ލަންޑަން (އޭޕްރީލް 10) - އިނގިރޭސި ޕްރިމިއާ ލީގުގެ އެއް ވަނައިގައި އޮތް މެންޗެސްޓާ ސިޓީ މިރޭ 10 ކުޅުންތެރިންނާ އެކު ކުޅުނު ލީޑްސް ޔުނައިޓެޑް އަތުން 2-1 އިން ބަލިވިއިރު، ރަށުންބޭރުގައި 4-1 އިން ކްރިސްޓަލް ޕެލަސް ބަލިކޮށް ޗެލްސީ އަލުން ހަތަރު ވަނަ އަށް އަރައިފި އެވެ.
ލީގުގެ އެއް ވަނައިގައި 32 މެޗުން 74 ޕޮއިންޓް ހޯދައިގެން ސިޓީ އޮތްއިރު، މެންޗެސްޓާ ޔުނައިޓެޑް ދެ ވަނައިގައި އޮތީ 30 މެޗުން 60 ޕޮއިންޓާ އެކު އެވެ. ތިން ވަނައިގައި އޮތީ 30 މެޗުން 56 ޕޮއިންޓް ހޯދާފައިވާ ލެސްޓާ ސިޓީ އެވެ.
މިރޭ އަމިއްލަ ދަނޑުގައި ފަހު ވަގުތު 2-1 އިން އެސްޓަން ވިލާ ބަލިކޮށް ލިވަޕޫލުން ވަނީ ހަތަރަކަށް ޖެހިލައިފަ އެވެ. އެކަމަކު ފަހުން ކުޅުނު މެޗުން ޗެލްސީ މޮޅުވުމުން އަލުން އެ ޓީމު ވަނީ ހަތަރު ވަނަ އަށް އަރައިފަ އެވެ. ޗެލްސީ ހަތަރެއްގައި އޮތީ 31 މެޗުން 54 ޕޮއިންޓާ އެކު އެވެ. ފަސް ވަަނައިގައި ލިވަޕޫލް އޮތީ 31 މެޗުން 52 ޕޮއިންޓާ އެކު އެވެ.
ލީޑްސްގެ ގޯލު ޖެހުމަށް ފަހު ޑަލަސް (ކ) އުފާފާޅުކުރަނީ.-- ފޮޓޯ:އޭއެފްޕީ
ސިޓީ ދަނޑުގައި މިރޭ ކުޅުނު މެޗުގައި ލީޑްސް އިން ލީޑުނެގީ މެޗުގެ 42 ވަނަ މިނިޓްގައި ސްޓުއާޓް ޑަލަސް ޖެހި ގޯލުންނެވެ. ލީޑްސް އިން ފުރަތަމަ ހާފު ނިންމާލި އެއް ކުޅުންތެރިއަކު މަދުކޮށެވެ. އެއީ ފުރަތަމަ ހާފުގެ އިތުރު ވަގުތުގައި އެ ޓީމުގެ ކެޕްޓަން ލިއަމް ކޫޕާ އަށް ރަތް ކާޑު ދެއްކީ ގަބްރިއެލް ޖޭސޫސް އަށް ކުރި ފައުލަކަށެވެ. އެއް ކުޅުންތެރިއަކު މަދުކޮށް ކުޅުނު ލީޑްސް ކޮޅަށް ސިޓީގެ ލަނޑު ޖެހީ މެޗުގެ 76 ވަނަ މިނިޓްގައި ފެރާން ޓޮރޭޒް އެވެ. މެޗުގެ އިތުރު ވަގުތުގައި ލީޑްސް މޮޅުކޮށްދިން ގޯލު ޖެހީ ޑަލަސް އެވެ.
