މާލޭ ސިޓީގެ ހަތަރު ދާއިރާއެއްގެ ވޯޓު އަލުން ގުނައިދިނުމަށް ސަރުކާރު ހިންގައި މައި ޕާޓީ، އެމްޑީޕީއިން އެދުނީ ނަތީޖާ އޮޅުވާލުމުގެ ބޭނުމުގައި ކަމަށް ބުނެ އިދިކޮޅު ޕީޕީއެމް/ޕީއެންސީ ކޯލިޝަނުން މިއަދު ކަންބޮޑުވުންފާޅު ކޮށްފި އެވެ.
އިއްޔެ ބޭއްވި އިންތިހާބުގައި އެމްޑީޕީއަށް މާލެ ސިޓީ ކައުންސިލް ނާކާމިޔާބުވެފައިވަނިކޮށް މިއަދު ނޫސްވެރިންނާ ބައްދަލު ކުރައްވައި، އެ ޕާޓީގެ ރައީސް މުހައްމަދު ނަޝީދު ވިދާޅުވި ގޮތުގައި މާލޭން ނާކާމިޔާބުވި ކަމަށް ގަބޫލު ކުރައްވާ ކަމަށެވެ.
ނަމަވެސް، ވޯޓުގެ ފަރަގު ވަރަށް ކުޑަ ހަތަރު ދާއިރާއެއްގެ ނަތީޖާ ޔަގީން ކުރުމަށް ވޯޓު އަލުން ގުނައިދިނުމަށް އެމްޑީޕީއިން އެދިފައިވާ ކަމަށް ނަޝީދު ވިދާޅުވި އެވެ.
ވޯޓު އަލުން ގުނުމަށް އެދިފައިވަނީ މެދު ހެންވޭރު ދާއިރާ އާއި ހެންވޭރު ދެކުނު ދާއިރާ އާއި މާފަންނު ހުޅަނގު އުތުރުގެ އިތުރުން، މައްޗަންގޮޅި އުތުރު އެވެ. އެ ދާއިރާތަކުގައި އެމްޑީޕީ އަދި ޕީޕީއެމްގެ ކެންޑިޑޭޓުންގެ ފަރަގު ވަރަށް ކުޑަ އެވެ.
އޭގެ ކުޑައިރުކޮޅެއް ފަހުން، އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި އެ ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވީ އިއްޔެ ބޭއްވި އިންތިހާބުގެ ނަތީޖާ އޮޅުވާލައި، އިދިކޮޅު ކޯލިޝަނަށް ކާމިޔާބުވި ގޮނޑިތަކެއް ގެއްލުވާލަން އެމްޑީޕީން މަސައްކަތް ކުރަމުންދާ ކަމަށެވެ.
"އަޅުގަނޑު ތަކުރާރުކޮށް ދަންނަވާލަން ބޭނުން، ރައްޔިތުން ގޮތް ނިންމެވީމަ، އެއަށް އިހުތިރާމް ކުރައްވާށޭ. މި އިންތިހާބުގެ ތެރެއަށް ވަދެ، އިތުރަށް ގަޑުބަޑުކުރަން ނޫޅުއްވާށޭ،" އަބްދުއްރަހީމް ވިދާޅުވި އެވެ.
މާލޭގެ މޭޔަރު ކަމުގެ ގޮނޑިއާއެކު، އިދިކޮޅު ޕީޕީއެމްއިން ވަނީ ސިޓީ ކައުންސިލްގެ 18 ގޮނޑީގެ ތެރެއިން 12 ގޮނޑިއެއް ކާމިޔާބުކޮށްފަ އެވެ.
އެމްޑީޕީއަށް އަނެއް ތިން ސިޓީގެ މޭޔަރުކަން ޔަގީން ކުރެވިފައިވީ ނަމަވެސް އައްޑޫ ސިޓީގެ ސުޕަ މެޖޯރިޓީ ވެސް ގެއްލުނެވެ. އެ ޕާޓީގެ ސަޕޯޓް ބޮޑު އެހެން ބައެއް ރަށްރަށުން ވެސް ވަނީ އެމްޑީޕީއަށް މިފަހަރު ތާއިދު ކުޑަވެފަ އެވެ. ނަމަވެސް ޖުމްލަކޮށް ބަލާނަމަ، އެންމެ ގިނަ ގޮނޑި ކާމިޔާބުކޮށްފައިވަނީ އެމްޑީޕީއިންނެވެ.
ޖުމްލަ ނަތީޖާއަށް އިޝަރާތްކުރައްވައި، އަބްދުއްރަހީމް ވިދާޅުވީ، ކޮވިޑް-19 އިގެ ހާލަތުގައި ސަރުކާރުން އެޅި ފިޔަވަޅުތަކާއެކު ކެމްޕޭނު ކުރުމުގެ ހަމަ ހަމަ ފުރުސަތު އިދިކޮޅަށް ނުލިބޭ ކަމަށެވެ.
"ރަށްރަށަށް ދަތުރުކޮށް، ކެމްޕޭނު ކުރުމުގެ ފުރުސަތު އަޅުގަނޑުމެންނަށް ލިބުނު ނަމަ އެންމެ ގޮނޑިއެއް ވެސް އެމްޑީޕީ އަށް ނުލިބޭނެ،" އޭނާ ވިދާޅުވި އެވެ.
