މެންޗެސްޓާ (އޭޕްރީލް 7) - ޔުއެފާ ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި ރޭ ޒުވާން ތަރި ފިލް ފޮޑެން ޖެހި ގޯލާ އެކު މެންޗެސްޓާ ސިޓީން 2-1 އިން ބޮރޫޝިއާ ޑޯޓްމަންޑް އަތުން މުހިއްމު މޮޅެއް ހޯދައިފި އެވެ.
މި ނަތީޖާއާ އެކު ރޭގެ މެޗު ނިމުމުން އަންނަ ހަފްތާގައި ޑޯޓްމަންޑް ދަނޑުގައި ކުޅޭ މެޗުން އެ ޓީމު ޖެހޭނީ ސެމީގެ ޖާގައެއް ހޯދަަން ބޭނުންނަމަ ސިޓީ ބަލިކުރާށެވެ. ސިޓީ އަށް ޑޯޓްމަންޑް ދަނޑުގައި އެއްވަރުކޮށްލައިގެން ވެސް ސެމީގެ ފުރުސަތު ހޯދޭނެ އެވެ. އެކަމަކު ސިޓީގެ ކޯޗު ޕެޕް ގާޑިއޯލާގެ ވިސްނުން ހުރީ ޑޯޓްމަންޑް ދަނޑުގައި މޮޅެއް ހޯދުމަށެވެ.
"އެއްވަރު ކުރުމަށް ވުރެ އަހަންނަށް ރަނގަޅީ މޮޅެއް ހޯދުން. އެއީ ފުޓްބޯޅައިގައި އެއްވަރަކަށް ނުކުޅެވޭނެ. އަހަރެމެންނަށް މި މެޗުގައި ހެދުނު ގޯސްތައް ރަނގަޅުނުކޮށް ދެން އިން މެޗުން މޮޅެއް ނުވެވޭނެ. އެއީ ޑޯޓްމަންޑަކީ ޗެމްޕިއަންސް ލީގު ދަންނަ ކްލަބެއް," ކުރިން ބާސެލޯނާއާ އެކު މި މުބާރާތް ކާމިޔާބުކުރި ގާޑިއޯލާ ބުންޏެވެ.
ސިޓީގެ އިއްތިހާދު ސްޓޭޑިއަމްގައި ރޭ ކުޅުނު މެޗުގައި އެ ޓީމުން ލީޑުނެގީ 19 ވަނަ މިނިޓްގައި ކެވިން ޑިބްރޭނާ ޖެހި ގޯލުންނެވެ. ޑޯޓްމަންޑް މެދުތެރެއިން ގެއްލުނު ބޯޅައެއް ހޯދައި ސިޓީން އުފެއްދި އެޓޭކެއްގައި ޑިބްރޭނާ މި ގޯލު ޖެހީ ރިޔާދު މާރޭޒް ދިން ބޯޅައަކުންނެވެ.
ފުރަތަމަ ހާފުގައި ޑޯޓްމަންޑަށް ކުޅޭ އިނގިރޭސި ޒުވާން މިޑްފީލްޑަރު ޖޫޑް ބެލިންހަމް ވަނީ ގޯލެއް ޖަހައިފަ އެވެ. ބެލިންހަމް އަށް ލިބުނު ބޯޅަ ގޯލުގެ ތެރެއަށް ފޮނުވާލުމުގެ ކުރިން އޭނާ އަށް ސިޓީގެ ކީޕަރު އެޑަސަން ފައުލުކުރުމުން ރެފްރީ ވަނީ އެ ގޯލު ބަލައިނުގަނެ ފައުލުކަމަށް ނިންމައިފަ އެވެ. ވީޑިއޯ އެސިސްޓަންޓް ރެފްރީ (ވީއޭއާރް) މެދުވެރިކޮށް ބަލަން މަޑުކުރަން ޖެހޭ ހާލަތެއް ކަމަށް ބަލައި އެ އެޓޭކް ކުރިއަށްދާން ފުރުސަތު ދިންނަމަ ބެލިންހަމްގެ ގޯލު ބަލައިގަންނާނެ އެވެ.
ޑޯޓްމަންޑުން އެއްވަރުކުރީ މެޗުގެ 84 ވަނަ މިނިޓްގައި މާކޯ ރެއުސް ޖެހި ގޯލުންނެވެ. މިއީ އާލިން ބްރައުޓް ހާލަންޑް ދިން ބޯޅައަކުން ރެއުސް ޖެހި ގޯލެކެވެ. މިއީ މި ފަހަރުގެ ޗެމްޕިއަންސް ލީގުގައި ސިޓީ ކޮޅަށް ވަން ދެ ވަނަ ގޯލެވެ. މެޗު އެއްވަރުވާން ދަނިކޮށް ފޮޑެން ސިޓީ މޮޅުކޮށްދިން ގޯލު ޖެހީ އިތުރު ވަގުތުގަ އެވެ.
