އުރުދުންގެ ކުރީގެ ވަލީ އަހުދު މަސައްކަތް ކުރެއްވީ ގަބީލާތަކުގެ ވެރިންނާ ގުޅިގެން ސަރުކާރާ ދެކޮޅަށް ބަގާވާތް ހިންގަން ކަމަށް ބޮޑުވަޒީރުގެ ނައިބު ތުހުމަތު ކުރައްވައިފި އެވެ.
އައިމަން ސަފާދީ ތުހުމަތު ކުރެއްވި ގޮތުގައި އަމީރު ހަމްޒާ ބިން ހުސެއިން އުޅުއްވީ ދައުލަތުގައި ހަމަނުޖެހުން އުފައްދާ، ބަގާވާތެއް ހިންގެވުމަށެވެ.
އަމީރު ހަމްޒާ މި ވަގުތު ހުންނެވީ ގޭ ބަންދުގައި ކަމަށް ވިދާޅުވާ ވީޑިއޯއެއް އިއްޔެ ބީބީސީން ވަނީ އާއްމުކޮށްފަ އެވެ. ނަމަވެސް އެއީ ހަގީގަތެއް ނޫން ކަމަށް އުރުދުންގެ އަސްކަރިއްޔާއިން ބުނެ އެވެ.
އިއްޔެ އާއްމުކުރި ވީޑިއޯގައި އަމީރު ހަމްޒާ ވަނީ އެމަނިކުފާނާ ދެކޮޅަށް ކުރާ ތުހުމަތުތައް ދޮގުކުރައްވާފަ އެވެ. ނަމަވެސް ސަރުކާރުގެ ވެރިންނަކީ ކޮރަޕްޓު ބައެއްގެ ގޮތުގައި ސިފަކުރެއްވި އެވެ.
އަމީރު ހަމްޒާ ގޭ ބަންދުގައި ހުންނެވިއިރު، ބަގާވާތް ކުރަން އުޅުނު ކަމުގެ ތުހުމަތުގައި މިހާތަނަށް 16 މީހަކު ހައްޔަރުކޮށްފައި ވެއެވެ. އޭގެ ތެރޭގައި ހަމްޒާގެ އެއް ބަފާ ބޭބޭފުޅު އަދި ރަސްގެފާނު އަބްދުﷲ ގެ ކުރީގެ އެޑްވައިޒަރު ވެސް ހިމެނިވަޑައިގަންނަވަ އެވެ.
އަމީރު ހަމްޒާއަކީ ކާކު؟
އަމީރު ހަމްޒާއަކީ ކުރީގެ ރަސްގެފާނު ހުސެން އާއި އެމަނިކުފާނު އެންމެ ލޯބިވެ ވަޑައިގެންނެވި އަނބިކަނބަލުން ރާނީ ނޫރަށް ލިބިވަޑައިގެންނެވި އެންމެ ދޮށީ ދަރިކަލުންނެވެ. އިނގިރޭސިވިލާތާއި އެމެރިކާއިން ތައުލީމް ހާސިލްކުރެއްވުމަށް ފަހު ހަމްޒާ ވަނީ އުރުދުންގެ އަސްކަރިއްޔާއަށް ހިދުމަތް ކުރައްވާފަ އެވެ.
އަމީރު ހަމްޒާއަކީ ވަލީއަހުދު ކަމަށް ކަނޑައެޅީ 1999 ގައެވެ. ބައްޕާފުޅު އަދި އޭރުގެ ރަސްގެފާނު ހުސެއިން، ހަމްޒާ ސިފަކުރެއްވީ އެމަނިކުފާނުގެ "ލޮލުގެ ނޫރު" ގޮތުގަ އެވެ. ނަމަވެސް ރަސްގެފާނު އަވަހާރަވުމާއެކު އަމީރު ހަމްޒާއަކީ ތަހުތުގެ މަސްއޫލިއްޔަތު އަދާކުރެވޭ ވަރަށް ވުރެ ޒުވާން ބޭފުޅެއް ކަމަށް ކަނޑައެޅި އެވެ.
އެހެންކަމުން ހަމްޒާގެ ބަދަލުގައި ރަސްގެފާނަކަށް ވެވަޑައިގެންނެވީ އަބްދުﷲ އެވެ. ހަމްޒާއަކީ ވަލީއަހުދު ކަމަށް ކަނޑައަޅާފައި އޮތް އޮތުން ރަސްގެފާނު އަބްދުﷲ ބާތިލްކުރެއްވީ 2004 ގައެވެ.
