ސަސް ބަލިކޮށް ވެލެންސިއާ އިން މާޒިޔާއާ ގާތަށް ޖެހިލައިފި

ސެންޓޭ ސަސްގެ ގޯލަށް ބޯޅަ ފޮނުވާލަނީ.-- ފޮޓޯ: ހުސެއިން ވަހީދު/ އަދަދު

ސެންޓޭ ސަސްގެ ގޯލަށް ބޯޅަ ފޮނުވާލަނީ.-- ފޮޓޯ: ހުސެއިން ވަހީދު/ އަދަދު

ދިރާގު ދިވެހި ޕްރިމިއާ ލީގުގައި މިރޭ ސުޕަ ޔުނައިޓެޑް ސްޕޯޓްސް (ސަސް) 2-0 އިން ބަލިކޮށް ކްލަބް ވެލެންސިއާ އިން ލީގުގެ އެއް ވަނައިގައި އޮތް މާޒިޔާއާ ގާތަށް ޖެހިލައިފި އެވެ.

މި މެޗުން ވެލެންސިއާ މޮޅުވުމުން މާޒިޔާއާ ދެމެދު އޮތް ފަރަގު ވަނީ ހަތަރު ޕޮއިންޓަށް ކުޑަވެފަ އެވެ. އެއް ވަނައިގައި އޮތް މާޒިޔާ އަށް 11 މެޗުން 25 ޕޮއިންޓް ލިބިފައިވާއިރު، ދެ ވަނައިގައި ވެލެންސިއާ އޮތީ 11 މެޗުން 21 ޕޮއިންޓާ އެކު އެވެ.

ވެލެންސިއާގެ ކޯޗު މުހައްމަދު އާތިފް (އާތީ) ބުނީ މެޗަށް ނުކުތްއިރު ކުޅުންތެރިންނަށް މި މެޗުގެ ތިން ޕޮއިންޓް މުހިއްމުކަން ވިސްނައިދިން ކަމަށެވެ. އަދި އެންމެ ރަނގަޅަށް ނުކުޅެވިދިޔަ ވަގުތުތަކީ ހަގީގަތުގައި ނަތީޖާ ނެރުމަށް އޮތް ޕްރެޝަރު ކަމަށް ވެދާނެ ކަމަށް އާތީ ބުންޏެވެ.

"ލީގުގެ އެއް ވަނަ ނޫނީ ދެ ވަނައިގައި ނިންމާ ކަމަށް ވަންޏާ މި މެޗުގެ ތިން ޕޮއިންޓް ވަރަށް މުހިއްމު ކަމަށް ކުޅުންތެރިންނަށް ވިސްނައިިދިނިން. ދެން ކުޅުމަށް ބަލާއިރު އެހާ އެހާ ބޭނުންވި ގޮތަކަށް ނުދިޔަސް ހަގީގަތުގައި މޮޅުވީމަ ހިތްހަމަޖެހޭ،" އާތީ ބުންޏެވެ.

ސަސް މި މެޗުން ބަލިވުމުން އެ ޓީމު ވަނީ ލަނޑުގެ ތަފާތުން ލީގުގެ ހަތް ވަނަ އަށް ވެއްޓިފަ އެވެ. ސަސް އަށް 12 މެޗުން 12 ޕޮއިންޓް ލިބިފައިވާއިރު، ހަ ވަނައިގައި އޮތް އީގަލްސް އަށް 10 މެޗުން ވަނީ 12 ޕޮއިންޓް ލިބިފަ އެވެ. އަދި ފަސް ވަަނައިގައި އޮތް ޓީސީ ސްޕޯޓްސް ކްލަބަށް ވެސް ވަނީ 11 މެޗުން 12 ޕޮއިންޓް ލިބިފަ އެވެ. ޓީސީ މާދަމާރޭ ގްރީން ސްޓްރީޓްސްއާ ދެކޮޅަށް ކުޅޭނެ އެވެ. އީގަލްސްގެ ލީގު މެޗުތައް ވަނީ އެ ޓީމު އޭއެފްސީ ކަޕްގެ ކޮލިފައިންގައި ކުޅޭތީ ފަސްކޮށްފަ އެވެ.

