ލަންޑަން (އޭޕްރީލް 3) - އިނގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ވެސްޓް ބްރޮމްވިޗް އެލްބިއަން އަތުން 5-2 އިން ބަލިވެ, ޗެލްސީގެ ކޯޗުކަމާ ހަވާލުވެ ތޯމަސް ޓުޗެލް ދަމަހައްޓަމުން އައި ބަލިނުވުމުގެ ރެކޯޑަށް ނިމުން އައިސްފި އެވެ.
ފުރަތަމަ ހާފުގައި ތިއާގޯ ސިލްވާ އަށް ރަތް ކާޑު ދެއްކުމުން ޗެލްސީން މެޗުގެ ބޮޑުބައި ކުޅުނީ އެއް ކުޅުންތެރިއަކު މަދުކޮށެވެ.
މިދިޔަ ޖެނުއަރީ މަހު ފަހުކޮޅު ފްރޭންކް ލަމްޕާޑް ޗެލްސީގެ ކޯޗުކަމުން ވަކިކޮށް ޑިސެމްބަރު މަހު ޕީއެސްޖީން ދޫކޮށްލި ޓުޗެލްއާ ޗެލްސީ ހަވާލުކުރީ 18 މަސް ދުވަހުގެ އެއްބަސްވުމެއްގެ ދަށުންނެވެ. ޗެލްސީއާ ހަވާލުވެ ޓުޗެލް އެންމެ ފުރަތަމަ ނުކުތް 14 މެޗުން ބަލިވެފައިނުވެ އެވެ.
މިއަދުގެ ނަތީޖާއާ އެކު ޗެލްސީ ލީގުގެ ހަތަރު ވަނައިގައި އޮތީ 30 މެޗުން 51 ޕޮއިންޓް ހޯދައިގެންނެވެ. އެކަމަކު މި ހަފްތާގައި މެޗުތަކުގެ ނަތީޖާ ނުކުންނަ ގޮތަކުން ޗެލްސީ އަށް ހަތަރު ވަނަ ގެއްލުމުގެ ފުރުސަތު ބޮޑެވެ. ޗެލްސީގެ ކޯޗު ޓުޗެލް ބުނީ މެޗުން ބަލިވުމުގެ އެންމެ ބޮޑު ސަބަބަކީ ރަތް ކާޑު ކަމަށެވެ.
"ރަތް ކާޑާ އެކު މެޗު ބަދަލުވެއްޖެ. ވަރަށް ފަސޭހަ ގޯލުތަކެއް އަހަރެމެން ކޮޅަށް ވަނީ ވެސް. މި ކަހަލަ ކަންތައްތައް އަހަރެމެންގެ ދެކޮޅަށް ހުރީމަ ދެން ނަތީޖާ އަނބުރާލަން އުނދަގޫވާނެކަން އެނގުނު. އެކަމަކު މިއީ އަހަރެން އެއްވެސް ވަރަކަށް ހީކުރި ނަތީޖާއެއް ނޫން," ޓުޗެލް ބުންޏެވެ.
މިރޭގެ މެޗުގައި ޗެލްސީން ލީޑުނެގީ މެޗުގެ 27 ވަނަ މިނިޓްގައި ކްރިސްޓިއަން ޕުލިސިޗް ޖެހި ގޯލުންނެވެ. އެކަމަކު ޗެލްސީ އަށް މައްސަލަ ދިމާވީ އޭގެ ދެ މިނިޓް ފަހުން އެ ޓީމުގެ ތަޖުރިބާކާރު ޑިފެންޑަރު ތިއާގޯ ސިލްވާ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.
ލީގުގެ 19 ވަނައިގައި އޮތް ވެސްޓް ބްރޮމް އިން ވަނީ ފުރަތަމަ ހާފުގެ އިތުރު ވަގުތުގައި ދެ ގޯލު ޖަހައި މެޗުގެ ނަތީޖާ އަނބުރާލައިފަ އެވެ. ދެ ގޯލު ވެސް ޖެހީ މަތައިސް ޕެރޭރާ އެވެ. ދެ ވަނަ ހާފްގެ ކުޅުން ފެށިގެން މެޗުގެ 63 ވަނަ މިނިޓްގައި ކަލުމް ރޮބިންސަންގެ ގޯލުން ވެސްޓް ބްރޮމް ތިން ގޯލުގެ ލީޑެއް ނެގި އެވެ. އެ ހިސާބުން ވެސް ފަސް ޖެހުމެއްނެތި އޭގެ ފަސް މިނިޓް ފަހުން ވެސްޓް ބްރޮމް ވަނީ ހަތަރު ވަނަ ގޯލެއް ޖަހައިފަ އެވެ. މި ގޯލު ޖެހީ އެމްބާއޭ ޑިއާގްނޭ އެވެ.
ޗެލްސީގެ މޭސަން މައުންޓް ވަނީ ގޯލެއް ޖަހައި ޗެލްސީ އަށް އުއްމީދެއް ހޯދައިދީފަ އެވެ. އެކަމަކު އެ ހިސާބުން ވެސް އިތުރު ހިތްވަރެއްލައިގެން ޗެލްސީ އަށް ކުރިއަށް ނުދެވުމުގެ ނަތީޖާއަކަށްވީ މެޗުގެ އިތުރު ވަގުތުގައި ރޮބިންސަން ވެސްޓް ބްރޮމް އަށް އިތުރު ގޯލެއް ޖަހައިދިނުމެވެ.
މިއީ 2011 ވަނަ އަހަރު ޗެލްސީ ދަނޑުގައި 5-3 އިން އާސެނަލް މޮޅުވި ފަހުން ލީގުގެ މެޗެއްގައި ޗެލްސީ ކޮޅަށް އިދިކޮޅު ޓީމުން ފަސް ގޯލު ޖެހި ފުރަތަމަ ފަހަރެވެ. ވެސްޓް ބްރޮމްގެ ކޯޗު ސޭމް އަލަޑައިސް ބުނީ އޭނާގެ ޓީމުން ދެއްކީ ތަފާތު ހިތްވަރެއް ކަމަށާއި ޖެހި ގޯލުތަކުގެ ފެންވަރު ވެސް ރަނގަޅު ކަމަށެވެ.
މި މޮޅާ އެކު ވެސްޓް ބްރޮމް ލީގުގެ 19 ވަނައިގައި އޮތީ 30 މެޗުން 21 ޕޮއިންޓް ހޯދައިގެންނެވެ.
