މިއުނިކް (އޭޕްރީލް 15) - ޗެމްޕިއަންސް ލީގުގެ ކުއާޓާ ފައިނަލް ދެ ވަނަ ލެގުގައި މިރޭ ޖަރުމަނުގެ ބޮރޫޝިއާ ޑޯޓްމަންޑް ދަނޑުގައި 2-1 އިން މޮޅުވެ، މެންޗެސްޓާ ސިޓީން ސެމީ ފައިނަލުގައި ފްރާންސްގެ ޗެމްޕިއަން ޕީއެސްޖީއާ ދެކޮޅަށް ކުޅެން ތައްޔާރުވެއްޖެ އެވެ.
މިދިޔަ އަހަރުގެ ފައިނަލުން ބަލިވި ޕީއެސްޖީ މި ފަަހަރުގެ ސެމީން ފުރުސަތު ހޯދީ އެންމެ ފަހުގެ ޗެމްޕިއަން ބަޔާން މިއުނިކް ކަޓުވާލުމަށް ފަހު އެވެ. ސިޓީން 2016 ވަނަ އަހަރަށް ފަހު ފުރަތަމަ ފަހަރަށް ޗެމްޕިއަންސް ލީގުގެ ސެމީން ފުރުސަތު ހޯދީ ދެ ލެގުން ވެސް ޑޯޓްމަންޑް ބަލިކޮށްގެންނެވެ. އެގްރިގޭޓަށް ބަލާއިރު ސިޓީ އަށް ކުރި ލިބުނީ 4-2 އިންނެވެ. ސިޓީ އާއި ޕީއެސްޖީ ކުޅޭ ސެމީ ފައިނަލް މެޗުތައް އޮންނާނީ މި މަހު ފަހު ކޮޅާއި އަންނަ މަހުގެ ކުރީކޮޅުގަ އެވެ.
މިރޭ މެޗު ފަށައިގެން 15 ވަނަ މިނިޓްގައި ޒުވާން އިނގިރޭސި މިޑްފީީލްޑަރު ޖޫޑް ބެލިންހަމް ވަނީ ޑޯޓްމަންޑަށް ލީޑުނަގައިދީފަ އެވެ. މިއީ އުމުރުން 17 އަހަރުގެ ބެލިންހަމް ޗެމްޕިއަންސް ލީގުގައި ޖެހި ފުރަތަމަ ގޯލެވެ. ދެ ވަނަ ހާފްގެ ކުޅުން ފެށިގެން 10 މިނިޓް ތެެރޭ ސިޓީން އެއްވަރުކުރި އެވެ. ސިޓީގެ ގޯލު ޖެހީ ޕެނަލްޓީ އަކުން ރިޔާދު މާރޭޒް އެވެ. މިއީ ޑޯޓްމަންޑްގެ އެމްރޭ ޗާން އޭރިއާ ތެރެއިން ބޯޅައިގައި އަތްލުމުން ރެފްރީ ދިން ޕެނަލްޓީއެކެވެ.
މިރޭ ވެސް ސިޓީ މޮޅުކޮށްދިން ގޯލު ޖެހީ ފުރަތަމަ ލެގުގައި ވެސް ސިޓީ މޮޅުކޮށްދިން ޒުވާން މިޑްފީލްޑަރު ފިލް ފޯޑެން އެވެ.
ސިޓީ އެންމެ ފަހުން ޗެމްޕިއަންސް ލީގުގެ ސެމީ ފައިނަލުގައި ކުޅުނީ 2016 ވަނަ އަހަރު އެވެ. އެ ފަހަރު ސެމީގައި އެ ޓީމު ވަނީ ރެއާލް މެޑްރިޑް އަތުން ކަޓައިފަ އެވެ. އެންމެ ފަހުން ތިން ސީޒަނުގައި ވެސް ސިޓީ ޗެމްޕިއަންސް ލީގުން ކެޓީ ކުއާޓާ ފައިނަލުންނެވެ. މި މެޗުން މޮޅުވެ، މުބާރާތުގައި އެއް ހަރުފަތް ކުރިއަށްދިޔައިރު، ސިޓީގެ ކޯޗު ޕެޕް ގާޑިއޯލާ ވަނީ އޭނާގެ ކޯޗިން ކެރިއަރުގައި އަށް ވަނަ ފަހަރަށް ޓީމެއް ގޮވައިގެން މުބާރާތުގެ ސެމީން ފުރުސަތު ހޯދައިފަ އެވެ.
"މިއީ މި ކްލަބް (ސިޓީ)ގެ ތާރީހުގައި ހާއްސަ ކަމަކަށް ނުވެދާނެ. އެއީ ކުރިން އެބައޮތް އެއް ފަހަރު ސެމީ ކުޅެފައި. އެކަމަކު މި ފަހަރު އަހަރެމެން އަތުގައި އެބައޮތް ތާރީހު ބަދަލުކޮށް އާ ކަމެއް ކުރުމުގެ ފުރުސަތު. (ސެމީގެ ފުރުސަތު އަލުން ހޯދުމަކީ) މިއީ މި ޓީމުގެ ހިއްސާ އޮތް ހުރިހާ އެންމެންގެ މަސައްކަތުން ކުރެވުނު ކަމެއް. ބޭނުންވަނީ އިތުރަށް ކުރިއަށްދާން،" ކުރިން ބާސެލޯނާ އާއި ބަޔާނަށް ކޯޗުކޮށްދިން ގާޑިއޯލާ ބުންޏެވެ.
ސިޓީ އަށް މި ފަހަރު ހަތަރު މުބާރާތް ކާމިޔާބު ކުރުމުގެ ފުރުސަތު އެބައޮތެވެ. އެފްއޭ ކަޕް ސެމީގައި އަންނަ ހޮނިހިރު ދުވަހު ޗެލްސީއާ ކުޅުމަށް ފަހު މި މަހު 25 ވަނަ ދުވަހު ލީގު ކަޕް ފައިނަލުގައި ޓޮޓެންހަމާ ކުޅޭނެ އެވެ. އިނގިރޭސި ޕްރިމިއާ ލީގުގެ އެއް ވަނައިގައި ބޮޑު ލީޑަކާ އެކު އޮތްއިރު، މިރޭ މި ވަނީ ޗެމްޕިއަންސް ލީގުގެ ސެމީން ވެސް ފުރުސަތު ލިބިފަ އެވެ.