ފުރަތަމަ 20 މިނިޓް ތެރޭ ދެ ހަމަލާ ވެސް އުފެއްދީ ވެލެންސިއާގެ އަލީ ފާސިރު (ސެންޓޭ) އެވެ. މެޗުގެ 12 ވަނަ މިނިޓްގައި ސެންޓޭ ޖެހި ޝޮޓް ސަސްގެ އުޒްބެކިސްތާން ކީޕަރު މިރްޒޮހިދު ވަނީ މަތަކޮށްފަ އެވެ. އޭގެ އަށް މިނިޓް ފަހުން އޭރިއާތެރެއިން ސެންޓޭ ފޮނުވާލަން މަސައްކަތްކުރި ބޯޅަ އެންމެ ރަނގަޅަށް ފަޔަށް އަރާގޮތެއްނުވި އެވެ.

ސަސްގެ ފުރަތަމަ އެޓޭކް ފެނުނީ މެޗުގެ 24 ވަނަ މިނިޓްގަ އެވެ. މޮރޮކޯ ދަރިކޮޅަށް ނިސްބަތްވާ ނެދަލެންޑްސް މިޑްފީލްޑަރު އަޖްނާން މުހައްމަދު ހުސްކޮށްލާފައި އައިހަމް އަހުމަދަށް ދިން ބޯޅަ އޭނާ ވަނީ ގޯލު ކުރިމައްޗަށް ހުރަސްކޮށްލައިފަ އެވެ. އެކަމަކު ސަސް ކުޅުންތެރިއަކަށް ލިބުމުގެ ކުރިން ވެލެންސިއާގެ ޑިފެންޑަރު އަކުރަމް އަބްދުލް ގަނީ (އަކޫ) ވަނީ އެ ބޯޅަ ސަލާމަތްކޮށްފަ އެވެ.

ލަނޑު ޖެހުމަށް ފަހު ވެލެންސިއާ ކުޅުންތެރިން އުފާފާޅުކުރަނީ.-- ފޮޓޯ: ހުސެއިން ވަހީދު/އަދަދު
ލަނޑު ޖެހުމަށް ފަހު ވެލެންސިއާ ކުޅުންތެރިން އުފާފާޅުކުރަނީ.-- ފޮޓޯ: ހުސެއިން ވަހީދު/އަދަދު

ލަނޑު ޖެހުމަށް ފަހު ވެލެންސިއާ ކުޅުންތެރިން އުފާފާޅުކުރަނީ.-- ފޮޓޯ: ހުސެއިން ވަހީދު/އަދަދު

ވެލެންސިއާ އިން ލިޑުނެގީ މެޗުގެ 33 ވަނަ މިނިޓްގައި ސެންޓޭ ވައްދާލި ގޯލުންނެވެ. ހާފުގެ މެދުތެރެއިން ސެންޓޭ ފޮނުވާލި ބޯޅަ ގޯލަށް ވަނީ ކީޕަރު މިރްޒޮހިދު އަތްމަތިން އޮއްސިގެން ގޮހެވެ. ސެންޓޭ މެޗަށް ފަހު ބުނީ އެއީ އޭނާ ހުރަސް ކުރަން ނެގި ބޯޅައެއް ކަމަށެވެ.

ފުރަތަމަ ހާފުގެ ފަހު މިނިޓްގައި ވެލެންސިއާގެ ހުސެއިން ފައިސަލް (ފައިޓޯ) ހުސްކޮށްލާފައި ނަގައިދިން ބޯޅަ އެ ޓީމުގެ ކެޕްޓަން އަލީ އަޝްފާގު (ދަގަނޑޭ) އަށް ލިބުމުން އޭނާ ފޮނުވާލި ނަމަވެސް ބޯޅައިގައި ބާރެއް ނެތުމުން ކީޕަރު މިރްޒޮހިދު ވަނީ އެ ބޯޅަ އަތަށް ނަގައިފަ އެވެ.