މިއީ 2007 ވަނަ އަހަރު ރެޑިން އަތުން ބަލިވި ފަހުން ލީގަށް އަލަށް ޕްރޮމޯޓްވި ޓީމެއް އަތުން އަމިއްލަ ދަނޑުގައި ސިޓީ ބަލިވި ފުރަތަމަ ފަހަރެވެ. ސިޓީގެ ކޯޗު ޕެޕް ގާޑިއޯލާ ވަނީ އެއް ކުޅުންތެރިއަކު މަދުކޮށް މާސެލޯ ބިއެލްސާގެ ކޯޗުކަމުގައި ރަނގަޅު ކުޅުމެއް ދައްކަމުން އަންނަ ލީޑްސް ދެއްކި ހިތްވަރަށް ތައުރީފުކޮށްފަ އެވެ.
އެސްޓަން ވިލާ ބަލިކޮށް ލިވަޕޫލުން ވަނީ 2021 ވަަނަ އަހަރު ފުރަތަމަ ފަހަރަށް ލީގުގައި އަމިއްލަ ދަނޑުގައި މޮޅުވެފަ އެވެ. މިދިޔަ ޑިސެމްބަރު މަހު ޓޮޓެންހަމް އަތުން އަމިއްލަ ދަނޑުގައި މޮޅުވި ފަހުން ލިވަޕޫލް އަމިއްލަ ދަނޑުގައި ކުޅުނު ހަތް މެޗުގެ ތެރެއިން އެއް މެޗުން އެއްވަރުވިއިރު، އެންމެ ފަހުން ކުޅުނު ހަ މެޗުން ވަނީ ބަލިވެފަ އެވެ.
ފަހު ވަގުތު އަލެކްސަންޑަ އާނޯލްޑް ގޯލަށް ބޯޅަ ފޮނުވާލަނީ.-- ފޮޓޯ: އޭއެފްޕީ
މިރޭގެ މެޗުގައި ވެސް ފުރަތަމަ ގޯލު ޖެހީ އެސްޓަން ވިލާ އިންނެވެ. މެޗުގެ 43 ވަނަ މިނިޓްގައި އޮލީ ވަޓްކިންސް ވަނީ އެސްޓަން ވިލާ އަށް ލީޑުނަގައިދީފަ އެވެ. ފުރަތަމަ ހާފުގެ އިތުރު ވަގުތުގައި ރޮބާޓޯ ފިރްމީނޯ ވަނީ ލިވަޕޫލަށް އެއްވަރުކޮށްދީފަ އެވެ. އެކަަމަކު ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައި ޑިއޯގޯ ޖޮޓާ އޮފްސައިޑް ކަމަށް ނިންމުމަށް ފަހު ފިރްމީނޯގެ ގޯލު ބަލައިނުގަންނަން ނިންމި އެވެ.
މެޗުގެ 57 ވަނަ މިނިޓްގައި ލިވަޕޫލަށް އެއްވަރުކޮށްދިން ގޯލު ޖެހީ މުހައްމަދު ސަލާހު އެވެ. މެޗުން މޮޅުވާން ލިވަޕޫލް ކުރި މަސައްކަތް ކާމިޔާބުވީ މެޗުގެ އިތުރު ވަގުުުތުގަ އެވެ. ލިވަޕޫލް މޮޅުކޮށްދިން ގޯލު ޖެެހީ ޒުވާން ފުލްބެކް ޓްރެންޓް އަލެކްސަންޑާ އާނޯލްޑް އެވެ.
ކްރިސްޓަލް ޕެލަސް ދަނޑުގައި މިރޭ ޗެލްސީން ވަނީ ފުރަތަމަ 30 މިނިޓް ތެރޭ ތިން ގޯލު ޖަހައިފަ އެވެ. ގޯލުތައް ޖެހީ ކައި ހަވާޓްޒް އާއި ކްރިސްޓިއަން ޕުލިސިޗް އަދި ކާޓް ޒޫމާ އެވެ. މެޗުގެ 63 ވަނަ މިނިޓްގައި ކްރިސްޓިއަން ބެންޓެކޭ ވަނީ ޕެލަސް އަށް ގޯލެއް ޖަަހައިދީފަ އެވެ. ޗެލްސީގެ ފަހު ގޯލު ޖެހީ 78 ވަނަ މިނިޓްގައި މެޗުގައި މޮޅު ކުޅުމެއް ދެއްކި ޕުލިސިޗް އެވެ.
