އުރުދުންގެ ސަރުކާރަށް ފާޑުކިޔާ ފަރާތްތަކާ ދެކޮޅަން ހިންގާ ކެމްޕެއިނެއްގެ ދަށުން އެ ގައުމުގެ ކުރީގެ ވަލީއަހުދު އަމީރު ހަމްޒާ ބިން ހުސެއިން މި ވަގުތު ހުންނެވީ ގޭ ބަންދުގައި ކަމަށް އެމަނިކުފާނު ވިދާޅުވެއްޖެ އެވެ.
އެކަން ހާމަކުރެއްވީ ހަމްޒާގެ ގާނޫނީ ވަކީލު ބީބީސީއާ ހިއްސާކުރެއްވި ވީޑިއޯއެއް މެދުވެރިކޮށެވެ. އަމީރު ހަމްޒާއަކީ ރަސްގެފާނު އަބްދުﷲ އާ އެއް ބަފާ ކޮއްކޮ އެވެ. އެ ވީޑިއޯގައި ހަމްޒާ ވަނީ ގައުމުގެ ވެރިންނަށް ކޮރަޕްޝަނުގެ ތުހުމަތު ކުރައްވާފަ އެވެ.
"މިއަދު ހެނދުނު އުރުދުންގެ އަސްކަރީ ބާރުގެ ވެރިޔާ އަޅުގަނޑަށް ޒިޔާރަތްކޮށް، ބޭރަށް ނިކުތުމާއި، މީހުންނާ ބައްދަލުކޮށް ވާހަކަދެއްކުން މަނާ ކަމަށް ވިދާޅުވި. އެއީ މީގެ ކުރިން އަޅުގަނޑު ބައިވެރިވި ބައްދަލުވުންތަކުގައި ރަސްގެފާނާއި ސަރުކާރަށް ފާޑުކިޔާފައި ވާތީ،" ހޮނިހިރު ދުވަހު ރިކޯޑު ކުރި އެ ވީޑިއޯގައި ވެއެވެ.
ރަސްގެފާނަށް ފާޑުވިދާޅުވީ ސީދާ ހަމްޒާ ނޫން ކަމަށް އަސްކަރިއްޔާއިން ބުނި ނަމަވެސް އުރުދުންގައި ހިޔާލު ފާޅު ކުރުމުގެ މިނިވަންކަން އެއްވެސް ވަރަކަށް ނެތް ކަމަށް ހަމްޒާގެ ވީޑިއޯގައި ވިދާޅުވި އެވެ.
އެއްޗެއް ބުނެފި ނަމަ ނުވަތަ ހިޔާލެއް ފާޅުކޮށްފި ނަމަ، ގަނާ ކުރުމާއި ހައްޔަރު ކުރުމާއި ފުރައްސާރަ އާއި އިންޒާރުގެ ޝިކާރައަކަށް ނުވެ އެއްވެސް މީހަކު ސަލާމަތް ނުވާނެ ދަރަޖައެއް ކަންކަން ވަނީ ގޮސްފައި.
ހަމްޒާ ގޭ ބަންދުގައި ހުންނެވި ކަމަށް ވިދާޅުވާ ވީޑިއޯއެއް އާއްމުވެފައި މި ވަނީ އުރުދުންގައި ހިންގަން އުޅުނު ބަގާވާތަކާ ގުޅިގެން ގިނަ ބަޔަކު ހައްޔަރު ކުރަމުންދާ ދަނޑިވަޅެއްގަ އެވެ. ނަމަވެސް ހަމްޒާ ހުންނެވީ ގޭ ބަންދުގައި ނޫން ކަމަށް އެ ގައުމުގެ އަސްކަރިއްޔާއިން ބުނެ އެވެ.
އެކަމަކު ގައުމުގެ ސަލާމަތާއި ހަމަޖެހުމަށް ގެއްލުން ލިބޭ ފަދަ އަމަލުތައް ކުރުން ހުއްޓާލުމަށް ހަމްޒާއަށް އަންގާފައިވާ ކަމަށް އަސްކަރިއްޔާއިން ބުންޏެވެ. ރައްދުގައި ހަމްޒާ ވިދާޅުވީ އެމަނިކުފާނު ގާނޫނާ ހިލާފު އެއްވެސް ކަމެއް ނުކުރާ ކަމަށާއި ސަރުކާރާ ދެކޮޅަށް ރޭވުންތަކެއް ނުރާވާ ކަމަށެވެ.
އުރުދުންގެ ސިޔާސީ މަޝްރަހު މިފަދަ ހާލަތެއްގައި އޮތް އިރު، މެދުއިރުމަތީގެ ގައުމުތަކުން ވަނީ މިހާރުގެ ރަސްގެފާނު އަބްދުﷲ އަށް ތާއީދު އޮތްކަން ހާމަކޮށްފަ އެވެ. އެގޮތުން މިސްރާއި ސައުދީ އަރަބިއްޔާއިން ވެސް ތާއީދު ކުރަނީ ރަސްގެފާނު އަބްދުﷲ އަށެވެ. އޭގެ އިތުރުން އެމެރިކާއިން ވެސް ބުނެފައި ވަނީ ރަސްގެފާނު އަބްދުﷲ އަކީ މުހިއްމު ބައިވެރިއެއް ކަމަށެވެ.
އަމީރު ހަމްޒާއަކީ ކާކު؟
އަމީރު ހަމްޒާއަކީ ކުރީގެ ރަސްގެފާނު ހުސެން އާއި އެމަނިކުފާނު އެންމެ ލޯބިވެ ވަޑައިގެންނެވި އަނބިކަނބަލުން ރާނީ ނޫރަށް ލިބިވަޑައިގެންނެވި އެންމެ ދޮށީ ދަރިކަލުންނެވެ. އިނގިރޭސިވިލާތާއި އެމެރިކާއިން ތައުލީމް ހާސިލްކުރެއްވުމަށް ފަހު ހަމްޒާ ވަނީ އުރުދުންގެ އަސްކަރިއްޔާއަށް ހިދުމަތް ކުރައްވާފަ އެވެ.
އަމީރު ހަމްޒާއަކީ ވަލީއަހުދު ކަމަށް ކަނޑައެޅީ 1999 ގައެވެ. ބައްޕާފުޅު އަދި އޭރުގެ ރަސްގެފާނު ހުސެއިން، ހަމްޒާ ސިފަކުރެއްވީ އެމަނިކުފާނުގެ "ލޮލުގެ ނޫރު" ގޮތުގަ އެވެ. ނަމަވެސް ރަސްގެފާނު އަވަހާރަވުމާއެކު އަމީރު ހަމްޒާއަކީ ތަހުތުގެ މަސްއޫލިއްޔަތު އަދާކުރެވޭ ވަރަށް ވުރެ ޒުވާން ބޭފުޅެއް ކަމަށް ކަނޑައެޅި އެވެ.
އެހެންކަމުން ހަމްޒާގެ ބަދަލުގައި ރަސްގެފާނަކަށް ވެވަޑައިގެންނެވީ އަބްދުﷲ އެވެ. ހަމްޒާއަކީ ވަލީއަހުދު ކަމަށް ކަނޑައަޅާފައި އޮތް އޮތުން ރަސްގެފާނު އަބްދުﷲ ބާތިލްކުރެއްވީ 2004 ގައެވެ.