ދެ ވަނަ ހާފްގެ ކުޅުން ފެށިގެން 20 ސިކުންތު ތެރޭގައި ސެންޓޭ ދިން ބޯޅައަކުން އޭރިއާތެރެއިން އެ ޓީމުގެ ސްޕެއިން ފޯވާޑް ބޯހަސް މާޓިން ފޮނުވާލިއިރު ދިޔައީ އަރިމަތިންބޭރުންނެވެ. ދެ ވަނަ ހާފް ފަށައިގެން ސަސް އިން ލަނޑު ޖަހާނެ ހުސް ފުރުސަތުތައް ތަނަވަސްކުރިއިރު އެ ބޯޅަތައް ގޯލަކަށް ހަދައިނުލެވުނެވެ. މެޗުގެ 54 ވަނަ މިނިޓްގައި ޔޫސުފް ޖުނައިދު ޒާހިރު (ޖުނޭ) ޖެހި ބޯޅަ ވެލެންސިއާ ކީޕަރު މުހައްމަދު ފައިސަލް ވަނީ މަތަކޮށްފަ އެވެ. އޭގެ ހަ މިނިޓް ފަހުން އަހުމަދު ހަމީދު (އައްމަޑޭ) ޖެހި ބޯޅަ ދިޔައީ އަރިމަތިން ބޭރުންނެވެ.

މެޗުގެ 60 ވަނަ މިނިޓްގައި ދަގަނޑޭގެ ބަދަލުގައި އަހުމަދު ރިލްވާން (ރިލޭ) ވަނީ ކުޅެން އަރުވައިފަ އެވެ.

މެޗުގެ 74 ވަނަ މިނިޓްގައި އޭރިއާތެރެއިން ވެލެންސިއާގެ އަކޫ ސަސްގެ އައިހަމް އަށް ފައުލުކުރި ކަމަށް ބުނެ ސަސް ބެންޗުން ވަނީ ވަރަށް ބޮޑަށް ޕެނަލްޓީ އަކަށް އެޕީލްކޮށްފަ އެވެ. އެކަމަކު ރެފްރީ އަބްދުﷲ ޝާތިރު ނިންމީ ފައުލެއް ނޫން ކަމަށެވެ.

ވެލެންސިއާގެ ދެ ވަނަ ގޯލު ޖެހީ މެޗުގެ 80 ވަަނަ މިނިޓްގައި ސެންޓޭ އެވެ. ބޯހަސް އޭރިއާތެރެއަށް ތިރިތިރިން ހުރަސްކޮށްލި ބޯޅަ ސެންޓޭ ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ. މެޗުގެ ފަހު ވަގުތު ހެޓްރިކް ފުރިހަމަކުރަން ސެންޓޭ އޭރިއާބޭރުން ޖެހި ބޯޅަ ކީޕަރު މިރުޒޮހިދު ވަނީ މަތަކޮށްފަ އެވެ.

މެޗުގެ ތެރެއިން ސަސްގެ ކޯޗު މުހައްމަދު ޝިޔާޒް (މޯހަން) ވަނީ ރެފްރީ ޝާތިރުގެ ގިނަ ނިންމުންތަކާ މެދު ހިތްހަމަނުޖެހުން ފާޅުކޮށްފަ އެވެ. މެޗަށް ފަހު އޮތް ނޫސްވެރިންގެ ބައްދަލުވުމުގައި މޯހަން ބުނީ ރެފްރީންގެ ވާހަކަ ދެއްކުމުގެ ހުއްދައެއް ނެތުމުން އެ ވާހަކަ ދަައްކަން ބޭނުންނުވާ ކަމަށެވެ. މުޅި މެޗަށް ބަލާއިރު ސަސްގެ ކުޅުންތެރިން ކުރި ހިތްވަރު ފާހަގަކުރާކަމަށާއި މެޗުގެ ތެރެއިން އެ ދިޔަ ކަންތައްތަކާ ބަލާއިރު ބަލިވި ކަމުގައި ވިޔަސް ކަންތައްތަކެއް ރަނގަޅަށް ވެސް ދިޔަކަން ފާހަގަކުރާ ކަމަށް މޯހަން ބުންޏެވެ.

