ލަންޑަން (އޭޕްރީލް 3) - އިނގިރޭސި ޕްރިމިއާ ލީގުގައި މިރޭ ލިވަޕޫލާ ދެކޮޅަށް ނުކުންނައިރު މި ވަގުތު އެ ޓީމު އޮތީ ކުރީގެ ފޯމުގައި ނޫން ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
މިދިޔަ ސީޒަނުގެ ޗެމްޕިއަންކަން ހޯދި ލިވަޕޫލް ވަނީ މި ސީޒަނުގައި އަނިޔާ އާއި އެ ނޫން ވެސް މައްސަލަތަކާ ހެދި ވަރަށް ބޮޑަށް ފޯމު ގެއްލިފަ އެވެ. މި ވަގުތު ގަދަ ހަތަރެއްގެ ތެރެއަށް ވަންނަން މަސައްކަތްކުރަމުން އަންނަ ލިވަޕޫލް ލީގުގެ ހަތް ވަނައިގައި އޮތްއިރު އާސެނަލް އޮތީ ނުވަ ވަނައިގަ އެވެ. ލިވަޕޫލަށް 29 މެޗުން 46 ޕޮއިންޓް ލިބިފައިވާއިރު, އާސެނަލަށް ވަނީ 29 މެޗުން 42 ޕޮއިންޓް ލިބިފަ އެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އާސެނަލްގެ ކޯޗު އާޓެޓާ ބުނީ ޓީމުތަކުގެ ފެންވަރަށް ބަލާއިރު ލިވަޕޫލަކީ ގަދަ ދެ ޓީމުގެ ތެރޭގައި އޮންނާނެ ޓީމެއް ކަމަށެވެ. އެކަމަކު ހާލަތު ބަދަލުވަމުން އައި ގޮތުން ލިވަޕޫލްގެ ފޯމު ގެއްލުމުން މި ވަގުތު ނަތީޖާތަކަށް ބަލާއިރު, އެ ޓީމު އޮތީ ކުރީގެ ފެންވަރުގައި ނޫން ކަމަށް ގަބޫލުކުރަން ޖެހޭ ކަމަށް އާޓެޓާ ބުންޏެވެ.
"މިދިޔަ އަހަރުތަކުގައި ލިވަޕޫލުން ދެއްކި ކުޅުމަށް ބަލާއިރު އެ ކޮލިޓީ އަދިވެސް އެ ޓީމުގައި އެބައޮތް. އެކަމަކު މި ވަގުތަށް ބަލާނަމަ އެ އޮތީ އެ ލެވަލްގައެއް ނޫން ނަތީޖާ ނެރުމުގެ ކަންތައްތައް. އެހެންވީމަ މީގެ އެބަހުރި ތަފާތުތަކެއް. އަހަރެމެން ބަލަން ޖެހޭނީ މީގެއިން އަހަރެމެންނަށް އޮތް ފުރުސަތަކަށް. މަސައްކަތްކުރަންވީ އޭގެ އަށް," އާޓެޓާ ބުންޏެވެ.
ބައިނަލްއަގުވާމީ މެޗުތަކަށް ދެ ހަފްތާ އަށް ކްލަބްތަކުގެ ފުޓްބޯޅަ މެދުކަނޑާލުމަށް ފަހު މިއަދު އަލުން ފަށާއިރު, އާސެނަލަށް ވަނީ އަނިޔާގެ މައްސަލަތައް ކުރިމަތިވެފަ އެވެ. އެކާވީސް އަހަރުން ދަށުގެ ޔޫރޯ ފުޓްބޯޅަ މުބާރާތުގައި ދާދި ފަހުން ކުޅުނު އާސެނަލްގެ ދެ ކުޅުންތެރިން ކަމަށްވާ ބުކާޔޯ ސަކާ އާއި އެމީލް ސްމިތު ރޯވް އަށް ފިޓްނަސް މައްސަލަތަކެއް ކުރިމަތިވެފައިވާއިރު, ޑޭވިޑް ލުއިޒާއި ގްރޭނިޓް ޝާކާ ވެސް ހުރީ އަނިޔާގަ އެވެ.
"ނަތީޖާ ނެރެވޭވަރުގެ ޓީމެއް ނެރެވޭނެ ކަމަށް މި ބަލަނީ. އިންޓަނޭޝަނަލް ބްރޭކަށް ދިޔައިރު ޓީމު އޮތީ ރަނގަޅު ހިސާބެއްގައި. އަލުން ހުއްޓާލި ހިސާބުން ފެށުން ވާނީ އުނދަގޫ ކަމަކަށް. އެހެން ނަމަވެސް މަސައްކަތްކޮށްފިއްޔާ ރަނގަޅަށް ކުޅެވޭނެ," ލިވަޕޫލް އަތުން އާސެނަލް ދެ މެޗުން މޮޅުކޮށްދީފައިވާ އާޓެޓާ ބުންޏެވެ.
ލިވަޕޫލްގެ ކޯޗު ޔާގެން ކްލޮޕް ބުނީ ގަދަ ހަތަރެއްގެ ތެރެއަށް ވަންނަން ބޭނުންނަމަ ލީގުގައި ބާކީ ހުރި މެޗުތަކުން ޕޮއިންޓް ގެއްލުން ވީހާ ވެސް މަދުކުރަން ޖެހޭ ކަމަށެވެ. އަދި ފަރުވާކުޑަކޮށްލައިގެން ދެން ލީގުގައި ހާސިލްކުރެވޭނެ އެއްވެސް އެއްޗެއް ނޯންނާނެ ކަމަށް ކްލޮޕް ބުންޏެވެ.
"ދެން ފަސޭހަކޮށްލައިގެން ތިބެގެން އިތުރު ޕޮއިންޓްތަކެއް ގެއްލުވާލަން ނެތިން. އަހަރެމެން އެބަޖެހޭ ދެން ޕްރިމިއާ ލީގާއި ޗެމްޕިއަންސް ލީގުގައި ކޮންމެ މެޗަކުން ވެސް މޮޅުވެވޭތޯ ކުރެވެން ހުރި ހުރިހާ ކަމެއް ކުރަން," ކްލޮޕް ބުންޏެވެ.
ލިވަޕޫލް ލީގުގައި އެންމެ ފަހުން ކުޅުނު މެޗުތަކުގައި އަނިޔާގެ ސަބަބުން ބައިވެރިނުވެވުނު ބްރެޒިލްގެ ފޯވާޑް ރޮބާޓޯ ފިރްމީނޯ ވަނީ މިރޭގެ މެޗަށް ފިޓްވެފަ އެވެ.
