ލަންޑަން (އޭޕްރީލް 4) - އިނގިރޭސި ޕްރިމިއާ ލީގުގައި ރޭ ލެސްޓާ ސިޓީ 2-0 އިން ބަލިކޮށް މެންޗެސްޓާ ސިޓީ ލީގު ހޯދުމާ ގާތަށް ޖެހިލިއިރު, އާސެނަލް ދަނޑުގައި ދެ ވަނަ ހާފުގެ ގޯލުތަކާ އެކު 3-0 އިން މޮޅުވެ އެންމެ ފަހުގެ ޗެމްޕިއަން ލިވަޕޫލް ލީގުގެ ފަސް ވަނަ އަށް ޖެހިލައިފި އެވެ.
ސިޓީ އެއް ވަނައިގައި އޮތީ 31 މެޗުން 74 ޕޮއިންޓާ އެކު އެވެ. ލީގު ކަށަވަރުކުރަން އެ ޓީމަށް ބާކީ އޮތް ހަތް މެޗުން ބޭނުންވަނީ ހަތަރު މޮޅެވެ. ދެ ވަނައިގައި އޮތް މެންޗެސްޓާ ޔުނައިޓެޑަށް 29 މެޗުން ލިބިފައިވަނީ 57 ޕޮއިންޓެވެ. ތިން ވަނައިގައި އޮތް ލެސްޓާ އަށް 30 މެޗުން 56 ޕޮއިންޓް ލިބިފައިވާއިރު, ރޭ އަމިއްލަ ދަނޑުގައި 5-2 އިން ވެސްޓް ބްރޮމް އަތުން ބަލިވި ޗެލްސީ ހަތަރު ވަނައިގައި އޮތީ 30 މެޗުން 51 ޕޮއިންޓާ އެކު އެވެ. ރޭގެ މޮޅާ އެކު ލިވަޕޫލް ފަސް ވަަނައިގައި އޮތީ 30 މެޗުން 49 ޕޮއިންޓް ހަމަކޮށްގެންނެވެ.
ލެސްޓާގެ ކިންގް ޕަވާ ސްޓޭޑިއަމްގައި ރޭ ކުޅުނު މެޗުގައި ސިޓީން ދެ ގޯލު ޖެހީ ވެސް މެޗުގެ ދެ ވަނަ ހާފުގަ އެވެ. މެޗުގެ 58 ވަނަ މިނިޓްގައި އެ ޓީމަށް ލީޑުނަގައިދިނީ ފްރާންސްގެ ފުލްބެކް ބެންޖަމިން މެންޑީ އެވެ. މެޗު ނިމެން 15 މިނިޓަށް ވެފައި ހުއްޓައި ސިޓީގެ ދެ ވަނަ ގޯލު ޖެހީ ގަބްރިއެލް ޖޭސޫސް އެވެ.
ސިޓީގެ ކޯޗު ޕެޕް ގާޑިއޯލާ ބުނީ 17 ޕޮއިންޓުގެ ލީޑެއް މި ވަގުތު އޮތްކަމުގައި ވިޔަސް އަދި ހުރިހާ ކަމެއް ނިމުނު ކަމަށް ބެލެވެން ނެތް ކަމަށާއި އަދިވެސް ޗެމްޕިއަނުންނަކީ ލިވަޕޫލް ކަމަށެވެ. ރަށުންބޭރުގައި ސިޓީ ވަނީ އެންމެ ފަހުން ކުޅުނު 15 މެޗުން ވެސް މޮޅުވެފަ އެވެ.
އަނިޔާގެ މައްސަލަތަކުގެ ސަބަބުން އާސެނަލްގެ ބައެއް މުހިއްމު ކުޅުންތެރިން ނުލައި ކުޅުނު ރޭގެ މެޗުގައި ލިވަޕޫލް ކޮޅަށް ނަތީޖާ އަނބުރާލުމުގައި އެންމެ ބޮޑު ހިއްސާއެއް އޮތީ ދެ ވަަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ޑިއޯގޯ ޖޮޓާ އެވެ. ކުޅެން އެރިތާ ތިން މިނިޓް ތެރޭ ޖޮޓާ ވަނީ ލިވަޕޫލަށް ލީޑުނަގައިދީފަ އެވެ. މިއީ ޓްރެންޓް އަލެކްސަންޑާ އާނޯލްޑް ނެގި ހުރަހަކުން މެޗުގެ 64 ވަަނަ މިނިޓްގައި ޖޮޓާ ބޮލުން ޖެހި ގޯލެކެވެ.
އޭގެ ހަތަރު މިނިޓް ފަހުން މުހައްމަދު ސަލާހު ވަނީ ލިވަޕޫލްގެ ލީޑުފުޅާކޮށްދީފަ އެވެ. އަދި ލިވަޕޫލަށް މެޗުގެ ތިން ޕޮއިންޓް ކަށަވަރުކޮށްދިން ފަހު ގޯލު ޖޮޓާ ކާމިޔާބުކުރީ މެޗު ނިމެން އަށް މިނިޓަށް ވެފައި ހުއްޓަ އެވެ. ހަތަރު ވަނަ ލަނޑެއް ޖަހަން ސަލާހާއި ސަޑިއޯ މާނޭ އަށް ރަނގަޅު ފުރުސަތުތަކެއް ލިބިގެންދިޔަ ނަމަވެސް ބޭނުމެއް ނުކުރެވުނެވެ.
ލިވަޕޫލްގެ ކޯޗު ޔާގެން ކްލޮޕް ބުނީ ހުރިހާ ގޮތަކުން ބެލިކަމުގައި ވިޔަސް އޭނާގެ ޓީމަށް މި މޮޅު ހައްގު ކަމަށާއި ދެއްކި ކުޅުމަށް ކުޅުންތެރިންނަށް ތައުރީފްކުރާ ކަމަށެވެ. އާސެނަލްގެ ކޯޗު މިކޭލް އާޓެޓާ ބުނީ މި ބަލީގެ ޒިންމާ އޭނާ ނަގާނެ ކަމަށާއި ލިވަޕޫލުން ހޯދީ ހައްގު މޮޅެއް ކަމަށެވެ.