ކޮމެންޓް

ފަހުގެ ޚަބަރު

އިންޑިއާ އިން 10 ވަނަ ފަހަރަށް ސާފްގެ ތަށި އުފުލާލައިފި

ޕާކިސްތާން 2-1 އިން ބަލިކޮށް، އިންޑިއާ އިން 10 ވަނަ ފަހަރަށް ސާފް ޗެމްޕިއަންޝިޕްގެ ތަށި ކާމިޔާބުކޮށްފިއެވެ. މިއީ އިންޑިއާ އިން ޖެހިޖެހިގެން މި މުބާރާތުގެ ތަށި އުފުލާލި ތިންވަނަ ފަހަރެވެ. ފުރަތަމަ ހާފުގައި ޕާކިސްތާނުން ލީޑު ނެގި ނަމަވެސް، ދެވަނަ ހާފުގައި އިންޑިއާ އިން ވަނީ ފަހަތުން އަރައި ދެ ގޯލު ޖަހައި މެޗު ކާމިޔާބުކޮށްފައެވެ.

ސުޖަން، 17 އަހަރަށް ފަހު ސްރީ ލަންކާ އަށް ކުޅުން ހުއްޓާލައިފި

ސްރީ ލަންކާގެ ގައުމީ ފުޓްބޯޅަ ޓީމަށް 17 އަހަރު ވަންދެން ކުޅެދިނުމަށްފަހު، އެ ޓީމުގެ ކެޕްޓަން އަދި ގޯލްކީޕަރު ސުޖަން ޕެރޭރާ ބައިނަލްއަގުވާމީ ފުޓްބޯޅައިން ރިޓަޔާކޮށްފި. ގައުމީ ޓީމަށް 69 މެޗު ކުޅެދީފައިވާ ސުޖަންގެ ރިޓަޔަމަންޓް ފާހަގަކުރުމަށް އަންނަ އަހަރުގެ މާޗް މަހު ހާއްސަ ހަފްލާއެއް ބޭއްވުމަށް ލަންކާ ފުޓްބޯޅަ ފެޑެރޭޝަނުން ވަނީ ނިންމާފައި

އިޔަން އާއި އާމިން ގައުމީ ބޮޑީބޯޑިން ލީގު ޓައިޓަލް ދިފާއުކޮށްފި

މި އަހަރުގެ ގައުމީ ބޮޑީބޯޑިން ލީގުގެ ޗެމްޕިއަންކަން އާމިން އުމަރު މޫސާ ދިފާއުކުރިއިރު، ޖޫނިއާ ލީގުގެ ޓައިޓަލް އިޔަން އަހުމަދު ވަނީ ދިފާއުކޮށްފައެވެ. އާމިން ލީގު ކާމިޔާބުކުރީ ސީޒަން ނިންމާލުމަށް ބޭއްވި ބަނޑުފިލާ ޗެލެންޖުގެ މެންސް އޯޕަން ބައިގެ އެއްވަނަ ހޯދައިގެންނެވެ. އަދި އިޔަން ޖޫނިއާ ލީގުގެ އެއްވަނަ ހޯދީ ބަނޑުފިލާ ޗެލެންޖުގެ ޖޫނިއާ ބައިގެ ފައިނަލުގައި ވާދަވެރި ކުޅުމަކަށްފަހު ކުރިހޯދައިގެންނެވެ.

