެލިންހަމަށް އަލުން ބިޑްކުރާނެ ކަމަށް ބެލެވުނު ނަމަވެސް އެކަން އެންމެ އަަވަހަށް ކުރީ ޑޯޓްމަންޑުންނެވެ. މިދިޔަ އަހަރުގެ ޖުލައި މަހު ޑޯޓްމަންޑުން ބެލިންހަމްގެ ސޮއި ހޯދީ 25 މިލިއަން ޕައުންޑްގެ ފީ އެއް ދައްކަން އެއްބަސްވުމަށް ފަހު އެވެ.
މި ސީޒަނުގައި ޑޯޓްމަންޑަށް ކުޅެމުން ބެލިންހަމް ވަނީ ގިނަ ރެކޯޑްތަކެއް މުގުރާލައިފަ އެވެ. އޭގެ ތެރޭގައި ޖަރުމަނު ކަޕްގެ ތާރީހުގައި އެ މުބާރާތުގައި ލަނޑު ޖެހި އުމުރުން އެންމެ ޒުވާން ކުޅުންތެރިޔާގެ މަގާމުގެ އިތުރުން ޑޯޓްމަންޑަށް ވާދަވެރި މެޗެއްގައި ކުޅުނު އެންމެ ޒުވާން ކުޅުންތެރިޔާގެ ރެކޯޑް ހިމެނެ އެވެ. މީގެ އިތުރުން ޗެމްޕިއަންސް ލީގުގެ މެޗެއްގައި ކުޅުނު އިންގްލެންޑަށް ނިސްބަތްވާ އެންމެ ޒުވާން ކުޅުންތެރިޔާގެ ޝަރަފް ވެސް ބެލިންހަމް ހޯދި އެވެ. ކުރިން މި ރެކޯޑް އޮތީ މެންޗެސްޓާ ސިޓީގެ ފިލް ފޯޑެން އަތުގަ އެވެ.
