ޒިއުރިކް (އޭޕްރީލް 15) - ޔޫރޮޕާ ލީގުގެ ކުއާޓާ ފައިނަލުގެ ފުރަތަމަ ލެގުގައި މިދިޔަ ހަފްތާގައި ގްރަނާޑާއާ ދެކޮޅަށް ކުޅުނު މެޗުގައި މެންޗެސްޓާ ޔުނައިޓެޑްގެ ފަސް ކުޅުންތެރިއަކަށް ރީނދޫ ކާޑު ދައްކާފައިވާތީ ޔުއެފާ އިން އެ ޓީމު ޖޫރިމަނާކޮށްފި އެވެ.
ގްރަނާޑާ ދަނޑުގައި 2-0 އިން ޔުނައިޓެޑް މޮޅުވި މެޗުގައި މެޗުގައި އެ ޓީމުގެ ހެރީ މެގުއާ، ލޫކް ޝޯ، ސްކޮޓް މެކްޓޮމިނޭ، ޕައުލް ޕޮގްބާ، އަދި ނަމަންޏާ މަޓިޗް އަށް ވަނީ ރީނދޫ ކާޑު ދައްކައިފަ އެވެ. ފަސް ރީނދޫ ކާޑު ދެއްކުމާ އެކު ޔުއެފާގެ ކޮންޓްރޯލް، އެތިކްސް އެންޑް ޑިސިޕްލިނަރީ ބޯޑުން ވަނީ ޔުނައިޓެޑްގެ މައްސަލަ ބަލައި އެ ކްލަބް 7000 ޔޫރޯ (8,387 ޑޮލަރު) އިން ޖޫރިމަނާކޮށްފަ އެވެ. އަދި ޖޫރިމަނާ ދައްކަން ވަނީ 90 ދުވަހުގެ މުއްދަތެއް ދީފަ އެވެ.
ފުރަތަމަ ލެގުގައި ދެއްކި ކާޑުތަކުގެ ސަބަބުން މެގުއާ އާއި ޝޯ އަދި މެކްޓޮމިނޭ އަށް މިރޭ ޔުނައިޓެޑް ދަނޑުގައި ކުޅޭ ދެ ވަނަ ލެގުގައި ނުކުޅެވޭނެ އެވެ.
ޔުނައިޓެޑްގެ ކޯޗު އޮލެ ގުނަ ސޯލްޝެއާގެ ނަޒަރުގައި އޭނާގެ ޓީމަށް ފަސް ރީނދޫ ކާޑު ދެއްކުން ހައްގެއް ނޫނެވެ. އޭނާ ބުނީ އެ މެޗުގެ ރެފްރީ އަށް އެ ކަންތައްތައް އެ އަށް ވުރެ ރަނގަޅަށް ހައްލުކުރެވޭނެ ކަމަށެވެ.
"ޓީމުގެ މުހިއްމު ތިން ކުޅުންތެރިއަކު ނުލައި ކުޅެން ޖެހުން އެއީ ފަސޭހަކަމަކަށް ނުވާނެ. އެކަމަކު އެކަން ކުރަން ޖެހިފައި މި އޮތީ. ކުޑަ ހިތްހަމަޖެހުމެއް އެބައޮތް. އެއީ ރަނގަޅު ލީޑެއްގައި އޮތުން،" ސޯލްޝެއާ ބުންޏެވެ.
މިރޭ ދެ ގޯލުގެ ތަފާތުން ބަލިނުވެއްޖެނަމަ ޖެހިޖެހިގެން ދެ ވަނަ ފަހަރަށް ޔުނައިޓެޑަށް ޔޫރޮޕާ ލީގުގެ ސެމީ ފައިނަލުން ފުރުސަތު ލިބޭނެ އެވެ. މިދިޔަ އަހަރުގެ މުބާރާތުގެ ސެމީން ޔުނައިޓެޑް ބަލިވީ މުބާރާތުގެ ޗެމްޕިއަންކަން ހޯދި ސެވިއްޔާ އަތުންނެވެ.
ޔުނައިޓެޑުން ޔޫރޮޕާ ލީގުގައި އަމިއްލަ ދަނޑުގައި އެންމެ ފަހުން ކުޅުނު 16 މެޗުން ވެސް ބަލިވެފައިނުވެ އެވެ. އެކަމަކު އެންމެ ފަހުން ކުޅުނު ދެ މެޗުން ވަނީ ރެއާލް ސޮސިއެޑާޑާއި އޭސީ މިލާން އަތުން އެއްވަރުވެފަ އެވެ.
ގްރަނާޑާ އާއި ޔުނައިޓެޑް ކުޅޭ މެޗު ފަށާނީ މިރޭ ރާއްޖެ ގަޑިން 00:00 ގަ އެވެ.