އިންޑިއާގެ އަމާޒު ހުރީ ޖެހިޖެހިގެން ތިން ވަނަ ސާފް ތަށްޓައް

މި ފަހަރުގެ ސާފް ޗެމްޕިއަންޝިޕް ކާމިޔާބުކޮށް، ޖެހިޖެހިގެން ތިންވަނަ ފަހަރަށް ތަށި ހޯދުމުގެ އަމާޒުގައި އިންޑިއާ މިރޭ ފައިނަލުގައި ޕާކިސްތާނާ ދެކޮޅަށް ނުކުންނާނެ. އިންޑިއާގެ ކޯޗު ނައުޝާދު މޫސާ ބުނިގޮތުގައި، ގިނަ ގޮންޖެހުންތަކަކާއެކު ވެސް މި މުބާރާތް ކާމިޔާބުކުރުމަކީ އެ ގައުމުގެ ފުޓްބޯޅައަށް ލިބޭނެ ވަރަށް ބޮޑު ކުރިއެރުމެއް

ޕާކިސްތާނަށް އިންޑިއާ ބަލިކުރަން އެނގޭނެ: ސޮލާނޯ

ސާފް ޗެމްޕިއަންޝިޕްގެ ފައިނަލުގައި އިންޑިއާ ބަލިކުރަން އެނގޭނެ ކަމަށް ޕާކިސްތާނުގެ ކޯޗު ސޮލާނޯ ބުނެފައިވާއިރު، މިއީ އެ ގައުމުން މި މުބާރާތުގެ ފައިނަލުގައި ކުޅޭ ފުރަތަމަ ފަހަރެވެ. ގްރޫޕް ސްޓޭޖުގައި އިންޑިއާ އަތުން ބަލިވި ނަމަވެސް، ޔޫރަޕްގައި ކުޅޭ މުހިންމު ކުޅުންތެރިންތަކެއް ޓީމާ ގުޅުމަކީ ޕާކިސްތާނަށް ލިބޭ ބޮޑު ހިތްހަމަޖެހުމެކެވެ. އިންޑިއާ އަކީ މި މުބާރާތުގެ ތަށި ނުވަ ފަހަރު ހޯދާފައިވާ އެންމެ ކާމިޔާބު ޓީމެވެ.

ވާޓްޒްގެ ލަނޑުތަަކާ އެކު ޖަރުމަނުން ނެދަލެންޑްސް ބަލިކޮށްފި

ޔުއެފާ ނޭޝަންސް ލީގުގައި ރޭ ކުޅުނު މެޗުން 5-0 ގެ ބޮޑު ތަފާތަކުން ނެދަލެންޑްސް ބަލިކޮށް، ޖަރުމަނުން މުބާރާތުގެ ކުއާޓާ ފައިނަލުގެ ޖާގައެއް ކަށަވަރުކޮށްފި. ފްލޯރިއަން ވާޓްޒް ދެ ލަނޑު ކާމިޔާބުކުރި މި މެޗުގެ ނަތީޖާއާއެކު، ޖަރުމަނުން ވަނީ ގްރޫޕްގެ އެއްވަނަ މަގާމު ވެސް ހޯދާފައި.

ޔުއެފާ އިން ފީފާ އިންތިހާބަށް ނެރުނީ ފްރާްންސްގެ ފުޓްބޯޅަ ރައީސް

އަންނަ އަހަރު ބާއްވާ ފީފާގެ އިންތިހާބުގައި ވާދަކުރަން އާސެން ވެންގާ ދެކޮޅު ހެދުމުން، ޔުއެފާގެ ތާއީދާއެކު ފްރާންސް ފުޓްބޯޅަ ފެޑެރޭޝަންގެ ރައީސް ފިލީޕޭ ޑިއާލޯ އިންތިހާބަށް ކުރިމަތިލައްވައިފި. މި އިންތިހާބުގައި ޑިއާލޯގެ އިތުރުން މިހާރުގެ ރައީސް އިންފަންޓީނޯ އާއި އިތުރު ދެ ކެންޑިޑޭޓުން ވާދަކުރާއިރު، އިންތިހާބު އޮންނާނީ އަންނަ އަހަރުގެ މާޗް މަހުގައި

Newsletter

Get the latest news delivered straight to your inbox