ދެކުނު ޗައިނާ ކަނޑަށް ޗައިނާއިން އިތުރަށް އަތް ގަދަ ކުރަން އުޅޭ ކަމަށް ފިލިޕީންސްއިން ތުހުމަތުކޮށްފި އެވެ.
ޗައިނާއިން ބުނާ ގޮތުގައި ގުދުރަތީ ގޮތުން މުއްސަނދި ދެކުނު ޗައިނާ ކަނޑައަކީ އެ ގައުމުގެ ބައެކެވެ. އެ ކަނޑުގެ އެކި ހިސާބުތަކުގައިވާ ފަރުތަކުގައި ޗައިނާއިން ވަނީ ރަންވޭތަކާއި ޕޯޓް ފެސިލިޓީތައް ގާއިމްކޮށްފަ އެވެ.
ދެކުނު އިރުމަތީ އޭޝިއާގެ ގިނަ ގައުމުތަކުން އެ ކަނޑުގެ އެކި ސަރަހައްދުތަކަށް ދައުވާ ކުރެ އެވެ. އޭގެ ތެރޭގައި ޓައިވާން، ވިއެޓްނާމް، ފިލިޕީންސް، މެލޭޝިއާ އަދި ބްރޫނާއި ހިމެނެ އެވެ.
އެ ކަނޑުގައި މަނަވަރުތަކަށް މުހިއްމު ރޫޓުތައް ހިމެނޭ އިރު، ތެލާއި ގޭސް އެކި ސަރަހައްދުން ފެނުމުގެ ފުރުސަތު އޮތް ކަމަށް ވެއެވެ.
މިދިޔަ މަހު ޗައިނާގެ 200 ބޯޓު ވަނީ އެ ކަނޑުގައި ފިލިޕީންސްއާ ގާތުގައިވާ ވިޓްސުން ފަރާ ދިމާލުން ދަތުރުކޮށްފަ އެވެ.
އެ މައްސަލާގައި ފިލިޕީންސްއިން ހިތްހަމަނުޖެހުން ފާޅުކުރުމުން މިހާރު އެ ބޯޓުތައް އޮތީ ދެ ގައުމުން ވެސް ދައުވާ ކުރާ ސްޕްރެޓްލީ އައިލެންޑްސް ކައިރީގަ އެވެ.
ފިލިޕީންސްއިން ބުނެފައި ވަނީ ބޯޓުތައް އެ ސަރަހައްދުގައި ބޭއްވުމަކީ ގާނޫނާ ހިލާފު ކަމެއް ކަމަށެވެ. ނަމަވެސް ޗައިނާއިން ބުނީ އެއީ އަސްކަރީ މަނަވަރު ނޫން ކަމަށެވެ. އެކަމަކު ފިލިޕީންސްއިން ޗައިނާގެ އެ ވާހަކަ ގަބޫލެއް ނުކުރެ އެވެ.
"މި ސަރަހައްދުގައި ޗައިނާއިން އަސްކަރީ އުޅަނދުތައް ދުއްވުމަކީ އެ ގައުމުން ހުޅަނގު ފިލިޕީންސް ކަނޑުގެ އިތުރު ސަރަހައްދުތައް އަތުލަން ބޭނުންވާކަން އަންގައިދޭ ކަމެއް،" ފިލިޕީންސްގެ ޑިފެންސް ސެކެޓްރީ ޑެލްފިން ލޮރެންޒާނާ ވިދާޅުވި އެވެ.
އޭނާ ވިދާޅުވީ ފިލިޕީންސްއަށް ނިސްބަތްވާ ސްކާބޮރޯ ޝޯލް އާއި މިސްޗީފް ރީފް މީގެ ކުރިން ޗައިނާއިން އަތުލާފައިވާ ކަމަށާއި އަދިވެސް މަސައްކަތް ކުރަމުން ދަނީ ފިލިޕީންސްގެ އިސްތިގްލާލަށް އުނިކަން އަންނަ ގޮތަށް ކަމަށެވެ.
ދެކުނު ޗައިނާ ކަނޑަކީ ހަމައެކަނި ޗައިނާގެ ނުފޫޒު ހިނގާނެއް ތަނެއް ނޫން ކަމަށް 2016 ވަނަ އަހަރު ބައިނަލްއަގްވާމީ ޓްރައިބިއުނަލް އަކުން ވަނީ ކަނޑައަޅާފަ އެވެ. އެކަމަކު އެ ނިންމުމަށް އަމަލު ކުރަން ޗައިނާއިން ބޭނުމެއް ނުވެ އެވެ.
