މިއުނިކް (އޭޕްރީލް 14) - ޔުއެފާ ޗެމްޕިއަންސް ލީގުގެ ކުއާޓާ ފައިނަލް ދެ ވަނަ ލެގުގައި މިރޭ ބޮރޫޝިއާ ޑޯޓްމަންޑް ދަނޑުގައި މެންޗެސްޓާ ސިޓީން ކުޅޭ މެޗަކީ އެ ޓީމުގެ ފެންވަރު ސާބިތުކޮށްދޭންޖެހޭ ވަގުތެއްގައި ކުޅެން ޖެހިފައިވާ މެޗެއް ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ސިޓީ ދަނޑުގައި މިދިޔަ ހަފްތާގައި ކުޅުނު ފުރަތަމަ ލެގުން އެ ޓީމުން ވަނީ ފަހު ވަގުތު ޖެހި ގޯލާ އެކު 2-1 އިން ޑޯޓްމަންޑް ބަލިކޮށްފަ އެވެ. ރަށުންބޭރުގައި ޖެހި ގޯލާ އެކު މިރޭ ޑޯޓްމަންޑް އަމިއްލަ ދަނޑުގައި ނުކުންނާނީ ވަރަށް ބޮޑު އިތުބާރަކާ އެކު މެޗުގެ ނަތީޖާ އަނބުރާލުމަށެވެ. ގާޑިއޯލާ ބުނީ ސިޓީން ޖެހޭނީ ހުރިހާ ހާލަތަކަށް ތައްޔާރުވެ، އަމިއްލަ ފެންވަރު ސާބިތުކޮށްދޭން ކަމަށެވެ.
އަނެއްކޮޅުން މިދިޔަ ތިން ސީޒަނުގައި ވެސް ސިޓީ ޗެމްޕިއަންސް ލީގުން ކެޓީ ކުއާޓާ ފައިނަލުން ކަމަށްވާއިރު، އެކަން ބަދަލުކުރުން ވެސް އެއީ މުހިއްމު ކަމެއްގެ ގޮތުގައި ބަލަން ޖެހޭ ކަމަށް ގާޑިއޯލާ ބުންޏެވެ.
"މިއީ މި ޓީމުގެ ފެންވަރު ސާބިތުކޮށްދޭން ޖެހޭ ވަގުތެއް ކަމަށް ދެކެން. އަހަރެމެން އެބަޖެހޭ އަނެއް ހަރުފަތަށް ދާން. މިދިޔަ އަހަރުތަކުގައި އަހަރެމެން ވަރަށް މަސައްކަތްކުރިން ސެމީ ފައިނަލަށް. މި ފަހަރު އެންމެ ފުރަތަމަ އަމާޒަކީ ވެސް ކުރިން ނުވެ އޮތް ކަންތައް ކުރުން،" ގާޑިއޯލާ ބުންޏެވެ.
ކުއާޓާ ފައިނަލް ދެ ވަނަ ލެގުގެ މެޗަށް ނުކުންނައިރު، ޕްރެޝަރު އޮތީ ސިޓީ އަށް ކަމަށް ބުނެ، މީޑިއާގައި ދެކެވޭ ވާހަކަތަކަށް ގާޑިއޯލާ ވަނީ ޖަވާބު ދީފަ އެވެ.
"ހަގީގަތަށް ވިސްނަންޏާ ޕްރެޝަރު އޮތީ އަހަރެމެންނަށޭ ބުނެވިދާނެ. އެއީ މީޑިއާ އިން ބޮޑެތި އުއްމީދުތަކެއް ކުރަނީ ސިޓީގެ ކިބައިން ކަމަށްވާތީ. އެ ޗެލެންޖް ނަގަން އަހަރެމެން މި ތިބީ ތައްޔާރަށް،" ގާޑިއޯލާ ބުންޏެވެ.
ޗެމްޕިއަންސް ލީގުގައި އެންމެ ފަހުން ޑޯޓްމަންޑުން އަމިއްލަ ދަނޑުގައި އިނގިރޭސި ޓީމުތަކާ ދެކޮޅަށް ކުޅުނު ދެ މެޗުން ވަނީ ބަލިވެފަ އެވެ. އެއީ 2018 އާއި 2019 ވަނަ އަހަރު ޓޮޓެންހަމް އަތުންނެވެ. މީގެ ކުރިން ޑޯޓްމަންޑް ވަނީ ޗެމްޕިއަންސް ލީގުގެ ގްރޫޕް ސްޓޭޖުގައި 2012 ވަނަ އަހަރު އަމިއްލަ ދަނޑުގައި ސިޓީއާ ބައްދަލުކޮށްފަ އެވެ. އެ މެޗުން ސިޓީ ބަލިވީ 1-0 އިންނެވެ.
މިރޭގެ މެޗުގައި ސިޓީގެ ސާޖިއޯ އަގުއޭރޯ އާއި ޑޯޓްމަންޑްގެ ޖޭޑަން ސަންޗޯ އަށް ނުކުޅެވޭނެ އެވެ. އަދި ޑޯޓްމަންޑްގެ މާކޯ ރެއުސް އާއި މެޓް ހަމެލްސް އަށް ވެސް މިރޭ ސިޓީއާ ދެކޮޅަށް ކުޅެވޭނެކަން ޔަގީނެއް ނޫނެވެ. ޑޯޓްމަންޑް ދަނޑުގައި ސިޓީއާ ދެކޮޅަށް ކުޅޭ މެޗު ފަށާނީ މިރޭ ރާއްޖެ ގަޑިން 12 ޖަހާއިރު އެވެ. g
