ކަރާޗީ, ޕާކިސްތާން (އޭޕްރީލް 8) - ތިން ވަނަ ފަރާތެއްގެ ނުފޫޒާ ހެދި ފީފާއިން ހަތަރު އަހަރު ތެރޭ ދެ ވަނަ ފަހަރަށް ޕާކިސްތާންގެ ފުޓްބޯޅަ ފެޑެރޭޝަން (ޕީއެފްއެފް) ސަސްޕެންޑްކޮށްފި އެވެ.
މީގެ ކުރިން ފީފާ އިން ވަނީ 2017 ވަނަ އަހަރު ޕާކިސްތާން ސަސްޕެންޑް ކޮށްފަ އެވެ. އެކަމަކު އޭގެ އެއް އަހަރު ފަހުން 2018 ވަަނަ އަހަރުގެ މާޗް މަހު ސަސްޕެންޝަން އުވާލި އެވެ. އެއީ ބަދަލުތަކެއް ގެނައުމުގެ ފުރިހަމަ ޔަގީންކަން ޕާކިސްތާނުން ދިނުމުންނެވެ.
ފީފާ އިން މި ފަހަރު ޕާކިސްތާން ސަސްޕެންޑްކުރަން ނިންމީ އެ ފެޑެރޭޝަނުން ހަމަޖައްސާފައިވާ ޕީއެފްއެފްގެ ނޯމަލައިޒިން ކޮމިޓީ އަތުން އެ ގައުމުގެ ފުޓްބޯޅައިގެ ކޮންޓްރޯލް ޕީއެފްއެފްގެ ކުރީގެ ރައީސް ސައީދު އަޝްފާގު ހުސެއިން ޝާހް ނެގުމުންނެވެ. އޭނާ އެކަން ކުރީ ގަދަބާރުން ޕީއެފްއެފް ހެޑްކުއާޓަރުގެ ތެރެއަށް ގްރޫޕަކާ އެކު ވަދެ ކަމަށް ފީފާ އިން ހަމަޖެއްްސި ނޯމަލައިޒިން ކޮމިޓީގެ ޗެއާމަން މާލިކް ހާރޫން ވަނީ ޕާކިސްތާންގެ މީޑިއާ އަށް ދިން އިންޓަވިއުއެއްގައި ވިދާޅުވެފަ އެވެ.
ޕީއެފްއެފް ހެޑްކުއާޓަރާއި އެ ފެޑެރޭޝަންގެ އިދާރީ ހިންގުމުގެ ހުރިހާ ވަސީލަތެއް ނޯމަލައިޒިން ކޮމިޓީއާ އަލުން ހަވާލުކުރަން ފީފާ އިން ތަކުރާރުކޮށް އެންގުމުން އެ އަމުރަށް ސައީދު އަޝްފާގުގެ ޓީމުން ތަބާނުވުމުން ފީފާ އިން އެންމެ ފަހުން ނިންމީ ޕާކިސްތާން ސަސްޕެންޑް ކުރާށެވެ. އަދި މައްސަލައަށް ހައްލެއް ނުލިބެނިސް ސަސްޕެންޝަނަށް ލުޔެއް ނުދޭން ވަނީ ނިންމައިފަ އެވެ.
ސައީދު އަޝްފާގަކީ 2015 ވަނަ އަހަރު ސުޕްރީމް ކޯޓު މެދުވެރިކޮށް ޕާކިސްތާން ފުޓްބޯޅަ ފެޑެރޭޝަންގެ އިންތިހާބު ބާއްވައި އިންތިހާބު ކާމިޔާބުކުރެއްވި ފަރާތެކެވެ. އެކަމަކު ފީފާ އިން އެ އިންތިހާބު ބަލައިނުގަތުމުން އޭނާ އަށް ރަސްމީކޮށް އެއްވެސް މަސައްކަތެއް ނުކުރެވުނެވެ. އޭނާ އަލުން ޕާކިސްތާން ފުޓްބޯޅައިގެ ކޮންޓްރޯލް ނަގަން ބޭނުންވީ ނޯމަލައިޒިން ކޮމިޓީ މެދުވެރިކޮށް ބާއްވާ އިންތިހާބެއްގެ ތެރެއިން އޭނާ އަށް ފުުރުސަތެއް ނުލިބިދާނެތީ އެވެ.
ޕާކިސްތާންގެ ފުޓްބޯޅަ ހިންގުން ފީފާ އިން ވަނީ 2019 ވަނަ އަހަރުގެ ސެޕްޓެމްބަރު މަހު އެކުލަވާލި ނޯމަލައިިޒިން ކޮމިޓީއެއްގެ ތެރެއިން ހަމްޒާ ހާންއާ ހަވާލުކޮށްފަ އެވެ. ޗެއާމަނަކަށް ހަމްޒާ ހަމަޖައްސައި އޭނާ އަށް ދިން މެންޑޭޓަކީ މިދިޔަ އަހަރުގެ ޖޫން މަހުގެ ކުރިން ފުޓްބޯޅަ އިންތިހާބު ބޭއްވުމެވެ. އެ މުއްދަތު މިދިޔަ އަހަރުގެ ޑިސެމްބަރު 31 އަށް އިތުރުކޮށްދިނުމުން ވެސް ހަމްޒާގެ ބެލުމުގެ ދަށުން ނޯމަލައިޒިން ކޮމިޓީ އަށް އިންތިހާބު ނުބޭއްވުނުއިރު، އޭނާ ވަނީ މަގާމުން އިސްތިއުފާ ދީފަ އެވެ. ފަހުން މާލިކްއާ ނޯމަލައިޒިން ކޮމިޓީ ހަވާލުކޮށް އޭނާ އޮތީ މި މަހުގެ ތެރޭގައި އިންތިހާބުގެ މަސައްކަތް ފަށަން ތާވަލުކޮށްފަ އެވެ.
