ޕެރިސް (އޭޕްރީލް 4) - ފްރެންޗް ލީގުގައި ރޭ ލިލް އަތުން 1-0 އިން ބަލިވެ ޕީއެސްޖީ އަށް ލީގުގެ އެއް ވަނަ މަގާމު ގެއްލުނުއިރު, މެޗުގެ އިތުރުވަގުތުގައި އެ ޓީމުގެ ނޭމާ އަށް ރަތް ކާޑެއް ދައްކައިފި އެވެ.
ލީގުގައި ބާކީ ހަތް މެޗު އޮތްއިރު, ރޭގެ މޮޅާ އެކު ލިލް އެއް ވަނައިގައި އޮތީ 31 މެޗުން 66 ޕޮއިންޓާ އެކު އެވެ. ދެ ވަނައިގައި އެންމެ ފަހުގެ ޗެމްޕިއަން ޕީއެސްޖީ އޮތީ 31 މެޗުން 63 ޕޮއިންޓް ހޯދައިގެންނެވެ. މޮނާކޯ ތިން ވަނަ އަށް އެރީ ރޭ މެޓްޒް އަތުން 4-0 އިން މޮޅުވެ, 31 މެޗުން 62 ޕޮއިންޓް ހޯދައިގެންނެވެ. ރޭ ލެންސްއާ 1-1 އިން އެއްވަރުވި ލިޔޯން ހަތަރު ވަނައިގައި އޮތީ 31 މެޗުން 61 ޕޮއިންޓާ އެކު އެވެ.
ޕީއެސްޖީ ދަނޑުގައި ކުޅުނު ރޭގެ މެޗުގެ ހަމައެކަނި ގޯލު ޖެހީ މެޗުގެ 20 ވަނަ މިނިޓްގައި އުމުރުން 20 އަހަރުގެ ޖޮނަތަން ޑޭވިޑް އެވެ. ޑޭވިޑް ފޮނުވާލި ބޯޅަ ގޯލަށް ވަނީ ކުޅުންތެރިއަކު ގައިގައި ޖެހިފަ އެވެ. ޕީއެސްޖީން ނަތީޖާ ހަމަހަމަކުރަން ގިނަ މަސައްކަތްތަކެއް ކުރި ނަމަވެސް ކާމިޔާބުވާގޮތެއްނުވި އެވެ.
ނޭމާ އަށް ރަތް ކާޑު ދެއްކީ މެޗުގެ އިތުރު ވަގުތުގައި ލިލްގެ ޑިފެންޑަރު ޓިއާގޯ ޑިޔާލޯއާ ދެމެދު ހިނގި ހަމަނުޖެހުމެއްގެ ތެރެއިންނެވެ. ނޭމާގެ އިތުރުން ޑިޔާލޯ އަށް ވެސް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެެވެ.
މިއީ މި ފަހަރު ލީގުގައި ނޭމާ އަށް ދެއްކި ދެ ވަނަ ރަތް ކާޑެވެ.
މި ސީޒަނުގައި މިހާތަނަށް ޕީއެސްޖީ ވަނީ ހުރިހާ މުބާރާތެއްގައި 10 މެޗުން ބަލިވެފަ އެވެ. ޑިސެމްބަރު މަހުން ފެށިގެން މައުރީސިއޯ ޕޮޗެޓީނޯގެ ކޯޗުކަމުގައި ކުޅެމުން އަންނަ ޕީއެސްޖީ ދެން އެންމެ އަވަހަށް ކުޅޭ މެޗުގައި ޗެމްޕިއަންސް ލީގުގައި ނުކުންނާނީ އެންމެ ފަހުގެ ޗެމްޕިއަން ބަޔާން މިއުނިކާއި ދެކޮޅަށެވެ.
